Commentaire vum Carine LemmerSproochen an de Lëtzebuerger Schoulsystem

D'Lëtzebuergesch soll héich gehale ginn, eventuell offiziell EU-Sprooch ginn. Schéin a gutt, fënnt d'Carine Lemmer déi aktuell Diskussioun. Mä mam Lëtzebuergesche kënnt een net wäit. An d'Kanner an der Schoul ploe ganz aner Saachen.

Lëtzebuerg ass méisproocheg. En Immigratiouns- a Frontaliersland. D'Auslänner dominéieren um Aarbechtsmaart an an der Schoul - ausser am klassesche Lycée.

Commentaire / Carine Lemmer

De Lëtzebuerger Schoulsystem ass ganz usprochsvoll. Et léiert een net a senger Mammesprooch liesen a schreiwen, mä et gëtt een op Däitsch alphabetiséiert. Ganz séier duerno kënnt d'Franséisch.

Déi Regelung ass wäit iwwer 160 Joer al. Fir de klassesche „Lëtzebuerger“ geet dat nach. Méi oder manner gutt. Mä fir all déi auslännesch Kanner dacks manner gutt. D'Resultat: Am klassesche Lycée sëtze ronn 80% Lëtzebuerger an nëmmen 20% auslännesch Jonker. Am Technique ass et vill méi ausgeglach, mä ëmmer méi Lëtzebuerger ginn an den Technique. An an de Modulaire ginn och ëmmer méi Kanner orientéiert.

Sinn d'Kanner also méi domm ginn, wuel kaum, oder gi se manner gutt mam Schoulsystem eens? D'Schoul decidéiert iwwert dat spéidert Liewen. Iwwer de Beruff an iwwer Freed oder Onzefriddenheet.

De Ministère geet, menger Meenung no, richteg Weeër mat zum Beispill enger ëffentlecher Europaschoul. D'Lycéesreform versprécht ënnerschiddlech Schoule fir ënnerschiddlech Kanner. An d'Méisproochegkeet fréi fërderen, ass keng schlecht Saach, wann et net ze vill ambitiéis ass.

Mä eng komplett Léisung hu weder de Ministère nach d'Fuerscher vun der Uni. An ech ka leider och net dermat déngen.

Ech géif et awer méi derwäert fannen iwwert d'Sproochen an eisem Schoulsystem ze diskutéieren an do eng besser Léisung ze siche wéi driwwer, ob all offiziell Dokumenter missten op Lëtzebuergesch iwwersat ginn. Well genee dee System all Joer Dausende vu Kanner zum Verhängnes gëtt.

Déi aktuell Lëtzebuergesch-Diskussioun ass mat Momenter och eng Anti-Franséisch. Obwuel mer et fréi an der Schoul léieren, deet de Gros vun eis sech schwéier mat där Sprooch. Fir déi eng fänkt dat schonn am Buttek un, bei aneren eréischt bei komplizéierten Texter, déi ee muss schreiwen.

Eng Alphabetiséierung op Franséisch....wär dat d'Léisung? Virun enger Zäit ass do driwwer diskutéiert ginn, mä zréck behale gouf et net. Keng Patentléisung, wann d'Franséisch net d'Mammesprooch ass.

Mä de Gruef tëscht gudden a manner gudde Schüler, dee weist sech scho fréi. An de standardiséierten Tester am 3. Schouljoer gesäit ee scho staark Ënnerscheeder, seet eng rezent Etude vun der Uni. D'Resultater am 1. Schouljoer waren nach méi homogen. Am Cycle 2 decidéiert sech allso villes.

Muss d'Franséisch sou fréi geléiert ginn?, stellen ech mer d'Fro. Kuerz nodeems een op Däitsch geléiert huet liesen a schreiwen an dat nach net wierklech verankert ass? Mä un d'Franséisch fréckele goen, ass wahrscheinlech sou schwiereg wéi un der laanger, ze laanger, grousser Vakanz eppes wëllen z'änneren!? An ouni Franséisch geet et jo net hei am Land, oder? Och wa bal 43'000 däitsch Frontalieren eppes aneres all Dag weisen.

Derbäi kënnt d'Fro, ob mer Englesch net ze spéit léieren? Et ginn haut vill héichqualifizéiert Aarbechtsplaze geschafen, mä dacks mussen déi mat Leit aus dem Ausland besat ginn.

Alles keng nei Diskussioun, mä eng Léisung fir eis schwiereg Méisproochegkeet ass nach ëmmer net do.



Äre Commentaire


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.