Bis si doheem waren2 Deeg eleng am Bësch: Pitbull beschützt 2 Joer aalt Meedchen

Dat klengt Charlee hat sech am Bësch verlaf a war 2 Deeg laang net ze fannen. De Pitbull vun der Famill huet d'Meedche beschützt.

© Mike Fussell Facebook
D'Police, d'Noperen, d'Famill... Jiddereen huet 2 Deeg laang nom 2 Joer jonke Charlee gesicht. Dat klengt Meedche war en engem Bësch am US-Bundesstaat Kentucky, net wäit vun do, wou hatt mat senger Groussmamm lieft, verschwonnen. Et war awer net eleng fort.

D'Charlee war wuel an de Bësch gelaf an d'Penny ass him nogelaf, ebe fir op seng kleng Frëndin opzepassen. An obwuel de ganze Sichtrupp d'Charlee net erëmfanne konnt, ass d'Meedche gesond a monter erëm doheem opgetaucht.




An dofir gëtt et just eng Erklärung: de Pitbull Penny, do ass sech d'Beth Campell, d'Groussmamm vum Charlee sécher. D'Penny huet dat kleng Meedchen net eleng gelooss, bis et nees sécher doheem ass. Leschte Samschdeg ass d'Penny am Gaart vun engem Noper opgetaucht, deen dem Meedchen dunn direkt eppes ze drénke ginn an d'Police alarméiert huet. Kuerz éier dësen Uruff koum, ass d'Penny och erëm doheem opgetaucht.

"Hatt ass eisen Held", sot d'Beth Campel der amerikanescher Tëlee. "Ech si mer sécher, datt d'Penny an den zwee Deeg am Bësch op d'Charlee opgepasst huet. Wéi mäi Bébé net doheem war, ass mäin Hond och net heem komm. Hat huet dat Klengt net eleng gelooss, bis et nees hei war."

D'Charlee koum an d'Spidol a gouf ënnersicht, ma ausser, datt d'Meedchen e bëssen dehydratéiert war, huet him net vill gefeelt. De Mupp dogéint krut an där Zäit eng säfteg Belounung: Esou vill Hamburger, wéi d'Penny iesse konnt. Ëmmerhinn ass dat säi Liiblingsiessen.

Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.