FOTOEN a VIDEOD'Olympesch Wanterspiller sinn offiziell lancéiert!

E Freideg de Mëtteg um 12 Auer eiser Zäit huet zu Pyeongchang a Südkorea déi 23. Editioun vun den Olympesch Wanterspiller ugefaang.

Wéi schonn annoncéiert kommen d'Athleten aus Nord- a Südkorea zesummen an de Stadion, als Symbol datt, sech déi zwee Noperen méi no kommen. Um Bord vun de Spiller si jo och politesch Gespréicher tëscht béide Länner geplangt. Nordkorea hat och nëmmen e puer Wochen virum Ufank vun de Spiller seng Participatioun annoncéiert.

Éischt Kompetitioune gouf et schonn en Donneschdeg an déi éischt Medaile ginn et e Samschdeg. Eng 2.900 Athleten aus 95 Länner ginn zu Pyeongchang erwaart.

Olympesch Spiller: d'Ouverture (09.02.2018)
Andréck vun der Zeremonie um Freideg. Mat Biller vun Eurosport.


Lëtzebuerg ass duerch een eenzegen Athlet vertrueden. Den 18 Joer ale Schifuerer Matthieu Osch ass zesumme mat de Vertrieder vum COSL an dem Grand-Duc Henri fir seng éischt Olympiaparticipatioun a Südkorea gereest. Alles an allem trieden an den nächsten Deeg iwwer 2.900 Sportler aus iwwer 90 Länner géinteneen un. Déi Olympesch Wanterspiller daueren zwou Woche laang bis de 25. Februar.

Bei der feierlecher Zeremonie ass ënnert anerem och den amerikanesche Vizepresident Mike Pence derbäi.

De südkoreanesche President Moon Jae In huet virun der Ouverture vun den olympesche Wanterspiller Vertrieder vun der nordkoreanescher Kim-Famill getraff. De 90 Joer ale Kim Jong Nam ass den héchsten nodkoreanesche Funktionär, dee jee Südkorea besicht huet. No engem Iessen ass e längert Gespréich geplangt, zesummen och mat der Kim Yo Jong, der Schwëster vum Kim Jong Un.

© AFP

Keng Wanterspiller fir 45 russesch Athleten
45 russesch Athleten hate sech nach Hoffnunge gemaach, fir bei den Olympesche Wanterspiller zu PyeongChang mat derbäi ze sinn.

D'Sportler hate beim TAS, dem Tribunal Arbitral du Sport geklot, well si net vum Internationalen Olympesche Comité invitéiert goufen.

Den TAS huet sech e Freideg fir net zoustänneg an deem Dossier erkläert.

Gemeinsam Gespréicher

Um Bord vun den Olympesche Wanterspiller ass e Freideg d'Nouvelle, datt de Staatschef aus Nordkorea Kim Jong Un säi südkoreaneschen Homolog Moon fir Gespréicher op Pjöngjang invitéiert. Sou séier wéi méiglech, huet de Presidentepalais zu Seoul e Freideg de Moien eiser Zäit matgedeelt. De President aus Südkorea ass an der Haaptstad mat dem sougenannte protokollaresche Vertrieder aus Nordkorea an der Schwëster vum Kim Jong Un fir Gespréicher zesumme komm.



Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.