WM 2018 - PlayoffItalien verléiert den Aller-Match géint Schweden

An der 61. Minutt huet de Johansson doheem géint d'Azzurri getraff. De Retourmatch ass e Méindeg.

Ass Italien net op der WM2018 a Russland derbäi?

Auszeschléissen ass dat net méi, well d'Italiener hate sech jo net direkt qualifizéiert a musse sech an de Playoffe géint Schweden duerchsetzen.

Esou ganz einfach gëtt dat awer net, well den Allermatch e Freideg den Owend an der Friends Arena zu Solna huet Italien mat 0:1 verluer.

De Johansson huet an der 61. Minutt fir seng Faarwe getraff, wéi e fir d'éischt een italieneschen Ofwierspiller ausgespillt an duerno de Buffon um falsche Fouss erwëscht huet.

Ob den Ecart vun engem Goal duergeet, decidéiert sech e Méindeg, wann déi Blo-Giel an Italien untriede mussen.

Et wier fir d'éischt zanter 1958, datt Italien schonn an der Qualifikatioun hänke bleiwe géif.

En Donneschdeg hat Nordirland jo schonn 0:1 géint d'Schwäiz verluer a Kroatien hat Griichenland doheem mat 4:1 geklappt.

E Samschdeg spillt nach Dänemark géint Irland.

Da sinn och ewell zwee Retourmatcher: d'Schwäiz géint Nordirland a Griichenland géint Kroatien.

E Méindeg dann Italien géint Schweden an en Dënschdeg dann Irland géint Dänemark.


Um Freideg waren och nach eng Partie Frëndschaftsmatcher. Däitschland huet am Wembley-Stadion 0:0 géint England gespillt an a Mexiko huet d'Belsch 3:3 gespillt. Frankräich ka sech am Stade de France 2:0 géint Wales duerchsetzen.

Äre Commentaire


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.