Lëtzebuerger vum JoerALS-Patientin Nathalie Scheer a Polizist Marcel Steffen

D'Nathalie Scheer setzt sech trotz schroer Krankheet fir en "wäertvollt Liewen" an an de Marcel Steffen huet e Chauffer aus engem Auto a Flame gerett.

Lëtzebuerger/in vum Joer 2016 (01.01.2017)
Ronn 3.000 Leit hunn op rtl.lu ofgestëmmt an hir Perséinlechkeete vum vergaangene Joer gewielt.
D'Decisioun ass gefall: Knapp 3.000 Leit hunn op RTL.lu ofgestëmmt an hir Perséinlechkeete vum vergaangene Joer gewielt.

Den Éierentitel "Lëtzebuergerin vum Joer 2016" geet un d'Nathalie Scheer. Si war mat dëser Begrënnung nominéiert ginn:

Si huet zanter 15 Joer ALS a setzt sech zesumme mat hirem Mann, dem Grënner vun der Asbl "Wäertvollt Liewen", fir déi Leit an, déi eng rar Krankheet hunn.

Stellvertriedend fir seng Fra, déi am Rollstull sëtzt a beotemt gëtt, huet hire Mann Jean-Marc Scheer de Präis entgéint geholl.

Reaktioun vum Jean-Marc Scheer



Iwwer den Hannergrond huet d'Nathalie Scheer via Computer matgedeelt:

Wir haben die gemeinnützige Organisation "Wäertvollt Liewen" gegründet, um ALS-Betroffenen zu helfen, die genau wie wir vor einigen Jahren auch durch die Hölle gehen müssen und nicht so viel Glück wie wir hatten. Unser Wunsch und Ziel ist es, hier in Luxemburg die für chronisch kritisch-kranke Menschen notwendige Infrastruktur Schritt für Schritt aufzubauen. Dazu gehören nicht nur ein persönliches Unterstützungsnetzwerk, eine ambulante Intensivpflege und ein angemessenes Wohnumfeld, sondern auch ein multiprofessionelles Therapiezentrum sowie auch die Möglichkeit einer stationären Kontrolle von Patienten, die genau wie ich daheim beatmet werden.

D'Nathalie an de Jean-Marc Scheer mat der Auszeechnung.© lm


Den Éierentitel "Lëtzebuerger vum Joer 2016" ass fir de Marcel Steffen. Hie war nominéiert gi well:

Huet enger Persoun d'Liewe gerett, well hie se aus engem Auto, dee gebrannt huet, geholl huet. Domadder huet hie vill riskéiert a vill Courage bewisen.

De Polizist hat mat Ofstand déi meeschte Stëmme kritt an huet sech iwwer d'Auszeechnung gefreet.

Reaktioun vum Marcel Steffen



De Marcel Steffen mat senger Auszeechnung.© RTL Télé Lëtzebuerg - Vidosava Kuzmic


RTL felicitéiert dem Nathalie Scheer an dem Marcel Steffen ganz häerzlech a seet och alle Useren, déi entweder e Kandidat proposéiert hunn an/oder duerno fir een ofgestëmmt hunn, en häerzleche Merci!



Zanter e puer Joer gëtt d'Lëtzebuergerin an de Lëtzebuerger vum Joer getrennt gewielt. Interessant un der Ausgab 2016 ass awer, datt en Overall-Ranking 2 Dammen an den Top 3 gehat hätt:

1) Marcel Steffen
2) Nathalie Scheer
3) Chantale Geisen

2013 war d'Nathalie Scheer iwwregens schonn eemol nominéiert ginn a war deemools op déi zweete Plaz komm.

Hei d'Top 5 vun de getrennten Ofstëmmungen:

D'Top 5 vun den Dammen:

1) Nathalie Scheer
2) Chantale Geisen
3) Laura Correia
4) Luisa Mendes
5) Denise Hengel-Franzen

D'Top 5 vun den Hären:

1) Marcel Steffen
2) Olivier Ferber
3) Alain Frantz
4) Roy Poutsy
5) Lucien Welter

Hei wien alles nominéiert war.

D'Schicksal vum Nathalie Scheer war och schonn an engem Kloertext thematiséiert ginn an d'Rettungsaktioun vum Marcel Steffen war och schonn eng Kéier am Live Planet People.

Kloertext: E Recht op Fleeg an Dignitéit?! (17.10.2016)
Eng Reform soll d'Fleegeversécherung ofsécheren a Qualitéit garantéieren, ouni ze spueren! Geet dat?

Eng Reform soll d'Fleegeversécherung ofsécheren a Qualitéit garantéieren, ouni ze spueren! Geet dat?



Live! Planet People (22.11.2016)
De Marcel Steffen huet dem Domenico Biasi no engem Accident d'Liewe gerett. D'Annick an de Christian Wolfers hunn zesumme mam Sylvie Meis e Pubspot gefilmt.


Déi 2 Laureaten 2016 kruten iwwregens e Konschtwierk vum Sandra Biewers iwwerreecht: Eng wäiss Blumm mat an der Mëtt engem Léif dran ... D'Kënschtlerin huet iwwregens och déi nei RTL-Tasen designed.

