Internationale FootballOch um 5. Spilldag keng Punkte fir Köln, BVB bleift Leader

E Mëttwochowend war et d'Suite vum 5. Spilldag an der Bundesliga. Donieft huet Real Madrid a Spuenien nees verluer an an Italien wënnt Neapel an d'Juve.

© afp
Fir Köln gesäit et dës Saison weider guer net gutt aus. Och um 5. Spilldag gouf et fir d'Equipe vum Peter Stöger nees eng Defaite. Bis elo konnt Köln nach kee Match gewannen a steet mat 0 Punkten um Wupp vun der Tabell.

Bei der 0:1 Néierlag géint Frankfurt gouf et nees Ierger ëm de Video-Arbitter. De leschte Weekend hat dem FC no de Video-Arbitter zu Onrecht an de Match agegraff, e Mëttwoch gouf et en ëmstriddenen Eelefmeter géint Köln, hei huet de Video-Assistent net agegraff. Kuerz drop gouf der Lokalformatioun e méiglechen Eelefmeter verweigert.

Insgesamt huet ee Köln während den 90 Minutten awer eng Veronsécherung ugemierkt. Ze vill Feeler sinn de Spiller am Opbau geschitt an et gouf kaum Goalchancen. D'Eintracht war vun Ufank u méi selbstbewosst a konnt sech um Enn duerch den Eelefmeter vum Haller an der 22. Minutt mat 1:0 duerchsetzen.    

Däitlech besser leeft et de Moment fir Borussia Dortmund. Si konnte sech zu Hamburg mat 3:0 behaapten. Tëscht béiden Equippe war et  direkt vun Ufank un eng intensiv Partie. Mat engem héijen Tempo huet Hamburg versicht d'Spill vun de Gäscht ze stéieren. De BVB hat nawell e klore Chanceplus an den éischten 20 Minutten an ass verdéngt no 24 Minutten duerch e Goal vum Kagawa mat 1:0 a Féierung gaangen. No 63 Minutten huet den Aubameyang duerch den 2:0 fir eng Virentscheedung gesuergt. De Sak zougemaach huet de Pulisic an der 79. Minutt mam 3:0. Um Enn ass et eng souverän Victoire fir Borussia Dortmund, mat där si un der Tabellespëtzt bleiwen.

Hertha BSC Berlin klappt Leverkusen mat 2:1. Duerch Goaler vu Leckie a Kalou stoung et no 45 Minutte schonn 2:0. An der 84. Minutt konnt de Brandt nach op 1:2 verkierzen, ma dréie konnten d'Gäscht de Match net méi.

Mat engem 1:1 Remis hu sech Freiburg an Hannover getrennt.

Hoffenheim huet sech zu Mainz 3 Punkte geséchert. Den decisive Goal huet den Uth an der Nospillzäit geschoss, sou dass Hoffenheim mat 3:2 géint Mainz gewënnt.

Link: Alleguer d'Matcher an d'Resultater am Iwwerbléck

A Spuenien huet den Atlético Madrid e Mëttwoch den Owend fir de Kont vum 5. Spilldag mat 2:1 zu Bilbao gewonnen. Real Madrid huet sech dogéint géint Betis d'Zänn ausgebass. Si verléieren duerch e Goal vum Sanbria an der Nospillzäit mat 0:1 a verléieren an der Tabell weider u Buedem. De Moment ass et déi 7. Plaz mat 7 Punkte Réckstand op Barcelona un der Spëtzt.

© afp


An der Serie A an Italien huet Juventus Turin mat 1:0 géint Florenz gewonnen. De Pjanic gouf an der 75. Minutt agewiesselt, den entscheedende Goal huet de Mandzukic an der 52. Minutt geschoss. Neapel konnt sech bei Lazio Roum mat 4:1 duerchsetzen. Den AC Mailand klappt SPAL Ferrara mat 2:0.

Äre Commentaire


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.