Carte Blanche vum Marc SchiltzD‘Potential vum Site Belval nach besser notzen

De Site Belval ass d’Vitrine vun der Fuerschung zu Lëtzebuerg. Ma e stung an der Lescht och an der Kritik: Vill Studente fille sech na net doheem. Wéi een d‘Potential vu Belval nach besser notze kann - doriwwer eng Carte Blanche vum Marc Schiltz, Generalsekretär vum FNR:

Ëmmer nees komme Entrepreneuren, Fuerscher, Journalisten an Politiker aus dem Ausland op Lëtzebuerg, deene mir de Site Belval weisen mat den fonkelneien Infrastrukturen fir Fuerschung, Innovatioun an Universitéit. Si sinn an der Reegel begeeschtert vun dem Site, vun der symbolescher Verbindung tëscht der Vergaangenheet an der Zukunft vum Land. D'Stolindustrie, déi onsem Land iwwer Joerzéngte Prosperitéit bruecht huet, nieft modernster Fuerschung an Innovatioun, wat mer jo als en Standbeen vun onsem zukünftegen Wuelstand gesin. Nach viru kuerzem konnte mer ee vun den weltwäit beschten an renomméierste Materialfuerscher fir Lëtzebuerg gewannen. Ënnert anerem well hien iwwerzeegt ass, dass Belval him dat Ëmfeld bitt, wat e brauch, fir Top-Fuerschung ze bedreiwen.

Belval als Magnéit also. Fir international Top-Fuerscher unzezéien, awer och Investisseuren a Entreprisen. D’Potential vu Belval ass immens grouss an et gëllt dëst Potential an Zukunft nach méi staark ze notzen.

An der lescht wor de Site Belval méi dacks Thema an der Press, souguer an der auslännescher. Ma ënnert anere Virzeechen: Onglécklech Studenten, déi sech iwwert e Mangel u Liewen um Site bekloen. Gro, kal, keng Ambiance woren déi Stéchwierder, déi beim Micro-Trottoir am meeschte genannt goufen.

Ouni Zweiwel ass et wichteg, dass d'Studente sech um Belval Campus wuel fillen a gär nieft de Couren do Zäit verbréngen. An duerfir sollt een hinnen och dat gi wat se brauchen, wéi z.B. Studentelokaler, Studentecaféen, Méiglechkeete fir Sport ze maachen.

Et sollt een awer och net vergiessen, dat elo mol grad 9 Méint zënter der Aweiung vum Site vergaange sinn. D’Kand ass gebuer, mee dat heescht nach laang net, datt et schonn erwuessen ass. Eng Partie Gebaier sinn nach an Konstruktioun an eréischt een Drëttel vun den Studenten sinn iwwerhaapt schonns um Belval. Vergläichbar Sitten am Ausland sinn och net innerhalb vun e puer Méint zu deem ginn, wat se haut sinn. Mir sollten also net an déi typesch Lëtzebuerger Krankheet verfalen, fir alles vun vir eran schlecht ze rieden. Och sollten déi legitim Demanden vun den Studenten net derzou féieren fir Grabenkämpf tëschend Institutiounen ze veranstalten.

Belval ass jo och vill méi ewéi juste d'Uni Lëtzebuerg. Um Belval sinn och d’Centres de Recherche LIST, LISER an LIH mat hiren iwwer 800 Fuerscher, den Technoport, deen eng 30 Start-up Entreprisen beherbergt, d'Luxinnovation an den Fonds National de la Recherche. All déi Akteuren schaffen do zesummen mam Fonds Belval fir den Site zu engem eemolegen Fuerschungs- an Innovatiounsstanduert an Europa ze entwéckelen.

Wichteg ass et duerfir och, dee Site international adequat ze kommunizéieren a seng Symbolkraaft ze notzen, fir d’Lëtzebuerger Fuerschung – an domadder Lëtzebuerg – am Ausland nach méi bekannt ze maachen. An dësem Sënn hunn d‘Akteuren vun der ëffentlecher Recherche sech zesummegesat fir eng gemeinsam Marque z’entwéckelen. Lo gëllt et déi och ze notzen a mat Liewen ze fëllen.

Wie ugangs gesot, Belval huet e grousst Potential, als Vitrine vun der Lëtzebuerger Fuerschung an Innovatioun. De Site steet symbolesch fir d’Volontéit vum Land, an d'Zukunft z’investéieren. Dat, wat elo um Belval opgebaut gëtt, ass aussergewéinlech an ass e weideren Atout fir d’Land.

Loosst ons also roueg bësse méi houfreg drop sinn!

D'Carte Blanche vum Marc Schiltz



Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.