ÉisträichBunn-Mataarbechter rette Gems aus Schnéimassen

De Moment ginn Éisträich a Bayern am Schnéi ënner an net nëme de Mënsch huet domat ze kämpfen, och d'Déieren hunn et net einfach.

En Häerz fir Déieren hunn e puer ÖBB-Mataarbechter en Dënschdeg bewisen, wéi si enger Gems aus dem Schnéi gehollef hunn. Hir Aktioun gouf gefilmt an op de sozialen Netzwierker gedeelt.

Et muss ee scho wierklech gutt gekuckt hunn, fir iwwerhaapt z'erkennen, dass do en Déier am Schnéi gefaangen ass. Um Video ass ze gesinn, dass just nach d'Spëtzte vun den Haren aus dem Schnéi geluusst hunn an d'Déier aus eegener Kraaft net méi do erauskomm ass. Dat war awer 2 Bunn-Mataarbechter opgefall, déi mat engem speziellen Zuch de Schnéi vun de Schinne op der gespaarter Streck tëscht Admont an Hiefllau geraumt hunn. Den Zuch gouf extra nach emol zeréckgesat a mat 2 Schëppen si si dem Déier zur Hëllef gaang.

Nodeems d'Gems hir lescht Kraaft nach emol mobiliséiere konnt, huet si sech mat wackelege Been dovugemaach. De Video gouf schonn iwwer 6.400 Mol gedeelt a suergt bei ville Leit fir Begeeschterung.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.