FilmweltNo der 3D kënnt elo d'4DX an de Kino

No Bangkok, LA, London oder Seoul, kann een elo zu Paräis dës nei Experienz am Kino erliewen. Et war een nach ni so déif an engem Film dran.

© 4DX
D'4DX Technologie ass a Südkorea entwéckelt ginn a proposéiert de Spectateuren e ganz staarkt Erliefnis. All d'Sënner ginn hei stimuléiert, d'Limitte vum Toun a vum Bild goufe praktesch eliminéiert. Hei kritt ee Kino ugebueden, deen aus dem Ecran eraus kënnt.

Den éischte Kino mat engem 4DX Sall fënnt een um leschte Stack vum Akafszenter Vill'Up an der Cité des Sciences et de l'Industrie vu Paräis am Pathé La Villette. Hei gëtt et och den éischten IMAX Sall an den Dolby Atmos Toun zu Paräis.

Dëse 4DX Sall vum Pathé La Villette ass mat mobile Sëtzer equipéiert, wou een och Wand, Reen, Niwwel, Schnéi, Damp, Geroch a Luucht a perfekter Synchronisatioun mam Film erliewe kann.
© 4DX

D'Animatioun am Sall krut eng speziell Choreographie gebaut déi genee zu deem passt, wat um Ecran geschitt. Esou ginn d'Sëtzer no vir a Loft gëtt op d'Leit geblosen am Fall vun enger Actionzeen an engem Auto fir d'Vitesse ze simuléieren.


Déi 370 Säll op der Welt déi mat 4DX fueren, proposéiere schonn di grouss Blockbusters vum Moment, dat duerch eng enk Zesummenaarbecht tëscht der südkoreanescher Firma an de groussen amerikanesche Studioe wéi Universal, Sony, Walt Disney, Paramount, Fox oder och nach Dreamsworks. Déi Filmer déi an deem Format gewise ginn, fënnt een ënnert anerem Logan, Kong: Skull Island, The Beaty & the Beast, Ghost in the Shell oder och nach Fast & Furious 8.
© 4DX

De 26. Abrëll kënnt nach Guardians of the Galaxy Vol.2 bäi an de 24. Mee ass den Jack Sparrow mat sengen Pirates of the Carrabean: The Revenge of Salazar och an der 4DX ze erliewen. Eng kleng Rees op Paräis wier da vläicht eng gutt Iddi fir all Fan vun Action um an ronderëm den Ecran, fir Filmer mat engem décke Budget an enger anerer Versioun ze gesinn an ze spieren.

Et muss een allerdéngs mat engem Zouschlag vu 6€ rechne fir e Film an der 4DX Versioun ze gesinn, de Präis vum Film kënnt nach dobäi. E klenge Luxus fir e Film "hautno" erliewen ze kënnen.