VIDEO AN AUDIO - Serie DeputéiertDéi ganz Serie vun den neien Deputéierten elo am Replay

Dës Woch stelle mer Iech an enger Serie déi nei Gesiichter um Krautmaart vir, déi, déi nogeréckelt sinn.

Dat sinn der jo 5, an alphabetescher Reiefolleg: Carlo Back, Djuna Bernard, Stéphanie Empain, Marc Hansen a Carole Hartmann.

Am Journal vun 7.30 Auer moies um Radio an am Journal vun 19.30 Auer owes op der Tëlee stelle mir déi eenzel Deputéiert vir. Op RTL.lu fannt Dir no der Diffusioun ëmmer sämtlech Video- an Audio-Reportagen am Replay.

Stéphanie Empain vun Déi Gréng

Si wëll sech an Zukunft an de Beräicher Gesondheet, Sport, Famill an och fir den Norde vum Land staark maachen. Déi gréng Deputéiert Stéphanie Empain.

Als jonk Fra hat si sech bei de jonke Gréngen agesat, duerno awer déi politesch Carrière eng Zäitlaang op Äis geluecht. Dëst Joer dunn huet si awer ee Revival erlieft. Vun 0 op 100 quasi. DNadine Gautier huet d’Politikerin aus dem Norde vum Land getraff a mat hir op hir politesch Zukunft, an och wéi si sech bis ewell an de leschte Wochen an Deeg an der Chamber agelieft huet, gekuckt.

Portrait Stéphanie Empain - Reportage Nadine Gautier



Nach huet d’Stéphanie Empain keng Ried wärend enger Plenière an der Chamber gehalen. Aneschters wéi aner nei Gesichter vun de Gréngen. Ma an de Chamberkommissiounen ass déi 35 Joer al Politikerin scho gutt aktiv, sëtzt do zum Beispill an der aussepolitescher Kommissioun, nieft engem Mars Di Bartolomeo oder engem Jean Asselborn, al agesiessen Hären, déi de politeschen Zirkus zanter Joerzéngte kennen. Fir d’Stéphanie Empain awer kee Grond, ageschüchtert ze sinn. Si huet ënnert anerem och an de Groupe de Travail an de Koalitiounsverhandlunge matgeschafft. Hei wier den Echange ganz respektvoll gewiescht.

D’Mamm vun zwee klenge Kanner ass am Weste vum Land grouss ginn, wunnt elo awer an der Géigend vu Wolz. Eng Regioun, déi besser un de Gesondheetsreseau soll ugeschloss ginn, mengt déi gréng Deputéiert. Besonnesch de Manktem u Klinicken an Urgencë fir Kanner sträicht déi jonk Politikerin ervir. Zwar sëtzt d’Stéphanie Empain an der Gesondheetskommissioun, huet do awer kee Stëmmrecht. Si sëtzt do nämlech fir de sportleche Volet. Bis 19 Joer war d’Stéphanie Empain sportlech aktiv, als Liichtathletin beim CAL, huet duerno awer déi Carrière op Äis geluecht fir ënnert anerem Politikwëssenschaften ze studéieren. Zanter dem 1. Dezember ass d’Stéphanie Empain Presidentin vun der FLA.

Nieft dem politeschen Engagement bedreift d’Parlamentarierin nach ee klenge Buttek, dee se wollt ausbauen. Dat war u sech d’Iddi, ier déi 35 Joer al Politikerin op de Krautmaart koum.

Serie Deputéiert: Stéphanie Empain vun Déi Gréng (04.01.2019)
An enger Serie stelle mir Iech déi nei Gesiichter um Krautmaart vir, déi nogeréckelt sinn.


De Carlo Back vun Déi Gréng
D'Mobilitéit an d'Energie - dat sinn 2 Schwéierpunkten, déi de gréngen Deputéierte Carlo Back sech fir déi nächst 5 Joer an der Chamber gesat huet. D'Claudia Kollwelter huet sech mam geléierten Nuklearphysiker um Kierchbierg getraff, fir ënnert anerem iwwer d'Klimaziler ze schwätzen.

