Carte blanche vum Jean HussE Green New Deal fir Europa

A senger Carte blanche plädéiert de Jean Huss, Ex-Deputéiert vun déi Gréng, fir en Enn vun der europäescher Krisen- an Austeritéitspolitik a fir eng ekologesch a sozial orientéiert Relance- an Investitiounspolitik.

Ronn 10 Joer nom Banken- a Finanzcrash vun 2008, dee vu kriminellen neoliberale Bankieren, Hedge-Fongen a Finanzoligarche verschëlt gi war, stécht d'Europäesch Unioun nach ëmmer an enger déiwer wirtschaftspolitescher a sozialer Kris.

Mä obschonns déi dereguléiert Finanzmarchéë mat all hiren onseriéise Kredit- a Spekulatiounsgeschäfter d'Haaptursaach vun der bis haut unhalender Wirtschaftskris waren an och bleiwen, hunn déi dominéirend konservativ neoliberal a sozialdemokratesch politesch Elitte vun der EU keng oder just falsch Léieren aus dëser schlëmmster Kris zanter 1929 gezunn:

D'Finanzmarchéë goufe kaum oder jiddefalls ongenügend nei reguléiert, esou dass haut de ganze Finanzspekulatiouns-Casino mat héich riskante Finanzblose monter weiderdréit. An ënnert der Dominanz an dem Diktat vun dem sougenannten "Eurogrupp" a speziell dem däitschen CDU-Finanzminister Schäuble gouf de Länner vun der Europäescher Unioun, an net nëmmen de Griichen oder de südlechen Euro-Länner, iwwert en absolut rigiden Stabilitéits- a Fiskalpakt eng desastréis Spuer- an Austeritéitspolitik diktéiert, déi bis haut vill Chômage, speziell Jugendchômage a wuessend Aarmut bewierkt huet. Mat als politesch Konsequenz d'Stäerkung vu rietspopulisteschen an antieuropäesche Bewegungen!

Mat dëser falscher an onsozialer Politik muss endlech, géint de Schäuble a seng konservativ Acolytten, Schluss gemaach ginn, fir datt de feelorientéierten EU-Projet net definitiv auserneebrécht!

Et gi ganz kloer Alternativen, formuléiert vum Europäesche Gewerkschaftsbond, vu keynesianeschen Ekonomisten oder vu gréngen a lénke Politiker.

Dës global a realistesch Alternative baséieren, just a Stéchwierder, op folgenden noutwendegen Haaptschwéierpunkten:

1. Eng schrëttweis erfolgend Neireguléierung vum Bankwiesen an de Finanzmarchéen. Banke sollen erëm der realer Wirtschaft an der Bevëlkerung déngen.

2. Eng Neiorientéierung vun der EU-Politik ewech vun aggressiver Steier- a Loundumpingspolitik a vu staatlecher Austeritéitspolitik, déi alle Memberstaaten zu gutt kennt.

3. Staark Lounerhéijungen a sozial Verbesserungen net eleng, mä virun allem a laangjärege Loundumpingslänner ewéi Däitschland, fir datt do déi europäesch Importer kënne klammen an et europawäit zu méi equilibréierten Aussenhandelsbilanze kënnt.

4. E schrëttweisen an deelweise Scholdeschnëtt zu Gonschte vun hoffnungslos verschëlten EU-Staaten, fir och do eng wirtschaftlech Reprise méiglech ze maachen.

5. A schlussendlech en neien a globalen ekologesch orientéierte Marshall-Plang, e Green New Deal fir Europa, fir den noutwendegen ekologeschen an energiepoliteschen Ëmbau an d'Moderniséierung vun ëffentlechen Infrastrukturen an d'Weeër ze leeden an doriwwer och de Chômage an d'Aarmut ze bekämpfen.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.