BundesligaSchalke verspillt Féierung, Bayern wënnt géint Bremen

E Sonndeg stoungen nach zwou Partië vum 19. Spilldag an der däitscher Football-Bundesliga um Programm.

© afp |Archiv)
Bayern zitt duerch d'Victoire géint Bremen an der Tabell weider dovun a Schalke verspillt eng 1:0-Féierung géint den Opsteiger Hannover, dee spéit ausgläiche konnt.

RTL-News: Bundesliga: Gisdol net méi Trainer bei Hamburg, Hollerbach iwwerhëlt

FC Schalke 04 - Hannover 96 1:1
D'Ufanksvéierelsstonn vun der Partie huet sech gréisstendeels am Mëttelfeld ofgespillt, esou dass keng vu béiden Equippe sech eng Chance erausspille konnt, ma an der 16. Minutt huet d'Lokalequipe direkt déi éischt Chance genotzt, fir a Féierung ze goen. Den Harit huet de Ball no vir gedriwwen, huet um 16-Meter de Pjaca ugespillt, deen ee Verteideger stoe léisst an de Ball aus der Dréiung an de laangen Eck schéisst. Den Tschauner am Goal vun Hannover war wuel nach mat de Fanger um Ball drun, ma hie konnt en net méi entscheedend deviéieren.

Schalke stoung gutt an der Defense an huet kaum eppes zougelooss, ma hinne selwer ass offensiv och net vill gegléckt, esou dass et mat dëser knapper Féierung an d'Paus gaangen ass.

Nom Säitewiessel ass Hannover lues awer sécher besser an d'Partie komm an huet elo och de Wëlle gewisen, deen néideg ass, wann een hei nach eppes erreeche wollt. Ma Schalke konnt dogéint halen an hunn d'Euphorie op Säite vun de Gäscht nees séier gestoppt.

An der 86. Minutt hunn d'Gäscht dunn awer zougeschloen. De Klaus huet eng Flank an d'Mëtt bruecht, den Naldo huet bei dëser Flank net gutt ausgesinn an de Füllkrug stoung genau richteg, fir fir d'1:1-Schlussresultat ze suergen

Bayern München - Werder Bremen 4:2
© afp

D'Gäscht vu Bremen hu sech vun Ufank un net verstoppt an hu couragéiert dogéint gehalen a si goufen an der 25. Minutt dofir belount. De Jérôme Gondorf ass vum Max Kruse an d'Déift geschéckt ginn, de Gondorf huet sech super vum Kimmich geléist a konnt sech eleng virum Ulreich presentéieren. Beim Schoss vum fréiere Spiller vun Darmstadt war den Ulreich nach drun, ma de Ball ass an de lénksen Eck gaangen. 1:0 fir Bremen an der Allianz-Arena.

D'Reaktioun vun den Haushären huet awer net ganz laang op sech waarde gelooss. De Boateng huet de Ball héich an de Strofraum gespillt, do huet de Müller de Ball mat der Broscht ugeholl a Volley an de Goal geschoss. Mat dësem Resultat ass et an d'Paus gaangen.

No der Paus huet de Rekordmeeschter dunn de Match besser ënner Kontroll gehat a konnt an der 63. Minutt eng éischte Kéier a Féierung goen. No engem Corner vum James Rodriguez huet de Lewandowski de Ball mam Kapp am Goal ënnerbruecht.

Ma Bremen konnt nach eng Kéier ausgläichen, wann och mat Hëllef vu Bayern. No engem Corner huet de Süle de Ball onglécklech an den eegene Goal geschoss.

Ma d'Haushären hunn déi richteg Äntwert fonnt an hunn direkt am Uschloss op 3:2 gestallt. De Müller huet de Ball an d'Mëtt geflankt, do ass de Lewandowski am héchste geklommen a konnt Bayern op een Neits mam Kapp a Féierung bréngen.

An der 84. Minutt hu si dunn d'Entscheedung gesicht a fonnt. No enger flotter Virlag vum James huet de Müller op 4:2 gestallt.

LINK: All d'Matcher an d'Tabell aus der Bundesliga am Iwwerbléck

Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.