Nei RegierungDe Grand-Duc huet de Xavier Bettel Formateur genannt

Enger Nei-Oplo vun der Blo-Rout-Grénger-Koalitioun dierft net méi vill am Wee stoen, mä d'prozedural Weeër mussen natierlech respektéiert ginn.

De Grand-Duc huet de Xavier Bettel Formateur genannt (16.10.2018)
Enger Nei-Oplo vun der Blo-Rout-Grénger-Koalitioun dierft net méi vill am Wee stoen, mä d'prozedural Weeër mussen natierlech respektéiert ginn.

De Xavier Bettel krut en Dënschdeg vum Grand-Duc den Optrag, eng Regierung ze forméieren. Dat huet den Haff kuerz no 17.30 Auer offiziell matgedeelt:

Cet après-midi, Son Altesse Royale le Grand-Duc a reçu en audience Madame Martine Solovieff, chargée d'une mission d'information dans le cadre de la formation du nouveau gouvernement.

L'informateur lui a fait rapport de ses entrevues avec les représentants des principaux partis politiques. Les partis du DP, du LSAP et des Verts ont exprimé leur volonté d'entamer des négociations pour former une coalition.

Suite à ces conclusions, le Grand-Duc a invité Monsieur Xavier Bettel (DP) à une audience et l'a nommé formateur.

De Formateur Xavier Bettel



© Lloyd Winandy (RTL)


Als éischt "Footballeur", dono "Formateur" (16.10.2018)
Kuerz viru senger Entrevue mam Grand-Duc am Palais lenkt sech de Xavier Bettel e bësse sportlech of ...


Delegatiounen
E Mëttwoch de Moien um 10 Auer wëll de Xavier Bettel mat de méigleche Koalitiounspartner am Kulturministère zesummekommen. De Formateur Xavier Bettel hätt gär 7 Leit pro Partei bei dëser Entrevue, et sollen 11 bis 12 Aarbechtsgruppe geplangt sinn.

Informatioune vun RTL Télé Lëtzebuerg no féiert d'Corinne Cahen d'Koalitiounsverhandlunge fir d'DP als Chef vun der Delegatioun. Donieft sinn de Pierre Gramegna an de Claude Meisch fir de Süden, de Fernand Etgen (Norden), de Lex Delles (Osten) an d'Lydie Polfer mam Claude Lamberty fir den Zentrum mat an de Verhandlungen.



De Felix Braz féiert déi gréng Delegatioun un, dora sinn nach de President Christian Kmiotek, de François Bausch, d'Carole Dieschbourg, d'Josée Lorsché, d'Sam Tanson, de Claude Turmes.




An tëscht ass och bekannt, wie vun der sozialistescher Partei bei de Verhandlungen dobäi ass. RTL Informatiounen no sinn dat den Etienne Schneider, de Romain Schneider, den Nicolas Schmit, de Claude Haagen, den Dan Kersch, den Alex Bodry an d'Taina Bofferding.



Chronologie
Nodeems de Grand-Duc e Méindeg den Owend d'Procureur Général d'État als Informateur genannt hat, goungen d'Demarchen den Dag dono weider. D'Martine Solovieff hat am Laf vum Dënschdeg de Muere Gespréicher mat den eenzele Parteipresidenten, déi hir Vue op d'Walresultat duergeluecht hunn, sou datt den Informateur heiriwwer de Staatschef informéiere konnt.

RTL-Informatiounen no huet d'Martine Solovieff d'Parteicheffen an der Suite vum Walresultat gesinn, also virop d'CSV, dann d'LSAP, d'DP an déi Gréng.



D’Informateur Martine Solovieff ass um 16.30 Auer aus dem Palais komm, wou si dem Grand-Duc d'Konklusiounen ofginn huet. Nodeems si do passéiert war, huet d’Procureur général d'État keng Präzisioune ginn, mä just gesot "Mission accomplie".