Serie Deputéiert: Carlo Back, vum Claudia Kollwelter



De Rendez-vous war méi genee um Boulevard J. F. Kennedy virum Gebai vu LuxEnergie, der Cogeneratiounsanlag. Fir de 66 Joer ale grénge Politiker ass dëst ee gutt Beispill an e gudden Usaz, fir d'Klimaziler ëmzesetzen. An der Anlag gëtt Energie cogeneréiert, dat heescht duerch d'Verbrenne vu Pallets, also Holz, gëtt Hëtzt produzéiert an domat ginn Haiser a Büroen um Kierchbierg gehëtzt, ausserdeem gëtt Elektresch produzéiert. "Eng ganz effikass Manéier, fir eis Energie ze benotzen", esou de Carlo Back.

Fir datt Lëtzebuerg ëmmer méi an déi Richtung geet, muss dem Carlo Back no nach sou munches geschéien. Virun allem op 2 Volete misst geschafft ginn: Effikassitéit an erneierbar Energien. Engersäits missten d'Gebaier energetesch sanéiert ginn, fir sou mann wéi méiglech Energie ze verbrauchen, anerersäits misst um Niveau Transport eppes geschéien, wou jo nach vill mat fossilen Energien amplaz mat erneierbaren Energië geschafft gëtt. Hei missten den Transport public an d'Mobilité douce favoriséiert ginn.

Als President vun der Mobilitéitskommissioun an der Chamber ass et dem Carlo Back wichteg, datt d'Mobilitéit agreabel an awer och energetesch effikass soll sinn. Datt dorun nach geschafft muss ginn, ass fir de passionéierten Cyclist evident.

Serie Deputéiert: Carlo Back vun Déi Gréng (03.01.2019)
An enger Serie stelle mir Iech déi nei Gesiichter um Krautmaart vir, déi nogeréckelt sinn.

D'Carole Hartmann vun der DP

Déi 31 Joer al Affekotin ass fir d’DP am Oste mat an d’Renne gaangen. Nodeems de Lex Delles e Ministerposte krut, ass d’Iechternacherin als Deputéiert an d’Chamber nogerutscht.

Serie Deputéiert: Carole Hartmann, vum Maxime Gillen

Als Schülerin a Studentin huet d’Carole Hartmann an der Dammen-Nationalequipe vum Dëschtennis gespillt. Haut suergt de Sport nach fir deen néidegen Ausgläich zu hirem stressegen Alldag. Am Summer geet si gäre lafen, Vëlo fueren a spillt Tennis.

Vill Doheem ass d’Carole Hartmann net. Ma et ass hir awer wichteg, de Spagat tëscht hirem Beruff, dem politeschen Engagement, an hirem Privatliewen ze packen.

Fir hir Aarbecht an der Chamber, wëll d’Carole Hartmann an hirem Beruff e bësse méi kuerz trieden. Ganz ophale mat schaffen, dat kéim fir si awer net a Fro. Mat der richteger Organisatioun wier alles ze meeschteren.

Serie Deputéiert: D'Carole Hartmann vun der DP am Portrait (02.01.2019)
Dës Woch stelle mer Iech an enger Serie déi nei Gesiichter um Krautmaart vir, déi, déi nogeréckelt sinn.


De Marc Hansen vun Déi Gréng
D'Gesondheet ass sécherlech e Schwéierpunkt vum Marc Hansen vun déi Gréng. Als Apdikter läit dat och op der Hand. Den 49 Joer ale Papp vu 4 Kanner ass ee vun de neie Gesiichter, déi an d'Chamber nogeréckelt sinn. D'Claudia Kollwelter huet hien a senger Apdikt besicht a mat him iwwert d'Santé an awer och déi perséinlech Zukunft geschwat.

Serie Deputéiert: Marc Hansen, vum Claudia Kollwelter



Dem Marc Hansen war et wichteg, an der Gesondheetskommissioun vun der Chamber ze sëtzen. Als Apdikter, mengt de Marc Hansen e gewëssent Verständnis fir d'Thema ze hunn an ass och gewëllt, sech an d'Dossieren eran ze schaffen. E wichtege Sujet wieren zum Beispill d'Urgencen am Land. De Marc Hansen erënnert awer och un de Problem, deen et am ländleche Raum gëtt. Do géifen et heiansdo Owes oder de Weekend iwwer Problemer ginn, wou d'Leit da musse wäit Weeër fueren.

