Cité Syrdall21 vun 39 Haiser sollen ofgerappt ginn

Dem Fonds d'assainissement vum Problem-Site zu Wecker am Dall vun der Sir gehéiere bis ewell eng 80 Prozent vun de knapp 6 Hektar.

Schonn 3 Joerzéngte laang gläicht de Site éischter enger Decharge wéi engem Wunnquartier: d'Cité Syrdall zu Wecker.

An de 70er-Jore war e Quartier fir Studente geplangt, doraus gouf näischt, d'Wunnengen goufe gebaut, Studenten sinn ni komm.

21 vun den 39 Haiser sollen ofgerappt ginn; en Charge ass de Fonds d'assainissement de la Cité Syrdall.

Dësem Fong gehéiere bis ewell 80% vun de knapp 6 Hektar - dëst sinn 200 vun 220 Wunn-Unitéiten. De Fong huet misste mat engen 120 verschiddene Proprietäre verhandelen, fir d'Parzellen ze kafen. Mat 6 Proprietäre lafen d'Gespréicher fir d'Vente nach. Dat präziséiert d'Logementsministesch Sam Tanson op eng parlamentaresch Fro vum DP-Deputéierte Gilles Baum.

D'Terrainen, déi kaaft goufen, ginn am Laf vun dësem Joer amenagéiert an d'Wunnengen ofgerappt, sou datt hei nei Projete kënne gebaut ginn. En entspriechende PAP ass an der Maach.

PDF: Réponse à la question N° 0291 (Question écrite) de Monsieur Gilles Baum, Député concernant Projet immobilier "Cité Syrdall", par Madame Sam Tanson, Ministre du Logement.

D'Cité Syrdall ass och ëmmer nees e Sujet am Biwer Gemengerot - et geet da meeschtens ëm Rechnunge fir Waasser a Poubellen, déi net bezuelt gi sinn.



Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.