Lieserbréif vum Mil LorangViru 85 Joer: Nazi-Däitschland organiséiert den 1. Holocaust, dee vun de Bicher!

A villen däitsche Stied hunn d'Nazien den 10. Mee 1933 an di Deeg duerno, ritualméisseg Dausende Bicher aus ëffentlechen a private Bibliothéiken op ëffentleche Plaze vun Universitéitsstudenten verbrenne gelooss. D'Wierker vu bekannten Auteuren ewéi Thomas Mann, Alfred Döblin, Stefan Zweig, Erich Kästner, Heinrich Mann, Sigmund Freud, Anatole France, Emile Zola, Voltaire, Albert Einstein, Aldous Huxley, Karl Marx, Selma Lagerlöf, Maxim Gorky, Kurt Tucholsky, Carl von Ossietzky, ... Ënner den 300 Schrëftsteller, Wëssenschaftler, Philosophen, politeschen Auteuren ware ganz vill Judden. Et war eng massiv Zerstéierung vu Kulturgidder.

Ënner dem Slogan "Deutsche Studenten marschieren wider den undeutschen Geist" hunn dausende Studenten, ugefouert vun hire Professeren, d'Bicher op Scheiterhaufe geworf.

Zéngdausende Leit hunn deem Trauerspill nogekuckt an de Propagandaminister Joseph Goebbels huet sech um Opernplatz zu Berlin mat enger Ried un d'Studente gewandt. De Goebbels huet a senger typescher Hitler-Imitatioun gebrëllt:

"Meine Kommilitonen! Deutsche Männer und Frauen! Das Zeitalter eines überspitzten jüdischen Intellektualismus ist nun zu Ende, und der Durchbruch der deutschen Revolution hat auch dem deutschen Weg wieder die Gasse freigemacht. Und der kommende deutsche Mensch wird nicht nur ein Mensch des Buches, sondern auch ein Mensch des Charakters sein, und dazu wollen wir Euch erziehen.

Jung schon den Mut zu haben dem Leben in die erbarmungslosen Augen hineinzuschauen, die Furcht vor dem Tode zu verlernen ... das ist die Aufgabe dieses jungen Geschlechts.

Und deshalb tut ihr gut daran, um diese mitternächtliche Stunde den Ungeist der Vergangenheit den Flammen anzuvertrauen. Das ist eine starke, große und symbolische Handlung, ..."

© Bundesarchiv


Et ass weltwäit doriwwer bericht ginn, ganz vill an den USA. An der Newsweek vum 20. Mee 1933 war en Artikel ënner dem Titel "Students Exult as 'Un-German' Books Burn". An deem Artikel ass firtéischt d'Wuert "Holocaust" benotzt ginn, "holocaust of books"; Time huet de Begrëff "bibliocaust" benotzt. D'New York Times huet dësem Kulturcrime dräi Leitartikelen hannerenee gewidmet. Amerikanesch Zeitungen haten des Aktioun schonn am Virfeld ugekënnegt, wat um Dag selwer, den 10. Mee, op ville Plazen an den USA zu Protestaktioune gefouert huet. Zu New York eleng sollen 100.000 Leit op der Strooss gewiescht sinn.

A wat gouf een zu Lëtzebuerg doriwwer gewuer?

An der gréisster Dageszeitung 'Luxemburger Wort': näischt, weder den 11. Mee nach di Deeg duerno!
Am 'Tageblatt' war den 11. Mee op Säite 2 eng Foto an en Artikel ënner dem Titel "Der Kampf gegen den 'undeutschen Geist'". D'Zeitung 'L'Indépendance Luxembourgeoise' huet den 13. Mee eng Foto mat enger Billerzeil publizéiert.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.