© Cour grand-ducale / Sophie Margue / tous droits réservés


Um Grand-Duc war et dunn, e Formateur ze nennen, wéi de Staatsminister Xavier Bettel et e Méindeg den Owend nom DP-Comité-directeur sot, sollt dëst séier geschéien, well e Mëttwoch den Owend ewell zu Bréissel en EU-Sommet ufänkt. An dat ass dann och séier geschitt, well nom Martine Solovieff ass de Xavier Bettel an de Palais gaangen ... a gouf Formateur genannt.

© Pierre Weimerskirch (RTL)


2013: Grand-Duc nennt eng 1. Kéier en Informateur

Nom Wahlsonndeg ass et um Grand-Duc, d'Walresultat ze analyséieren an am Respekt vun dësem e Formateur ze nennen, deen déi nächst Regierung soll zesumme stellen.

Wann de Staatschef awer feststellt, datt d'Opstelle vun enger neier Regierung net evident kéint ginn, kann hien fir d'éischt en Informateur nennen, sou wéi dat e Méindeg geschitt ass. Deem Informateur seng Roll ass et, Gespréicher ze féieren, ze sondéieren also, de Grand-Duc ze informéieren a Proposen ze maachen, en Vue vun der Ernennung vun engem Formateur.

Informateur 2013 / Reportage Pit Everling

2013 war alles anescht ewéi soss.

Mir kucken zeréck. D'CSV war den 20. Oktober Owes zwar bei wäitem stäerkste Kraaft bliwwen, hat awer 3 Sëtz verluer.

De Premier sortant Jean-Claude Juncker ass trotzdeem dovunner ausgaangen, datt den Zeenario dee selwechte wier, wéi déi Kéiere virdrun, datt hien als Spëtzekandidat vun der stäerkster Partei als Formateur géing genannt ginn, fir d'Gespréich dann do wahrscheinlech mam Wahlgewënner DP ze sichen.

Well sech awer nach wärend der Elefanteronn an an de Stonnen duerno séier eraus kristalliséiert huet, datt Blo, Rout a Gréng kéinten zesumme goen, ouni d'CSV, koum et net zum gewinnten Oflaf.

De Grand-Duc Henri huet d'Walresultat analyséiert a mat de verschiddene Partei-Responsabele geschwat.
Op där enger Säit stoung Revendicatioun vum CSV-Spëtzekandidat Juncker fir Formateur genannt ze ginn, op där aner Säit stoung d'Demande vum DP-Mann Xavier Bettel, fir en Informateur ze nennen, well ee sech zu Dräi kéint eens ginn, d'Sondéierungsgespréicher scho fest am Bléck.

Dat Ganzt war begleet vu grousse politeschen Diskussiounen iwwer d'Interpretatioun vum Wielerwëllen, well d'DP der CSV d'Dir zougeklaakt huet, wat och parteiintern bei Liberalen net iwwerall op Zoustëmmung gestouss ass, denke mer un de Broch tëscht Xavier Bettel a Charel Goerens.

Zwee Deeg no de Walen gouf en Informateur genannt an der Persoun vum deemolege President vum Verwaltungsgeriicht Georges Ravarani.

No de Gespréicher mat de verschiddene Parteien huet de Georges Ravarani nach de selwechten Dag constatéiert, datt just eng Konstellatioun méiglech wier an zwar déi tëscht DP, LSAP an deene Gréngen. Hien huet nach Owes dem Staatschef de Rapport gemaach a bei där Geleeënheet de Xavier Bettel als Formateur proposéiert.

Wéi de Pol Schock am Mäerz 2014 an enger Chronik am Forum schreift, hätt de Grand-Duc Henri nach de Sommet zu Bréissel ofgewaart fir offiziell ze deklaréieren, datt den DP-Spëtzekandidat Xavier Bettel Formateur vun enger nächster Regierung gëtt. De Staatschef huet dat dunn de 25. Oktober 2013, 5 Deeg no de Wale gemaach.

Den 28. Oktober hunn d'Koalitiounsverhandlungen dunn ugefaangen.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.