LIVETICKER, VIDEO a VILL FOTOEND'Meghan Markle an de Prënz Harry si bestuet

E Samschdeg den 19. Mee sinn de Prënz Harry an d'Meghan Markle um Schlass Windsor bestuet ginn. Mat RTL.lu verpasst Dir kee Moment, sidd LIVE mat derbäi!

Zanter Méint féiweren dausende Royalisten op der Welt dem Mega-Event op der britescher Insel entgéint, der Hochzäit vum Joer. De Prënz Harry an déi amerikanesch Actrice Meghan Markle, déi sech vun haut un Duchesse of Sussex nenne kann, hu sech haut zu Windsor an der Saint Georgs-Kapell d'Jo-Wuert ginn.

D'Draamhochzäit vum Joer a Bild an Toun (19.05.2018)
D'Monique Kater huet den Dag vun der royaler Hochzäit fir eis zesummegefaasst.
De Gottesdéngscht war eng Mëschung aus der anglikanescher Traditioun an afroamerikaneschen Elementer. E Gospelchouer huet de Soul-Klassiker "Stand by me" gesongen an de schwaarze Paschtouer Michael Curry, de Chef vun der anglikanescher Kierch an den USA huet a senger Ried ënnert anerem de Martin Luther King zitéiert.

D'Braut hat e schlicht, modernt laangt Kleed aus rengem wäiss bis op de Buedem a mat laanger Schleef  vun der britescher Designerin Clare Waight Keller aus dem franséischen Haus Givenchy un. Um Kapp eng Tiara déi d'Queen Elizabeth déi II hir geléint hat. Si gouf vum  Prënz Charles bei den Altor gefouert well hir Papp nëmmen e puer Deeg virun der Hochzäit no enger Operatioun an engem Skandal ëm Paparazzi-Fotoen ofgesot hat.

De Prënz Harry ass an enger däischterer Paradeuniform virun den Altor getrueden. Ënnert de 600 Gäscht an der Kapell vum Schlass Windsor waren nieft der kinneklecher Famill, vill bekannte Perséinlechkeeten aus der Filmbranche, der Musek oder der Sportswelt wéi den Elton John, de George Clooney, d'Oprah Winfrey oder den David Beckham. Am Park virum Schlass hunn méi wéi 2500  Invitéeën d'Zeremonie um groussen Ecran suivéiert. An der oppener Kutsch ass et duerno duerch d'Stroosse vu Windsor gaange wou sech zéngdausende Leit versammelt hate fir d'Brautkoppel ze feieren.

D'Hochzäitsfeier ass, ouni Kamera, hannert zouenen Dieren am Schlass Windsor.

De Prënz Harry an d'Meghan Markle no hirer Hochzäit um Wee op d'Hochzäitsfeier am enke Krees. © afp
Um 20 Auer war dunn déi eigentlech Hochzäitsfeier mam Iessen am Frogmore House, an dat just fir den enkste Familljen- a  Frëndeskrees. Den Harry an d'Meghan si ganz stilvoll an engem bloe Jaguar vu Windsor aus dohi gefuer.

© afp


Liveticker Alles uweisen


Ëmfro


E puer Detailer
Den Dresscode: Ëmmer nees ee vun den Haaptsujete bei enger royaler Hochzäit: Wéi sinn d'Invitéeën ugedoen? Passt den Hutt bei de Rack? Wéi dierf ee sech iwwerhaapt undoen? Genee dofir huet de Kensington Palace en Dresscode verschéckt.

Bei den Dammen ass den Hutt e Must an den allgemengen Dresscode dierf kee Fashion-Fauxpas sinn, dat heescht et soll filigran sinn. Räck a Juppe solle bis bei de Knéi goen an et "muss" en Nylonscollant drënner sinn. D'Schëllere musse bedeckt sinn. Bei de Männer soll et e Kostüm mat Krawatt sinn.

Wéi bei Hochzäiten üblech, dierfen d'Damme sech net wäiss kleeden an och net komplett schwaarz. Bei de Männer soll et dogéint kee beige oder crème-faarweg sinn. Fir owes ass den Dresscode schreift den Dresscode buedemlaang Cocktail-Kleeder, Frack oder Smoking vir.

