Luxus-TounLouis Vuitton bréngt seng eege kabellos Kopfhörer eraus

De Fashion-Designer wëll och seng connectéiert Objete produzéieren, ugefaange mat Luxus-Kopfhörer am Stil vun den AirPods.

© louis vuitton
Dat franséischt Fashion-Haus Louis Vuitton probéiert, déi modern Welt vun der Technologie mat Luxus ze beaflossen a lancéiert deemnächst Kopfhörer ouni Kabel, déi wéi een In-ear-System funktionéieren.

D'Inspiratioun dofir huet ee wuel bäi Apple fonnt, déi kalifornesch Mark hat hir AirPods 2016 op de Maart bruecht. Allerdéngs proposéiert Louis Vuitton seng Kopfhörer-Léisung fir de Präis vun engem iPhone, déi kleng Bijoue si fir 995$ ugekënnegt, dat si ronn 870€.

Vill Hype fir ee Produit, deen et u sech scho gouf: Et geet hei ganz einfach ëm de Modell MW07 vun der New Yorker Firma Master & Dynamic, deen d'lescht Joer erauskoum fir de Präis vun 299$ (263€). Den Toun ass ultra präzis, an awer si 600€ fir e Logo schonn en intressante Fashion-Zouschlag.

Den "neie" Produit krut de Numm Horizon an ass natierlech a verschidden Designen ze kréien: schwaarz, wäiss, rout mam LV-Monogramm oder och nach giel a blo mat den LV-Sträifen.




Wat d'Autonomie ugeet, eng Charge geet duer, fir 3 an hallef Stonne Musek ze lauschteren. Bis zu 20 Stonne kéint se esouguer hale mat méi Chargen am Dag, wann een d'Këscht vum Produit mathëlt.

Uschléisse kann een den "Horizon"-System via Bluetooth, esou kann ee se mam Smartphone, Tablett oder Laptop benotzen, awer och geschwë mat enger connectéierter Auer, déi LV och deemnächst misst erausbréngen. Och hei mierkt een e ganz kloren Afloss vun enger kalifornescher Watch.

Fir béid Produite gouf et nach keen Datum annoncéiert.




Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.