Fatal Explosioun um WaldhaffGedenkminutt, Spendenopruff a Froen iwwer d'Granat

En Donneschdeg ware jo am Munitiounsdepot vun der Arméi zwee Demineuren ëmkomm. Deen Ënneroffizéier, dee schwéier blesséiert gouf, dierft wuel iwwerliewen.

D'Regierung hat e Freideg am Conseil de Gouvernement eng Gedenkminutt fir déi zwee Ënneroffizéier, déi bei der Explosioun en Donneschdeg am Arméi-Depot um Waldhaff ëm d'Liewe komm sinn.

D'nächst Woch gëtt um Härebierg eng Erënnerungsfeier fir déi zwee Demineuren ofgehalen. Duerno ginn déi zwee Verstuerwen an hire respektive Gemenge mat militäreschen Éiere bäigesat.

Zu engem spéideren Ament gëtt och eng Erënnerungs-Plack um Härebierg fir déi zwee verscheet Ënneroffizéier installéiert - fir déi zwee experimentéiert Männer, déi am Exercice vun hirer Missioun hiert Liewen gelooss hunn.

No der Explosioun: Interview mam François Bausch (15.02.2019)
De Verdeedegungsminister war e Freideg de Moien an der Chamberkommissioun an e Freideg den Owend Live-Invité op RTL Télé Lëtzebuerg.


Nouvellen aus der Chamberkommissioun
Nieft den zwee Doudesaffer waren och zwee Ënneroffizéier blesséiert ginn, ee méi liicht an ee ganz uerg.

Dee schwéier blesséierten Ënneroffizéier wäert den Accident wuel iwwerliewen, dat sot - ganz virsiichteg - den Arméiminister François Bausch um Freideg den Deputéierten an der zoustänneger Chamberkommissioun. Den Zaldot wier stonnelaang operéiert ginn an dunn op Léck geflu ginn, well en do nach besser kann traitéiert ginn, esou de Minister e Freideg den Owend am Interview op RTL Télé Lëtzebuerg.

Explosioun: Den Dag no der Tragedie - Rep. Nico Graf

An der Chamberkommissioun waren och de Generol Alain Duschène an de Procureur Georges Oswald derbäi.

D'Enquête iwwer d'Granat-Explosioun vum Donneschdeg wier och déi ganz Nuecht weidergaang, sot de Procureur; et gëtt den Ament awer nach keng weider konkret Detailer iwwer d'Ursaach vun der Explosioun.

De François Bausch (15.02.2019)
Den Arméiminister huet um Freideg virun der Chamberkommissioun geschwat.

D'Deputéiert waren emotional staark betraff, vun deem, wat se héieren hunn an hunn net kontrovers diskutéiert.

Eens war ee sech, datt d'Assurancen fir d'Affer méiglechst large sollten applizéiert ginn, fir de Familljen vun de Verstuerwenen an de Blesséierten ze hëllefen.

Wéi konnt eng Granat ouni Zünder explodéieren?

Dat ass d'Haaptfro, déi sech den Ament gestallt gëtt. Gouf eng falsch Manipulatioun gemaach oder war d'Explosioun een Accident? An wéi eng Richtung gëtt enquêtéiert? D'Annick Goerens huet onofhängeg vunenee mat 3 Fachleit geschwat.

Granat ouni Zünder: Rep. Annick Goerens



An déi 3 Experte ware sech eens: Déi eenzeg Méiglechkeet, wéi eng Granat ouni Zünder ka lassgoen, ass, wann de Sprengstoff an der Granat – bei den Amerikaner ass dat zum Beispill den TNT – sech esou chemesch verännert, duerch 70-80 Joer falsch Lagerung oder duerch eng laang Zäit am Buedem, wou Reewaasser an aner Stoffer op den Explosiv awierken, dass sech Kristaller bilden oder eng Zort haarzeg Substanz, déi dann instabil gëtt a bei der klengster Beweegung explodéiert. Et gëtt och nach dovunner geschwat, dass den Explosiv souzesoe "schweesst".

D'Probabilitéit, dass esou eppes geschitt, läit ongeféier bei 1 zu 100.000. Also eigentlech genee sou onwahrscheinlech, wéi wann en normale Bierger säin Auto tankt an den Handy ufänkt mat schellen an doduerch eng Explosioun ausgeléist gëtt. Esou Accidenter kéint ee leider net evitéieren, erkläert e Mann vum Fach RTL géintiwwer. Och Experten am Ausland si sech eens, "et ka virkommen" an "dat léisst sech net evitéieren". An deem Beruff géif et eben ni eng Routine ginn an esou Accidenter géifen zum Beruffsrisiko gehéieren.

