Dikrecher Kavalkad"Eselen" a Gecke mat Bus an Zuch an de Cortège

Den Nohaltegkeetsministère deelt mat, datt de Staat keng Privatnavettë méi finanzéiert.

Op Fuessonndeg gëtt déi 39. Editioun vun der Dikrecher Kavalkade lancéiert, woufir sech bis zu 20.000 Fuesgécken an d'Sauerstad deplacéieren.

Am Virfeld goufen et awer organisatoresch Onstëmmegkeeten tëscht den Organisateuren, der Asbl "Eselen aus der Sauerstad Dikrich" an dem Nohaltegkeetsministère, well verschidden Navetten, déi soss co-finanzéiert goufen, aus Käschtegrënn gestrach goufen. Dëst gouf bedauert an d'Leit gefrot, fir méi Zäit anzeplangen, fir op Fuessonndeg op Dikrech ze kommen.

Um Mëttwoch reagéiert de Ministère a präziséiert, datt zejoert ewell d'Organisateure vu grousse Manifestatiounen drop higewise gi wieren, datt keng Privatnavetten méi géife vum Staat finanzéiert ginn.

De Ministère wëll awer de Frënn vun der Kavalkad entgéintkommen, sou datt den Takt vun de Linnebussen tëscht der Ettelbrécker Gare an Dikrech grad wéi och d'Zuchverbindungen an d'Sauerstad an d'Luucht gesat goufen - massiv wéi et heescht!

Och fir aner grouss Evenementer wëll de Staat dës Zervisser garantéieren, sou nach de Minister Bausch a sengem Schreiwes.

PDF Schreiwes vun den Eselen aus der Sauerstad Dikrich Asbl

Hei dat offiziellt Schreiwes vum Ministère:


Reaktioun vum Ministère fir nohalteg Entwécklung an Infrastruktur op de Communiqué vun der Eselen aus der Sauerstad Dikrich ASBL (31.01.2018)

Communiqué par: ministère du Développement durable et des Infrastructures


Als Reaktioun op de Communiqué vun den Organisateuren vun der Dikricher Cavalcade weist de Ministère fir nohalteg Entwécklung an Infrastruktur drop hin, datt d’Organisateure vu jährleche grousse Manifestatiounen schonn 2017 drop higewise gi sinn, datt keng Privatnavettë méi vum Staat géife finanzéiert ginn. Dëst ass och an engem Bréif ugangs Januar un d’Eselen aus der Sauerstad Dikrich nach emol schrëftlech confirméiert ginn.


Fir de Frënn vun der Cavalcade awer entgéint ze kommen an hinnen e séchere Réckwee ze garantéieren, huet de Ministère suwuel den Takt vum Liniëbus vun der Ettelbrécker Gare op Dikrech wéi och den den Takt vum Zuch massiv an d’Luucht gesat.

Dës Zervisser am Intérêt public wärten dann och bei anere grousse Manifestatiounen an Zukunft esou vum Staat assuréiert ginn.


Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.