D'Sandra Biewers


Hei nach eng Reaktioun vum Nathalie Scheer, déi via Aebewegungen iwwer e spezielle Clavier geschriwwe gouf:

als praesidentin vun wäertvollt liewen, fannen ech et een sou wichtegt signal, dat een behennerten an chronesch kritesch kranken mensch wei ech, zu der letzebuergerin vum joer 2016 gewielt gouf. dest stellt fir eis den grondsteen fir een glaichberechtegt deelhuelen um liewen fir jidfereen duer, ob lo behennert oder net, krank oder gesond ...
dat mecht mir hoffnung fir d'zukunft, dat d'uno-behennertenrechtskonventioun emgesaat gett an esou och d'bedürfnisser vun chronesch kritesch kranken menschen berücksichtegt ginn.
ech huelen des auszeechnung am numm vun allen kranken an/oder behennerten menschen ganz gäeren un. mir hunn den numm „wäertvollt liewen" gewielt fir als geigensatz zum begreff „unwertes leben" aus dem nazi-regime. mat mir wier, sou mengen ech mol, deemols kuerzen prozess gemaach ginn, obschons ech mein liewen als liewenwert ugesinn an mat freed meng verantwortungen am liewen iwerhuelen.
ech soen allen leit een groussen merci, dat sie mech gewiellt hunn. ech soen awer och een groussen merci un meng famill dei mech emmer ennerstetzt huet, un meng pärelen ouni dei naischt geing goen an un all d'memberen an frenn vun wäertvollt liewen. ech wenschen jidferengem een wonnerbart an scheint neit joer, ...
merci,
nathalie



Wéi ass de Vote ofgelaf?

Am Ufank konnten d'Leit op RTL.lu Kandidate proposéieren. Aus bal 200 Proposen, déi eis Ufank Dezember erageschéckt goufen, hu mir allkéiers 12 Fraen an 12 Männer zeréckbehalen. Souwuel bei der Lëtzebuergerin wéi och beim Lëtzebuerger vum Joer hat duerno jidderee 6 Stëmmen. Eng Persoun konnt der maximal 3 kréien, dofir hate mir proposéiert, datt Äre Favorit der 3 kritt, Ären zweete Choix der zwou an Ären 3. Choix eng. Et huet een awer net mussen all seng Stëmme verginn an et huet een och net musse bei de Fraen an de Männer ofstëmmen.

Wéi konnt ee matmaachen?

Knapp 3.000 Leit hu bei der Wiel vun der Lëtzebuergerin an dem Lëtzebuerger vum Joer matgemaach, domat bleift d'Ofstëmmung populär, och wa si net no statistesch-wëssenschaftleche Critèren duerchgefouert gouf a just representativ fir d'Utilisateure vun RTL.lu ass.

Fir matzemaachen, huet een en Account op RTL.lu gebraucht an da konnt een och eppes gewannen: 2 Samsung Galaxy S7 edge silver an 1 Samsung Galaxy Tab Pro S 128GB offréiert vun der Post. Wien déi glécklech Gewënner sinn, deele mer am Laf vun der nächster Woch mat. Si ginn dann och direkt kontaktéiert.

Wie krut bis elo den Titel "Lëtzebuergerin" a "Lëtzebuerger vum Joer"?

2015: Yasmine Grisius (posthume Präis) a Jean Asselborn
2014: Noémie Siebenaller a Camille Arend - posthume Präis (déi 2 Mataarbechter vun "Le soleil dans la main" ware bei engem Fligeraccident ëm d'Liewe komm)
2013: Sylvie Conter (Riichterin) a Gaston Vogel (Affekot)
2012: Eliane Leger (Infirmière) a Romain Hilbes (Buschauffer a Liewensretter)
2011: Xavier Bettel
2010: Andy Schleck
2009: Andy Schleck
2008: Jean-Claude Juncker

Eréischt zanter 2012 ginn d'Lëtzebuergerin an de Lëtzebuerger vum Joer an zwou getrennten Ofstëmmunge gesicht.

Am Réckbléck:

RTL-NEWS: Lëtzebuerger vum Joer 2015: Polizistin Yasmine Grisius an Ausseminister Jean Asselborn
http://www.rtl.lu/letzebuerg//749533.html

RTL-NEWS: Lëtzebuerger vum Joer 2014: Noémie Siebenaller a Camille Arend gewielt
http://www.rtl.lu/lifestyle/people//595450.html

RTL-NEWS: Lëtzebuerger vum Joer 2013: Sylvie Conter a Gaston Vogel sinn d'Lëtzebuerger vum Joer
http://www.rtl.lu/lifestyle/people/498429.html

RTL-NEWS: Lëtzebuerger vum Joer 2012: Eng Infirmière an e Buschauffer - Eliane Leger a Romain Hilbes
http://www.rtl.lu/letzebuerg/371125.html

RTL-NEWS: Xavier Bettel heescht de "Lëtzebuerger vum Joer 2011"
http://www.rtl.lu/letzebuerg/177199.html

RTL-NEWS: De "Lëtzebuerger vum Joer 2010" heescht Andy Schleck!
http://www.rtl.lu/letzebuerg/90553.html

RTL-NEWS: RTL.LU: Andy Schleck heescht de Lëtzebuerger vum Joer 2009
http://www.rtl.lu/letzebuerg/54111.html

RTL-NEWS: RTL.LU: De Jean-Claude Juncker ass de Lëtzebuerger vum Joer 2008
http://www.rtl.lu/letzebuerg/3758.html

- - - - -
Klengen Appell un eis Commentateuren:

Dat Neit Joer ass jo nach ganz frësch, dofir sech net direkt ewell bei der éischter Nouvelle d'Käpp aschloen, ma w.e.g. mat e bësse Respekt a Sensibilitéit op de Vote reagéieren - och wann ee vläicht aus iergendengem Grond selwer enttäuscht ass ... Natierlech dierf een eppes gutt oder schlecht fannen, ma d'User hu proposéiert an decidéiert, jidderee konnt do matmaachen ... Merci fir Är Kooperatioun an Är Contributioun, datt den Debat serein bleift.

An all Guddes fir 2017 :-)

- - - - -

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.