DFB-PokalPaderborn aus der 3. Bundesliga steet an der Véierelsfinall

Ausserdeem konnte sech um Dënschdeg Mainz, Schalke a Wolfsburg qualifizéieren.

© afp
Um Dënschdeg den Owend waren déi éischt 4 Aachtelsfinallen am däitschen DFB-Pokal.

Paderborn aus der drëtter Liga eliminéiert Ingolstadt aus der 2. Bundesliga a Mainz kënnt no Réckstand zeréck a klappt Stuttgart mat 3:1.

Duerno konnt sech Schalke knapp mat 1:0 géint Köln behaapten a Wolfsburg klappt Nürnberg duerch zwee Goler an der Verlängerung.

FSV Mainz 05 - VfB Stuttgart 3:1
An der Ufanksphas huet praktesch nëmmen d'Lokalequipe gespillt, si huet virun allem dovunner profitéiert, dass déi Stuttgarter am Opbauspill ganz vill Feeler gemaach hunn. Déi éischt geféierlech Aktioun vun de Gäscht koum eréischt an der 26. Minutt, wou si iwwer de Brekalo Tempo opgeholl haten. De Spiller, dee vu Wolfsburg ausgeléint ass, huet op den Acacibar gespillt, ma deem säi Schoss war ze harmlos.

No dëser Aktioun ass et vill hin an hier gaangen a Chancë gouf et op béide Säiten, ma et waren awer d'Gäscht, déi zum Erfolleg komm sinn. De Gentner huet eng flott Une-deux mam Akolo gespillt a konnt sech virum Keeper presentéieren. Hei huet den erfuerene Gentner d'Iwwersiicht an d'Nerve behalen an den 1:0 markéiert. Mat dësem Stand ass et och an d'Kabinne gaangen.

Mainz konnt no der Paus awer zeréckschloen. No engem Corner stoung de Berggren genau richteg an de Stiermer huet mam Kapp fir den Ausgläich gesuergt.

Den Ausgläich huet dem Mainzer Spill gutt gedoen a virun allem hate si elo Confiance. Esou konnt Mainz an der 71. Minutt esouguer d'Féierung iwwerhuelen. De Berggren huet dem Diallo de Ball am Strofraum zerwéiert an den Diallo konnt aus kuerzer Distanz den 2:1 markéieren.

Mainz huet sech uschléissend keng Feeler méi geleescht a konnt esouguer nach duerch de Serdar op 3:1 erhéijen a steet an de Véierelsfinallen.

SC Paderborn - FC Ingolstadt 1:0
Den SC Paderborn ass nach als eenzegen Drëttligist mat dobäi a krut um Dënschdeg den Owend an der Aachtelsfinall Besuch vum Zweetligist FC Ingolstadt. Paderborn, wann och den Underdog, huet sech hei net verstoppt an huet probéiert flotte Football ze spillen, ma och d'Schanzer hu sech vun dësem Owend vill versprach.

Déi éischt Hallschent war aarm u geféierlechen Aktiounen, ma de Bëss huet gestëmmt, virun allem bei Paderborn, déi et Ingolstadt ganz schwéier gemaach hunn. Vun de Schanzer war et eigentlech eng wierklech schwaach Hallschent, déi géint déi staark Defense net ukomm sinn. Mat engem 0:0 goufen d'Säite gewiesselt.

No der Paus gouf den Drëttligist du fir seng Méi belount. De Srbeny huet den Zloinski am Strofraum zerwéiert an deen huet de Ball ënnert d'Lat an de Goal geschoss.

Mat groussem Kampfgeescht konnt Paderborn de knappe Virsprong halen an zitt esou als Drëttligist an d'Véierelsfinalle vum DFB Pokal an.

Nürnberg - Wolfsburg 0:2
Wesentlech méi spannend wéi geduecht war et och am Match Nürnberg-Wolfsburg. Den Zweetligist Nürnberg hat zwar wesentlech manner Ballbesëtz wéi d'Wëllef, ronn 30 zu 60 %, mat d'Franken hate méi kadréiert Schëss a konnte sech iwwer en 0:0 no 90 Minutte freeën.

Et goung also an d'Verlängerung an do konnt de VfL an der 96. Minutt duerch den Uduokhai a Féierung goen. An der 118. Minutt ass dunn d'Decisioun gefall, wéi den Didavi fir den 2:0 eragesat huet.

Schalke - Köln 1:0
Schalke hat méi vum Match - méi Ballbesëtz, méi Schëss op de Gol, méi kadréiert Schëss - a wënnt um Enn knapp, awer net onverdéngt mat 1:0 géint Köln. Déi Kölner hunn awer gemaach, datt d'Gelsenkirchener vill Krämpes haten, sech ze behaapten. Eréischt an der 63. Minutt huet de Max Meyer deen eenzege Gol vun der Partie geschoss. Domat ka Schalke, déi den Ament e gudde Laf hunn, och am Pokal seng gutt Form ënner Beweis stellen a sech op d'Véierelsfinall freeën. An der Liga stinn déi Kinneksblo jo op der zweeter Plaz, hanner de Bayern a virun Dortmund.

De Kölner Interimstrainer Stefan Ruthenbeck huet trotz der Néierlag weider Argumenter fir eng Weiderbeschäftegung gesammelt. E Mëttwoch wëllen déi Verantwortlech vum FC Köln jo decidéieren, wien den dauerhaften Nofolger vum Peter Stöger (elo BVB) gëtt.



D'Partien um Mëttwoch:

Borussia Mönchengladbach - Bayer Leverkusen (18.30 Auer)

Werder Bremen - SC Freiburg (18.30 Auer)

1. FC Heidenheim - Eintracht Frankfurt (20.45 Auer)

Bayern München - Borussia Dortmund (20.45 Auer)

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.