ATP-Tournoi vu s'HertogenboschMuller klappt Zverev a steet an der Finale

De Gilles Muller klappt den Alexander Zverev an 2 Sätz mat 7:6; 6:2. An der Finale, déi live op der Tëlee iwwerdroe gëtt, trëfft en op den Ivo Karlovic.

De Gilles Muller wënnt an 2 Sätz géint den Alexander Zverev (17.06.2017)
De Muller konnt sech an der Halleffinale zu s'Hertogenbosch mat 7:6 a 6:2 duerchsetzen a steet e Sonndeg an der Finale.
De Gilles Muller um Mikro vum Franky Hippert



Den éischte Saz konnt de Gilles Muller mat 7:6 (7:5) fir sech entscheeden, béid Spiller konnte gréisstendeels hiren Opschlag duerchkréien an et war just de Gilles Muller dee 4 Breakbäll leie gelooss huet beim Stand vu 4:3 aus senger Sicht. Am Tiebreak ass den Alexander Zverev, déi aktuell Nummer 10 op der Welt, op 3:1 fortgezunn, mä de Gilles Muller huet klore Kapp behalen an huet schlussendlech den Tiebreak mat 7:5 fir sech entscheet.

Um Ufank vum zweete Saz huet de Gilles Muller nees 2 Breakbäll leie gelooss a konnt eréischt beim Stand vun 1:1 den Däitschen zum 2:1 breaken. Beim Stand vu 4:2 huet de Gilles Muller de Match entscheet a konnt schlussendlech dës Halleffinale mat 7:6; 6:2 gewannen.

An der Finale kritt de Lëtzebuerger vum Joer et mam Ivo Karlovic, der Nummer 24 op der Welt ze dinn. De Kroat konnt sech an 3 Sätz mat 7:6, 5:7 an 7:6 géint säi Landsmann Marin Cilic (ATP-Ranking 7) duerchsetzen.

D'Finale ass fir e Sonnden 14.30 Auer ugesat. Déi gesitt Dir mat lëtzebuergeschem Commentaire vum Franky Hippert an Nico Keiffer live op der Tëlee an am Livestream op RTL.lu an der App!

Dem Gilles Muller säi Wee während dëser Woch vu s'Hertogenbosch:

1/16 Finale: fräilous

1/8 Finale: géint den Andreas Seppi mat 7:6; 6:4 gewonnen.

1/4 Finale: géint den Alijaz Bedene mat 6:3; 3:6; 6:4 gewonnen.

Äre Commentaire


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.