BGL LigueDe Patrick Grettnich huet d'Rudder beim Racing iwwerholl

De leschte Weekend huet de Stater Racing den Trainer gewiesselt, am Plaz vum Jacques Muller wäert de Patrick Grettnich elo op der Trainerbänk sëtzen.

© pressphoto (Archiv)
Patrick Grettnich Trainer beim Racing / Rep. J. Kettenmeyer



De fréieren Trainer vu Stroossen huet d'Missioun d'Equipe aus dem Tabellekeller erauszehuelen an huet elo Ufank der Woch den éischten Training gehalen.

Den Ament ass de Racing op der zweetleschter Plaz an der Tabell a bleift domat däitlech hannert den eegenen Erwaardungen zeréck. De Kader ass gutt, heescht et aus der Stad, ma elo gëllt et dat och nees an de Resultater ze weisen. Déi Missioun huet elo de Patrick Grettnich iwwerholl, deen nom 3. Spilldag zu Stroossen huet misste Plaz maachen, datt do tëscht lo just eng kuerz Paus war, spillt fir hie keng Roll. De Patrick Grettnich hat nämlech mat Stroossen geplangt eng ganz Saison ze maachen, ma wou dat net geklappt huet, wollt hien elo net eng länger Paus maachen an dofir ass hie prett fir déi nei Aventure.

Dem neie Mann op der Bänk no läit de Problem net un der Qualitéit vun de Spiller, mä éischter am mentale Beräich. Bis op Munneref sinn alleguer d'Defaitten mat nëmmen engem Gol ënnerscheed zustane komm an dacks wär et och esou gewiescht, dass de Racing am Avantage war, sou de Patrick Grettnich. 

Och d'Lännermatch Paus kennt dem Patrick Grettnich entgéint, fir e bësse méi Zäit ze hu seng nei Equipe kennenzeléiren a sech op de nächste Géigner Rodange ze preparéieren.

Et muss awer jiddereen um Racing sech spéitstens elo dem Eescht vun der Situatioun bewosst sinn. Wann dat de Fall ass, dann ass de Patrick Grettnich iwwerzeegt, dass ee séier aus där mësslecher Situatioun eraus kënnt, ma einfach wäert et trotzdem net ginn. Dëst Joer sinn nämlech vill Equippe vum Leeschtungsniveau ganz no beieneen an do dierft een sech elo net blende loossen, esou nach de neien Mann op der Trainerbänk vum Racing.

De nächste Match vum Racing ass de 19. November doheem géint Rodange.

Äre Commentaire


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.