SesamstraßeErnie a Bert homosexuell oder net? Auteur zitt Ausso nees zeréck

Den Ernie an de Bert sinn eng Koppel, dat huet den Dréibuchauteur Mark Salzman an engem Interview behaapt. Kuerz drop huet hien d'Ausso nees zeréckgezunn.

© AFP
Fir vill Leit si si d'Helden aus hirer Kandheet, en Auteur vun der Kannersendung huet elo ausgesot, dass hie si ëmmer als homosexuell Koppel gesinn huet. Si streide mateneen, si maache sech géigesäiteg rosen a schlofen zesummen an enger Kummer. Ob si do och zesumme kuschelen, ass zwar net gewosst, ma an der Schwulebeweegung ziele si scho laang zu Ikonen.

Schonn dacks koum d'Fro op: Sinn den Ernie an de Bert dann elo homosexuell oder einfach just WG-Kollegen?

An engem Interview mat der US-Online-Zeitung "Queer" huet de laangjärege Sesamstraße-Auteur Mark Salzman zouginn, dass hie d'Sesamstraße-Figuren ouni Hannergedanken als homosexuell Koppel verstan huet. Hie wier selwer schwul. Säi Liewenspartner an hie wiere souguer dacks als "Ernie a Bert" ugeschwat ginn. D'Figure wiere vu senger eegener Bezéiung inspiréiert.

Antëscht huet de Salzman nees zeréckgeruddert. Dat kéint och un engem Tweet vu "Sesame Workshop" leien, an deem et heescht, et hätt een nach ëmmer betount, dass den Ernie an de Bert näischt anescht wéi bescht Kollege wieren. Et géif sech hei ëm Poppen ouni sexuell Orientéierung handelen.




De Mark Salzman huet an den 80er Joren ugefaange fir d'Sesamstraße ze schaffen, do gouf et d'Figuren Ernie a Bert schonn iwwer 10 Joer. An där Zäit hat den Auteur och säi Coming-Out.

Gerüchter, dass den Ernie an de Bert eng homosexuell Koppel wieren, gouf et schonn dacks. D'Figure gehéieren zu de Populäersten an der Sesamstraße. Den Ernie ass dacks naiv a kannereg, de Bert verkierpert déi streng Stëmm, déi dem Ernie seng geckeg Iddien ënnerbënnt.