Champions LeaguePSG, Bayern a Barcelona wannen, Atlético enttäuscht

E Mëttwoch war et d'Suite vum 3. Spilldag an der Football Champions League. De PSG wënnt zu Anderlecht mat 4:0, Barcelona klappt Piräus mat 3:1.

© afp
Resumé Champions League / Reportage Jeff Kettenmeyer



Am Grupp A wënnt Manchester United och déi 3. Partie vun der Gruppephas. D'Equipe vun der Insel setzt sech mat 1:0 bei Benfica Lissabon duerch. Den decisive Goal huet de Rashford an der 65. Minutt geschoss. D'Portugise bleiwen domadder bei 0 Punkten a sti weider ënner Drock.

An der zweeter Partie wënnt Basel mat 2:0 zu Moskau. Basel huet domadder 6 Punkten um Kont, Moskau huet der 3.

Am Grupp B gouf Anderlecht an der 4. Minutt kal erwëscht. No engem laange Pass vum Verratti an de Strofraum, hat de Mbappé Zäit a Plaz genuch, fir de Ball souverän lénks Ënnen an de Goal ze setzen. Wee geduecht hat, dass de PSG duerno d'Partie géing dominéieren, sollt falsch leien. Anderlecht ass ëmmer erëm ganz geféierlech virun de Goal komm an d'Gäscht hu gutt missen oppassen. Den zweete Goal vum Match ass awer dem PSG gelongen. An der 44. Minutt huet de Cavani op 2:0 erhéicht. No der Paus hat Anderlecht nees gutt ugefaangen, huet de PSG fréi am Opbau gehënnert, ma e Goal ass net hinnen, mä de Gäscht gelongen. Den Neymar huet e Fräistouss kuerz virum Strofraum ënnert der Mauer erduerch geschoss a fir den 3:0 gesuergt. An der 88. Minutt huet den Di Maria mam 4:0 fir de Schlusspunkt gesuergt.

Bayern München huet de Match géint Celtic Glasgow vun der 1. Minutt un dominéiert a gewënnt mat 3:0. Fir den 1:0 huet de Müller an der 18. Minutt gesuergt. De Kimmich huet de Ball mat vill Gefill an de Fënnefmeterraum ginn, wou de Lewandwoski et mat engem Kappball probéiert huet, hei konnt de Keeper nach klären, ma beim Noschoss vum Müller hat dëse keng Chance méi. An der 29. Minutt huet de Kimmich selwer de Ball an de Goal gesat. No der Paus huet Bayern München ënnert dem Trainer Jupp Heynckes do weider gemaach, wou een no der Paus opgehalen hat. No engem Corner ass den Hummels an der 51. Minutt am héchste gesprongen an huet de Ball era gekäppt. Domadder steet Bayern hannert dem PSG, déi ongeschloe sinn, mat 6 Punkten op der 2. Plaz an der Tabell.

Am Grupp C stoung et no 90 Minutten tëscht Qarabag an Atlético Madrid 0:0. D'Spuenier hu sech vun Ufank u ganz schwéier gedoe géint de Géigner aus dem Aserbaidschan. An der 1. Hallschent hat de Favorit an dëser Partie zwou gutt Chancen. An der 27. Minutt huet de Carrasco no engem laange Pass d'Verteideger vun den Haushäre stoe gelooss an ass eleng a Richtung Goal gelaf. Beim Ofschloss huet et awer gehapert, de Carrasco huet de Ball direkt op de Keeper aus dem Aserbaidschan geschoss. An der 39. Minutt stoung de Griezmann, no engem Pass vum Gameiro, fräi virum Sehic, ma och säi Schoss konnt de Keeper paréieren.

No der Paus huet ee keng Steigerung bei Madrid gesinn. Qarabag stoung hanne weiderhi gutt an huet kaum Chance vun de Gäscht zougelooss. Vun der 75. Minutt u stoung d'Lokalformatioun nëmmen nach zu 10 um Terrain, ma och dat huet Atlético Madrid net gehollef. An der 84. Minutt haten d'Spuenier nach eng lescht Chance, ma och hei ass de Ball net eragaangen. Domadder geet de Match mat engem 0:0 op en Enn.

Tëscht Chelsea a Roum gouf et en 3:3. Chelsea hat de Match besser ugefaangen. Duerch de Luiz an den Hazard loungen d'Englänner no 37 Minutte mat 2:0 a Féierung. Duerno koum d'Reaktioun vun den Italiener. Nach virun der Paus konnt de Kolarov op 1:2 verkierzen an der 64. Minutt huet den Dzeko ausgeglach an an der 70. Minutt huet hie Roum mat 3:2 a Féierung bruecht. Chelsea konnt reagéieren. Den Hazard huet an der 75. Minutt fir den 3:3 an d'Schlussresultat gesuergt.

Am Grupp D gewënnt Barcelona verdéngt mat 3:1 géint Olympiakos Piräus. D'Katalane waren déi besser Equipe, och wa si an der éischter Halschent net selwer de Goal geschoss hunn, ma et war den Nikolaou, dee Barcelona mat engem Selbstgoal mat 1:0 a Féierung geschoss huet. Eng rout Kaart vum Piqué an der 42. Minutt sollt d'Haushären och net ophalen. An der zweeter Hallschent konnten de Messi an den Digne fir weider Goaler bei de Katalane suergen. An der 90. Minutt konnt Olympiakos Piräus nach op 1:3 verkierzen. 

Juventus Turin gewënnt duerch e spéide Goal mat 2:1 géint Sporting Lissabon. No engem 0:1 Réckstand duerch de Sandro an der 12. Minutt konnt d'Juve duerch Goaler vum Pjanic (29') a Mandzukic (84') d'Partie nach dréien.  

D'Matcher vum Mëttwoch am Iwwerbléck
Grupp A:
Benfica - Manchester United 0:1
0:1 Rashford (65')

ZSKA Moskau - FC Basel 0:2
0:1 Xhaka (29'); 0:2 Oberlin (90')

Grupp B:
Bayern München - Celtic Glasgow 3:0
1:0 Müller (18'); 2:0 Kimmich (29'); 3:0 Hummels (51')

RSC Anderlecht - PSG 0:4
0:1 Mbappé (4'); 0:2 Cavani (44'); 0:3 Neymar (66'); 0:4 Di Maria (88')

Grupp C:
FC Chelsea - AS Roum 3:3
1:0 Luiz (11'); 2:0 Hazard (37'); 2:1 Kolarov (40'); 2:2 Dzeko (64'); 2:3 Dzeko (70'); 3:3 Hazard (75')

Qarabag - Atlético Madrid 0:0

Grupp D:
FC Barcelona - Olympiakos Piräus 3:1
1:0 Nikolaou (Selbstgoal) (18'); 2:0 Messi (61'); 3:0 Digne (64'); 3:1 Nikolaou (90')

Juventus Turin - Sporting CP 2:1
0:1 Sandro (Selbstgoal) (12'); 1:1 Pjanic (29'); 2:1 Mandzukic (84')

Link: Alleguer d'Matcher an d'Resultater am Iwwerbléck

Äre Commentaire


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.