Am Deminage gëtt en général tëscht zwou Zorte Granaten entscheet, déi fonnt ginn. Déi mat Zünder, also "gezündert" Granaten, déi prett waren, fir ofgeschoss ze ginn, an déi ouni Zünder, also "net gezündert Granaten", déi am Zweete Weltkrich op enger Zort Depot louchen an net "schaarf" waren. Déi Zort gouf dacks zeréckgelooss, wann d'Truppe sech séier hu musse weiderbeweegen. D'Granat vum Waldhaff kéint wuel esou eng gewiescht sinn.

Déi 48 Kilo schwéier Granat, déi um Waldhaff explodéiert ass, wär dat déckst Geschoss, wat ee mat enger mobiller Kanoun deemools hätt kéinte verschéissen, erkläert de Fachmann am Gespréich mat RTL. Et wär och eng Munitioun, déi ganz dacks, quasi 100 Mol am Joer - virun allem am Norde vum Land - géing fonnt ginn. Wärend der Ardennenoffensiv am Dezember 1944 bis Enn Januar 1945 huet et vill gereent an deemno si vill Granaten ni explodéiert, well se am Bulli gelant sinn an ni widder e feste Géigestand koumen.

En aneren Expert schwätzt RTL géintiwwer vun iwwer 5 Tonnen aler Krichsmunitioun, déi all Joer hei am Land géinge fonnt ginn, virun allem am Éislek, un der Grenz mat der Belsch. Wa keen Zünder drun ass, ginn d'Granaten als "sécher" agestuuft an op de Waldhaff transportéiert an do gelagert, bis se an d'Belsch, hannert Sankt Vith, bruecht an do kontrolléiert gesprengt ginn.

D'Aktioun, déi déi 2 verstuerwen Demineure gemaach hunn, war also Routine an näischt Aussergewéinleches, wéi och schonn de Chef d'État-major vun der Arméi Alain Duschène betount hat. Déi 2 Verstuerwen hate wahrscheinlech och bei der Manipulatioun vun der Granat keng Schutzkleedung un, dat hätt bei der Gréisstenuerdnung vun dëser Bomm souwisou näischt gehollef a just bei der Aarbecht gestéiert, sou heescht et vum Expert.

Spendenopruff
Op Facebook gëtt antëscht och fir d'Famille vun den Affer gesammelt. D'Zil ass et, 100.000 Euro zesummenzekréien.



Schreiwes vum Haff
De Grand-Duc an d'Grande-Duchesse hu sech e Freideg net just iwwer de Virfall an de Gesondheetszoustand vun de Blesséierten informéiert, si hunn och ee vun de Blesséierte besicht.

Hei déi offiziell Matdeelung vum Freideg den Owend:

Suite à l'accident tragique qui a eu lieu au dépôt de munitions au Waldhaff, S.A.R. le Grand-Duc a reçu ce jour en audience Monsieur François Bausch, ministre de la Défense et le général Alain Duschène. Le ministre et le chef d'état-major de l'Armée l'ont informé sur l'état de santé des deux sous-officiers blessés ainsi que sur les premiers éléments des circonstances de l'accident.

En fin d'après-midi, LL.AA.RR. le Grand-Duc et la Grande-Duchesse se sont rendus, avec le ministre de la Défense et le CEMA, au chevet d'un des deux blessés.



UM DONNESCHDEG: Wat ass geschitt?
Bei der Explosioun am Munitiounsdepot vun der Arméi um Waldhaff en Donneschdeg de Moie sinn zwou Persounen ëm d'Liewe komm, zwou weider Persoune goufe blesséiert, eng dovu ganz uerg, si schwieft nach ëmmer a Liewensgefor.

Bei de Leit, déi hiert Liewe verluer hunn, handelt et sech ëm Ënneroffizéier, déi 1971 respektiv 1979 gebuer sinn. Si waren also 47 an 39 Joer al a waren Experten am Deminage. Bei de Blesséierten handelt et sech och ëm Ënneroffizéier, si hunn 41 respektiv 44 Joer.

Explosioun um Waldhaff: Rep. Annick Goerens



Granat ouni Zünder explodéiert
Den Informatiounen no, déi et op enger Pressekonferenz um Donneschdeg ëm 16.30 Auer gouf, war eng 48 Kilogramm schwéier Granat aus dem Zweete Weltkrich explodéiert. Well si keen Zünder méi hat, war si als sécher agestuuft ginn.