E Picknick beim Schlass:
Gefeiert gëtt awer net just mat der Famill an de Frënn, déi royal Koppel huet donieft nach 2.640 Leit aus dem Vollek op hir Hochzäit um Schlass Windsor invitéiert. Ënnert den Invitéë si Mataarbechter aus Associatiounen, Schoulkanner an och Employéeën aus dem Kinnekshaus. 

Op e Stéck vum Hochzäitskuch dierfen déi Leit awer net hoffen, si goufe gebieden, sech hire Picknick selwer matzebréngen. Op der Plaz ginn et just kleng Erfrëschungen a Snacks. D'Iddi vun der Koppel war et, mat där Aktioun fir eng "familiär Atmosphär" am Park vum Schlass Windsor ze suergen.




Fräi Nuecht: Den 19. Mee soll ville Leit als besonneschen Dag an de Käpp hänke bleiwen, en Dag, wou uerdentlech gefeiert dierf ginn. Dowéinst gouf d'Spärstonn vun de Caféen a Puben an der Nuecht op e Sonndeg ëm 2 Stonnen, respektiv op 1 Auer, verlängert.

Den Hochzäitsmenü: Bekannt war jo schonn, wéi eng Taart sech d'Koppel an der renomméierter Patisserie "Violet Bakery" erausgesicht huet. Zerwéiert gëtt eng Bio-Taart aus Zitrounen an Hielenner mat Bottercrème a richtege Blummen als Deko, déi "liicht Aromae vu Fréijoer" am Kensington Palace solle verstréimen.


Beim Menü huet sech d'Koppel fir ganz klassesch Platen decidéiert mat saisonalem Geméis aus der Regioun, sou vill huet de kinnekleche Kichechef scho verroden. De Prënz a seng Zukënfteg hätten och sämtlech Menü-Propose geschmaacht, ma op wat genee si sech festgeluecht hunn, bleift geheim, just souvill: D'Schnittercher musse sou preparéiert sinn, dass ee just 2 Mol muss dra bäissen.


Hochzäitsfotoen: De Moudefotograf Alexi Lubomirski steet bei der royaler Hochzäit hannert der Kamera. Hien hat d'Koppel scho bei hirer Verlobung fotograféiert.

Regional Blummen: Och bei de Blummen ass gewosst, wien den Optrag kritt huet, d'Floristin Philippa Craddock. D'Harry an d'Meghan wëllen, dass d'Kapell an d'Hal mat saisonale Blummen aus der Regioun dekoréiert ginn, dat heescht vill wëll Wiseblummen, wäiss Rousen a Päischtrousen.

© Twitter / Kensington Palace

Kinneklech Käschten: Virop, ëm déi direkt Käschte vun der luxuriéiser Feier muss de britesche Steierzueler sech keng Suerge maachen. Dat britescht Kinnekshaus huet annoncéiert, sämtlech Rechnungen ze bezuelen. Eleng d'Ausgabe fir d'Feierlechkeete gi vun Experten op 1,9 Milliounen Euro geschat. D'Käschte fir den Hochzäitsrack, respektiv béid Räck, an d'Hochzäitsrees wëllen de Prënz Harry a seng zukënfteg Fra selwer bezuelen.

Allerdéngs mussen d'Brite fir déi enorm Käschten ëm d'Sécherheetsmesuren an d'Täsch gräifen. Wéinst der akuter Terrorgefor an de rassistesche Menacë géint d'Meghan Markle sollen dës Käschten nämlech däitlech méi héich, si wéi bei der Hochzäit vum Prënz William mam Catherine. De Staat hat dat ronn 7 Milliounen Euro kascht.

Keng Kaddoen: Amplaz vun Hochzäitskaddoen huet d'Koppel e ganz besonnesche Wonsch, si hunn d'Leit opgefuerdert u 7 ONGen ze spenden. Déi erausgesichten Organisatiounen engagéiere sech an ënnerschiddleche Beräicher: ënnert anerem fir Sans-Abrisen, Weesen, HIV-Infizéierter a Fraen aus indesche Slums.


Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.