Et misst mat all de Partner zesummen diskutéiert ginn, fir virun ze kommen an och d'Gesetzer misste geännert ginn, mengt den Apdikter. Zanter 2012 sëtzt de Politiker am Käerjenger Gemengerot, ass elo dann och nach Deputéierten an der Chamber. Do bleift natierlech manner Zäit fir d'Apdikt - als Independant misst een awer natierlech kucken, datt de Betrib weider funktionéiert. Dat géif fir de Marc Hansen Reorganisatioun, Vertrauen an eng Ekipp an och eng Neiverdeelung vun den Tâchë bedeiten.

Vue datt de Marc Hansen zu Käerjeng wunnt, awer seng Apdikt am Éislek huet, ass den ëffentlechen Transport leider keng Optioun. Allerdéngs hätt hie sech elo dozou entscheet, en Elektroauto ze kafen. Fir den Deputéierten eng Tëscheléisung, déi gutt ass.

Serie Deputéiert: Marc Hansen vun Déi Gréng (01.01.2019)
An enger Serie stelle mir Iech déi nei Gesiichter um Krautmaart vir, déi nogeréckelt sinn. Als Zweeten de Marc Hansen.


D'Djuna Bernard vun Déi Gréng

Den Optakt vun eiser Serie mécht déi 26 Joer al an domat jéngst Deputéiert Djuna Bernard vun déi Gréng. D'Claudia Kollwelter huet mat der laangjäreger Fnel-Scoutin iwwer hir Passioun vum Reese geschwat an iwwer hiren neie Rôle als Presidentin vun der Kulturkommissioun an der Chamber ...

Serie Deputéiert: Djuna Bernard, vum Claudia Kollwelter



5 Méint laang ass d'Djuna Bernard eleng mam Rucksak duerch Afrika, Australien, Südost-Asien an Indien gereest. Eng wichteg Erfarung och an hirer perséinlecher Entwécklung: Et wier och dee Moment gewiescht, wou si decidéiert hätt, net weider Geschicht ze studéieren, wou si e Bachelor dra gemaach huet, ma fir eriwwer an de Sozialsecteur ze wiesselen an den Hobby zum Beruff ze maachen ...

Der Djuna Bernard hire Parcours ass vum Scoutismus markéiert, deen de Wee zum Sozialen och sécherlech favoriséiert huet: "Duerch d'Scouten hunn ech de Benevolat kennegeléiert, och mat Defavoriséierte Leit." Bis ewell Presidentin vun der Jugendkonferenz wëll d'Djuna Bernard och déi jonk Matbierger an d'Politik matabauen.

Kultur ass dem Djuna Bernard no e wichtege Bestanddeel vun der Gesellschaft an huet och e ganz perséinleche Stellewäert fir si: "Ech hunn als Kand e puer Joer laang Theater gespillt an ech ginn och nach haut ganz gären Theaterstécker kucken." A wéinst dem Geschichtsstudium wieren hir och historesch Theme ganz wichteg. Mam Kulturentwécklungsplang hätt ee kloer Linnen, wéi d'Kulturzeen an d'Kulturpolitik solle gestallt ginn an d'Djuna Bernard freet sech drop, als Presidentin vun der Kulturkommissioun an der Chamber Deel vun deem Prozess ze sinn.

Serie Deputéiert: Djuna Bernard vun Déi Gréng (31.12.2018)
An enger Serie stelle mir Iech déi nei Gesiichter um Krautmaart vir, déi nogeréckelt sinn. Ugefaange mat der 26 Joer aler an domat jéngster Deputéierten.


D'Serie am Iwwerbléck
31. Dezember 2018: Djuna Bernard
1. Januar 2019: Marc Hansen
2. Januar 2019: Carole Hartmann
3. Januar 2019: Carlo Back
4. Januar 2019: Stéphanie Empain

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.