En Donneschdeg sollt d'8-Inch-Granat virbereet ginn, fir an d'Belsch transportéiert ze ginn, well do sollt se entsuergt ginn. Bei deene Virbereedungsaarbechten, déi vun den Ënneroffizéier-Demineuren duerchgefouert goufen, koum et dunn zu der fataler Explosioun am Hangar. Deen Ament louch d'Granat op enger Zort "Gabelstapler". Firwat et zu der Explosioun koum, soll d'Enquête elo klären.

Déidlech Explosioun am Munitiounsdepot vun der Arméi (14.02.2019)
Beim Virfall um Waldhaff koumen zwee Ënneroffizéier ëm d'Liewen, zwee anerer goufe blesséiert, een dovu ganz schwéier.


De Procureur d'État adjoint Georges Oswald: "Bei deenen 2 déidlech Blesséierten handelt et sech ëm Demineure vun der Arméi, déi am Gaange waren, d'Granat fir den Transport virzebereeden. Bei den 2 Blesséierten handelt et sech och ëm Ënneroffizéier vun der Arméi." Déi 2 Blesséiert ware deemno keng Demineuren, mä einfach Ënneroffizéier, déi um Waldhaff waren, fir Equipement sichen ze goen.

De ganze Virgank en Donneschdeg de Moie war eigentlech eng Routine-Prozedure, wéi den Chef d'État-major vun der Arméi Alain Duschène beschreift: "Dat ass een normale Routine-Virgang. Wa mir op den Terrain ginn an esou Bomme kollektéieren, déi huele mir mat an déi ginn do preparéiert, fir dann an der Belsch neutraliséiert ze ginn. Dat heescht, dat do ass ee Virgank, dee mir mat anere Bomme vun deem do Typ schonn x-mol gemaach hunn. An elo musse mer erausfannen, firwat dat doten hei elo sou geschitt ass."

Aen- an Ouerenzeien no war d'Explosioun kilometerwäit ze héieren.

Bei der Granat kéint et sech RTL-Informatiounen no ëm Munitioun fir d'M115 203 mm Howitzer handelen, déi dacks an der Ardenneschluecht agesat gouf.

Fändelen op Hallefmast
Nom déidleche Virfall um Waldhaff ass de Verdeedegungsminister François Bausch e Freideg de Moien an der zoustänneger Chamberkommissioun, fir d'Deputéiert ze informéieren.

D'Police deelt iwwerdeems mat, datt aus Solidaritéit an aus Matgefill fir déi Hannerbliwwen d'Fändele virun all Policegebai op Hallefmast gehaange ginn.



Um Site vum Munitiounsdepot vun der Arméi war jo en Donneschdeg de Moien eng Granat aus dem zweete Weltkrich explodéiert. Zwee Leit sinn ëmkomm an zwou Persoune goufe verwonnt.



Pressekonferenz amplaz Visitt
D'Spëtzt vun der Arméi an de Minister François Bausch waren um Donneschdeg de Moien ënnerwee fir eng Visitt an der Belsch bei d'Pilote vum Militärfliger, dee Lëtzebuerg jo matkaf huet an d'nächst Joer soll geliwwert kréien. Déi Visitt gouf nom Incident um Waldhaff direkt annuléiert.

© Ryck Thill


Op enger Pressekonferenz en Donneschdeg de Mëtteg hunn den Arméiminister François Bausch, de Chef d'État-major Alain Duschène an de Procureur d'État adjoint Georges Oswald geschwat an iwwer de Virfall informéiert.

De Minister huet Familljen a Frënn vun den Affer säi Bäileed ausgeschwat an och ugekënnegt, datt eng Gedenkzeremonie organiséiert géif ginn.

De Staatsminister Xavier Bettel, deen en Donneschdeg op Aarbechtsvisitt a Spuenien war, war natierlech och direkt iwwert déi tragesch Evenementer informéiert ginn.


De Premier Bettel iwwer de Virfall um Waldhaff





Et wär iwwregens déi éischte Kéier a senger 40 Joer laanger Carrière an der Arméi, dass eng Granat esou explodéiert ass, sot de Generol Alain Duschène op der Pressekonferenz.


Autopsie an auslännesch Experten
No den éischte Meldungen iwwer d'Explosioun en Donneschdeg de Moien hat de Parquet direkt d'Police technique (Spuresécherung), d'Police judiciare, Demineuren an e Médecin légiste op d'Plaz geschéckt.

Fir kee Risiko anzegoen a fir si mat Rou schaffen ze loossen, war e Sécherheetsperimeter ageriicht ginn.

