Champions LeagueJuve packt et an d'Halleffinale, Monaco klappt de BVB 3:1

Borussia Dortmund ass e Mëttwoch no engem 1:3 géint den AS Monaco aus der Champions League geflunn. Juventus Turin packt et no engem 0:0 an d'Halleffinale.

© AFP
FC Barcelona - Juventus Turin 0:0

Am Réckspill huet Barca op e Wonner gehofft a war dobäi besonnesch op hire Star-Kicker Messi ugewisen. An der éischter Halschent konnte si awer net iwwerzeegen.Trotz hiren Beméiungen hu sech Messi, Suárez an Neymar d'Zänn un der staarker Defensiv vu Juve ausgebass.

Och an der zweeter Halschent sollte sämtlech Versich en Treffer ze landen ouni Resultat bleiwen. Et bleift beim 0:0, an d'Italiener hunn et no enger 3:0-Victoire am Hispill verdéngt an d'Halleffinale gepackt.

AS Monaco  - Borussia Dortmund 3:1

Virop huet de Match Dortmund géint den AS Monaco mat engem Retard vu 5 Minutten ugefaangen. Op Twitter huet déi däitsch Equipe matgedeelt, dass d'Police den Equippebus, wuel ouni Begrënnung, 20 Minutten net virum Hotel fortfuere gelooss huet. Och de Spectateure gouf am Virfeld geroden, sech mat Zäiten op de Wee ze maachen, wéinst de verstäerkte Sécherheetsmesuren.




Loung et un der ugespaanter Situatioun beim Hotel? Knapp 3 Minutten nom Upaff huet Monaco duerch e Goal vum Kylian Mbappé den 1-0 markéiert. An der 17. Minutt konnt de Radamel Falcao nach emol nosetzen an huet 2:0 erweidert an esou ass e Match och an d'Paus gaangen. Dem BVB seng Offensiv hat dem Tempo an der Ofwier vun den Haushären näischt entgéint ze setzen.

Déi Giel-Schwaarz hunn d'Paus genotzt an, an der 48. Minutt den Turbo ugeworf. De Reus, deen de Ball propper vum Dembélé zerwéiert krut, huet d'Lieder eragemaach, 2:1 also.

An der 81. Minutt gouf de Valère Germain agewiesselt an huet deem Ganzen dunn den Deckel opgesat, hien erhéicht op 3:1 an domat war de Match och schonn decidéiert. 

Äre Commentaire


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.