City-BreakfastMéi Leit notzen ëffentlechen Transport, wann dee gratis gëtt

Wéi d'Stater Gemeng hire Mataarbechter eng gratis Mobilitéitskaart ugebueden huet, hu ronn 80 Prozent vun hinnen dës geholl.

© Mike Elsen / RTL Télé Lëtzebuerg

Bal all Joers klëmmt d'Awunnerzuel vun der Stad Lëtzebuerg ëm 3.000. Op den 31. Dezember zejoert gekuckt hunn iwwer 119.000 Leit an der Stad gewunnt. Wat d'Wunnen ugeet huet d'Buergermeeschtesch Lydie Polfer ënnerstrach datt een den abordabele Wunnengen eng méi grouss Wichtegkeet ginn hätt.

City Breakfast - Reportage Claudia Kollwelter



Zejoert sinn 92 Wunnunitéite fäerdeg gestallt ginn. An den nächsten dräi Joer solle ronn 110 weider Wunnenge vun der Stad Lëtzebuerg gebaut ginn.

D'Stater Buergermeeschtesch ass iwwerzeegt, datt d'Zuel vun de Leit eropgeet, wann den ëffentlechen Transport nächst Joer gratis gëtt. Dat huet d'Lydie Polfer e Mëttwoch de Moien um CityBreakfast betount an d'Beispill vun der Stad Lëtzebuerg ernimmt, fir ze beleeën, datt d'Gratuitéit eppes bewierkt.

Vun den 4.000 Mataarbechter vun der Stad Lëtzebuerg hunn 3.200 d'Mobilitéitskaart ugefrot, zanter deem de Schäfferot dës zejoert gratis ugebueden huet. 80 Prozent vun de Leit, déi fir d'Stad Lëtzebuerg schaffen, wunnen iwwregens net an der Stad. D'Lydie Polfer huet ënnerstrach, datt d'Organisatioun vum ëffentlechen Transport nëmme méiglech ass, wann all d'Acteure sech zesumme sëtzen, fir de bescht méigleche Service unzebidden.

Extrait Lydie Polfer

Wann den Tram da bis eng Kéier vun der Kockelscheier bis op de Findel fiert, muss een och an der Stad de Bus doropshin organiséieren.

D'Stad Lëtzebuerg huet iwwregens iwwer 400 Chauffeuren an 21 Kontrolleuren. Och, wann déi dann an Zukunft keng Tickete méi kontrolléiere mussen, wäerten dës aner Missiounen hunn, wéi zum Beispill, fir ze kontrolléieren, datt d'Leit sech uerdentlech behuelen, huet d'Stater Buergermeeschtesch nach betount.

© Mike Elsen / RTL Télé Lëtzebuerg


Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.