Géint Mëtteg gouf dunn och eng Untersuchungsriichterin op d'Plaz geschéckt, déi d'Kompetenz hat, fir weider Mesuren ze huelen, dorënner notamment fir eng Autopsie vun de Verstuerwenen duerchféieren ze loossen an och fir auslännesch Experten ze nennen, fir erauszefannen, wéi et konnt zu dëser Explosioun kommen.

De Chef d'État-major vun der Arméi Alain Duschène: "De Fait ass, dass mer belsch Experten dohinner geholl hunn, fir wierklech sécherzestellen, dass näischt aneschters ka passéieren an dat ass jo den Ament am Gaangen. An dofir ass et méi kloer, e klenge Sécherheetsperimeter ze maachen, fir eben aus Sécherheetsgrënn sécherzestellen, dass net nach iergendeppes geschitt."

D'Enquête-Mesuren daueren den Ament op der Plaz nach un a wäerten och nach eng Zäitchen daueren. De Sécherheetsperimeter wäert och nach eng Zäitche bestoe bleiwen, confirméiert de Procureur d'État adjoint Georges Oswald.

Den Nico Graf vun der Plaz vun der Explosioun um 12 Auer





Explikatioune vum Claude Strotz (Police)



Interview mam Policespriecher Claude Strotz


Offizielle Communiqué vun der Regierung
Condoléances du gouvernement suite à l'incident tragique survenu au dépôt de munitions au Waldhof (14.02.2019)

Communiqué par: ministère d'État / Service information et presse du gouvernement

Suite à l'incident tragique survenu ce matin au dépôt de munitions au Waldhof, le Premier ministre, ministre d'État, Xavier Bettel, se montre profondément touché par le décès de deux membres de l'armée luxembourgeoise.

Xavier Bettel, en visite de travail à Madrid, s'est dit consterné: «J'ai été profondément choqué d'apprendre la nouvelle de cet événement tragique. Deux sous-officiers luxembourgeois sont morts dans l'exercice de leurs fonctions au service du pays. Deux de leurs camarades ont été blessés, dont un grièvement. Mes pensées vont aux victimes, à leurs familles et à leurs proches. Le gouvernement partage leur souffrance et se tient à leur côté en ce moment si difficile. Cet événement nous rappelle de manière brutale les dangers auxquels s'exposent nos soldats au quotidien dans le cadre des missions qu'ils exercent pour la défense de notre pays. Leur engagement mérite le plus profond respect de notre société entière.»

Au nom du gouvernement, le Premier ministre présente ses sincères condoléances aux familles et proches des victimes.

De Site vum Munitiounsdepot um Waldhaff (14.02.2019)
Biller vu Google Earth


Offizielle Communiqué vum Parquet
Communiqué du parquet de Luxembourg suite à une explosion au camp militaire à Waldhof

Vers 10h30 ce matin une explosion a eu lieu dans un hangar du camp militaire à Waldhof. A ce moment quatre personnes se trouvaient l’intérieur du hangar et étaient en train de manipuler un obus d’artillerie. Suite à l’explosion deux personnes sont décédées. Deux autres personnes ont dû être hospitalisées. L’une d’entre elles se trouve dans un état critique.

Deux magistrats du parquet de Luxembourg sont sur place pour mener l’enquête.



Offizielle Communiqué vun der Cour grand-ducale

Communiqué de presse

Son Altesse Royale le Grand-Duc, Chef de l’Armée, est consterné et très touché par l’incident tragique de ce jour qui a coûté la vie à deux sous-officiers de l’armée luxembourgeoise dans l’exercice de leur mission et en a blessé grièvement deux autres.

Le Grand-Duc et la Grande-Duchesse sont en pensées avec les victimes, leurs familles et leurs proches. Ils partagent leur souffrance et rendent hommage au dévouement de ces quatre militaires.

C’est avec une grande émotion qu’ils présentent leurs condoléances aux familles et aux proches très durement éprouvés par ce malheur qui touche la nation toute entière.


Déidlechen Tëschefall (5. November 2012)

An deem Depot vun der Arméi um Waldhaff hat et schonn am November 2012 ee schroen Tëschefall ginn.

Een Zaldot war op der Garde déidlech vun enger Kugel an de Bauch getraff ginn, well d’Sécherheet-Dispositiounen net respektéiert gi waren.

Eng Persoun war 2015 wéinst Homicide involontaire zu zwee Joer Prisong veruerteelt ginn.

© RTL-Archiv