VIDEO a FOTOEN: Mat 88% vun de StëmmenDe Franz Fayot ass neien LSAP-President, Tom Jungen Generalsekretär

De Franz Fayot iwwerhëlt d'Successioun vum Claude Haagen, deen zanter 2014 un der Spëtzt vun der Sozialistescher Partei stoung.

Franz Fayot neien LSAP-President: Reportage Annick Goerens

D'Diskussiounskultur an der Partei nei beliewen, de politeschen Nowuess méi konsequent promouvéieren an d'Profil vun der LSAP schäerfen. Dat sinn d'Ziler vun der LSAP, déi zanter en Dënschdeg den Owend mam Franz Fayot als President an dem Tom Jungen als Generalsekretär eng nei Partei-Spëtzt huet... an déi huet sech vill virgeholl.

Franz Fayot: „ Léiwe Käerjenger Kongress. Jo ech sinn e Stater. Nobody is perfect. Mä virun allem sinn ech eppes, een iwwerzeegte Sozialist a fir mech ginn et keng Nord-Sozialisten, keng Süd-Sozialisten, keng Ost- a keng West-Sozialisten, fir mech ginn et just Sozialisten an der LSAP. Mir hunn all eis Iddien, awer virun allem hu mer all déi selwecht Wäerter. An ech gleewe fest drun, dass d'LSAP capabel ass déi richteg Äntwerten ze fannen op d'Ongläichheeten, déi ëmmer méi grouss ginn, op déi ekologesch Kris, op d'Erausfuerderungen vun der Digitaliséierung a fir eng solidaresch a gerecht Gesellschaft.“

Dat war den neie President vun der LSAP, deen en Dënschdeg den Owend mat 88 Prozent vun de Stëmmen - ouni Géigekandidatur- gewielt gouf. De Claude Hagen wollt net méi fir de Poste vum Parteipresident kandidéieren.

© Jeannot Ries (RTL)

De Stater Deputéierten huet a senger Ried betount, dass hie motivéiert ass, fir déi fundamental Erausfuerderunge virun deenen d'Sozialiste stinn, unzepaken. Ganz besonnesch de Profil vun der LSAP misst nees gestäerkt ginn.

Franz Fayot: „Mir mussen erëm eppes ze soen hunn als Partei, zur Bildungspolitik, zur ökologescher Fro, zur Steiergerechtegkeet, zum Logement, der Mobilitéit, der politescher Participatioun vun alle Biergerinnen a Bierger déi zu Lëtzebuerg liewen a schaffen an zur Kultur souwisou. Mir mussen nei Iddien entwéckelen och Abseits an onofhängeg vum Dagesgeschäft vun der Regierung a vun der Fraktioun.“

Et wär sech an de leschte Joren ze vill mat sech selwer beschäftegt- an an de leschte Méint ze vill iwwer Poste geschwat ginn. An Zukunft wär et dofir wichteg, dass d'Parteimemberen sech selwer nees méi froe wat si fir d'Partei kéinte maachen, wéi wat d'Partei fir si kéint maachen, erkläert de Franz Fayot. Ganz wichteg an dem Kontext wär och d'Rekrutéieren an d'Formatioun vum Nowuess.

Franz Fayot:
„Mir mussen eis agestoen, dass mer et net fäerdeg bruecht hunn an de leschte Joerzéngten, konsequent nei Leit opzebauen an un d'Partei ze bannen. Och do géing ech gären, zesumme mat der Parteileitung, gezielt op Fraen a Jonker setzen; se opbauen, ënnerstëtzen, mathuelen.“  

All dës Ukënnegungen vun hirem neie President hunn déi 348 Delegéiert en Dënschdeg den Owend zu Käerjeng mat standing ovations begréisst. 

De Generalsekretär Tom Jungen gouf iwwregens och ouni Géigekandidatur mat 95 Prozent vun de Stëmme gewielt. Nei Vizepresidentin gëtt dann d'Kooperatiounsministesch Paulette Lenert an neie Vizepresident den Diddelenger Buergermeeschter Dan Biancalana.

De Portrait iwwert de Franz Fayot (22.01.2019)
De Franz Fayot iwwerhëlt d'Successioun vum Claude Haagen, deen zanter 2014 un der Spëtzt vun der Sozialistescher Partei stoung.




Wéi ass d'Stëmmung bei der Basis virun der Ofstëmmung?

Eng Partei ass net nëmmen d'Partei-Spëtzt, dofir ass et emol interessant erauszefannen, wat eng Rei Militanten zu der Situatioun vun der LSAP soen.

Stëmmung bei der Basis (22.01.2019)
Eng Partei ass net nëmmen d'Partei-Spëtzt, dofir ass et emol interessant erauszefannen, wat en Rei Militanten zu der Situatioun vun der LSAP soen.


Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.