NeijoerschdagVerréckt Traditioune ginn et op der ganzer Welt

Op Neijoerschdag ginn et op der ganzer Welt flott Traditiounen an och verréckt Aktiounen, déi net gard alldeeglech sinn.

Reportage: verréckten Aktiounen op Neijoerschdag (02.01.2018)
Wat mécht een den Dag no Silvester. Raschten, wann ee kann.

Oder et spréngt een an en äiskale Séi. Verréckt Saache fir d'Neit Joer ginn et net nëmmen an den USA, mee och op villen anere Plazen op der Welt. 

Ugefaange mat der „Bella Italia“. Fir den 1. Januar hu sech zu Roum couragéiert Männer vun enger Bréck an de Floss „Tiber „ gehäit. Bei den äisegen Temperaturen ass dëst net esou evident. Et ass eng Traditioun, déi et schonn zanter 1946 gëtt. 4 Stéck hu sech dëst Joer getraut, fir déi 30 Meter erofzesprangen, déi eng mat méi, déi aner mat manner Stil, wat gezielt huet, war d’Ambiance.

Zu Berlin konnt ee fir déi 47. Kéier een un engem 6 Kilometer-Laf deelhuelen, vum Brandenburger Tor bis bei d’Kathedral an nees zeréck. Dëse Laf soll Gesondheet a virun allem vill Gléck an deem neie Joer bréngen, esou waren dann och dausende vu Léit op där 47. Editioun dobäi. Verschiddener waren dann awer och mat engem décke Kapp um Depart, wat zielt, si jo nach ëmmer déi gutt Virsätz.

Zu Paräis goung et héich erop, an zwar op d’Diecher vun der Tour de Montparnasse. Op deem héchsten Héichhaus vu Paräis konnt een e puer Deeg laang eng super Vue genéissen, andeems een op 210 Meter héich um Trampolin gesprongen ass. Eng flott Aktivitéit, déi awer definitiv näischt fir Léit ass, déi net schwindelfräi sinn.

An Nord Frankräich zu Malo-les-bains kann ee fir Neijoerschdag an d’Waasser lafen. Wat hei zielt, ass eng faarweg Verkleedung an natierlech gutt Laun. Bei enger Waassertemperatur vun 9 Grad ass et net evident an awer hu sech 450 Léit um 1. Januar an d’Mier gestierzt. Als Belounung krute se dono eng waarm Ënnenzopp, also avis aux amateurs.

An da sollt der net gewosst hunn, wat een esou ëm Neijoerschdag maache kann, wéi wär et da mat engem Masse-Bestietnes. An Indonesien, zu Jakarta, hu sech ganzer 437 Koppelen um Mëtternuecht bestuet. Eng riseg Zeremonie huet et hei deenen erlaabt sech ze bestueden, déi finanziell net esou gutt dru sinn an heiduerch gëtt d’Bestietnes dann offiziell unerkannt. Also nach eemol, alles Guddes am neie Joer 2018.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.