Commentaire vum Nico GrafDe wëlle Wielerwëllen

No de Wahlen ass virun de Wahlen. Mat de Gemengewahlen huet de Wahlkampf fir d'Chamberwahlen ugefaangen. Mä alles ass zimlech belibeg. Mengt den Nico Graf a sengem Commentaire.

De Commentaire vum Nico Graf



Wéinst menger, de Wieler ass also das unbekannte Wesen, dat mat force Sondagë muss elucidéiert ginn. An da gëtt et Prognosen an Explikatiounen. Wat awer glaskloer ze si schéngt, dat ass de Wielerwëllen, also deen no de Wahlen. An dat geet par déclaration. An zwar, Beispill vu virgëscht, de Wielerwëlle wier, soe se bei der DP, datt déi Liberal elo an der Stad mat der CSV koaléiere missten. Well, siehe oben, de Wielerwëllen hätt déi CSV gestäerkt.

Mä, wann Der erlaabt, kucke mer emol méi genee op dee Wielerwëllen.
Well deen huet villes gestiicht an der Stad. Virop, d'accord, huet hien déi Stater CSV-Leit – firwat och ëmmer – vu 19% op iwwer 25% gehuewen. An de Wielerwëllen huet gesot, datt zwou liberal Damme beschtgewielte Perséinlechkeete sinn. Obschonns deeselwechte Wielerwëllen der DP e puer Prozent an ee Sëtz ewechhëlt. Iwwerdeems de Wielerwëllen dem grénge Koalitiounspartner eng Bonne note gëtt. De Wielerwëllen, dee wëll also zimlech vill zimlech duercherneen; wann ee genee dohinner kuckt, da mierkt een, datt e verkuebelt ass, en hannerléisst e krommt Gefill, dat net däerf sinn an duerfir gëtt da riicht gebéit, mam Text, de Wielerwëllen wier op eng blo-schwaarz-Koalitioun aus. A mir léieren: de Wielerwëllen ass dat, wat Politiker no de Wahle maache wëllen, egal wat an de Wahlkabinne geschitt ass. An duerfir kënnen Déi Gréng mat hirem klenge Succès struewelen esouvill se wëllen, si sinn eraus aus dem Stater Spill.

Déi 2 relativ Grouss, also déi Blo an – nujee – déi Schrumpf-Rout, déi hunn decidéiert, datt déi nächst Chamberwahle seriö musse preparéiert ginn. An duerfir gëtt sech elo begannt, sech mat dem putative Vainqueur, der CSV, emol schonns probeweis an d'Bett ze leeën. Eben, zum Beispill, an der Stad. Oder et schéckt een nach just Kussi-Kussi an Direktioun CSV, wéi de Claude Hagen gëscht an eiser Parteien-Table-ronde. Déi nächst Méint verspriechen an deem Sënn. D'CSV ka sech vu Liebhaber an hirem Lotterbett net retten an ëmmer läit deen nächste Möchtegern-Amant ënner dem Bett. Dat provozéiert Jalousien an de Programm ass dësen: ëmmer méi Buttek an der Koalitioun, ëmmer méi schéi Geblimmels a schéin Ae fir d'CSV. Wou sech entretemps awer och jiddweree fir ministrabel hält.

Mat Politik huet dat alles net méi vill ze dinn, et ass nach just e Muecht-Spill. Well reng politesch si jo e puer Constaten ze maachen. Ugefaange mat deem, datt der LSAP hir elektoral Basis ewechgebrach ass. Wann d'Aarbechter Auslänner a Frontaliere sinn, jo wien soll da nach d'Arbëterpartei wielen? Anere Problem: wann an der Stad 6 vun 10 Leit Auslänner sinn, wie representéiert de Chef oder d'Cheffin um Knuedler dann nach? A wann d' Problemer vu Stad a Land de Logement an de Verkéier sinn, a wann op déi Froe keng Partei eng faisable oder och nëmmen eng credibel Äntwert huet, wat bedeit dat à la Longue?

Eis gréisser Parteie vu Gréng bis Schwaarz sinn elo all am Kär biergerlech Parteien, Ënnerscheeder si nach just butzeg Nuancen. An owes no de Wahle gëtt nëmmen nach iwwer Nimm a Prozenter a Sëtz geschwat an no Fakten an Upakes gëtt net méi gefrot. An dat ass an der Rei, well d'Wahlresultat ass d' Resultat vun engem Bäumchen-wechsel-dich-Spill ouni Contenu an ouni Fong. Am Hannergrond gëtt et nach puer Rosereien.

An iergendwann flitt eis dat iwwregens ëm d'Oueren.

En attendant muss de Mobilé a Beweegung bleiwen. An duerfir brauch een eng Geschicht, déi Changementer legitiméiert. Duerfir ass de Wielerwëllen erfonnt ginn, eng Etiquette, déi verstoppt, datt näischt derhannert ass.

Äre Commentaire


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.