Apropos vum Roland KaltéChance verpasst!

De Roland Kalté zerwéiert eis e puer Gedanken um gëllene Plateau. A besonnesch haut ass et derwäert, sech d'Zäit ze huele fir d'Wierder ze verdauen.

Apropos: Chance verpasst!


Op eemol stung se do, am Gank vum Bus. E flüchtege Bléck, nach een, e scheit Schmunzen, e Moment Spannung, e bëssen irritéiert hues de zréckgekuckt, zréckgeschmunzt, an dunn awer erëm an deng Zeitung gekuckt. An dunn, ... war s’erausgeklomm. Schued!

E Moment nit opgepasst, gezéckt, an d’Geleeënheet ass laascht. An du weess, déi kéint nit méi erëm. Ni méi! Vläicht, - jo – vläicht, mä – du wäers et ni erausfannen. Fort ass fort, laascht ass laascht. Eng zoufälleg Renconter, eng zoufälleg Joboffer, e gënschtegen Hauskaf, ...

Geleeënheete kënnen eist Liewen veränneren. Op eemol si se do, einfach esou, ouni Virwarnung, trëlle fatal an eist Liewen. Entweder mer huele se mam Schlawittchen, tjo – oder ebe nit. Si sinn dacks erëm fort esou séier wéi de Blëtz.

Eng Geleeënheet ass eng Versuchung, dacks e vaagt Verspriechen, stellt eppes an Aussiicht, dat mer nach nit kennen. A meeschtens wësse mer nit, ob s’och hält, wat se versprécht. Dofir eist Zécken. All Geleenheet huet zwou Säiten, fuerdert eng Entscheedung a besteet just fir eng gewëssen Zäit ...  huet also eppes wéi en Aaflaafdatum. An iergendeemol gëlt: Elo oder ni!

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.