FOTOEN a VIDEO: Pyeongchang 2018: Dag 13Slalom-Gold fir Myhrer, Osch an 1. Manche eliminéiert

Am RTL-Videosinterview huet de Matthieu Osch erkläert, datt de Grond fir den Out virun allem déi schwiereg Schnéikonditioune waren.

Op den olympesche Wanterspiller zu Pyeongchang war an der Nuecht vun e Mëttwoch op en Donneschdeg den zweeten a leschten Optrëtt vum Matthieu Osch. De Lëtzebuerger Schifuerer, deen am Riseslalom den 62. gouf, hat am Slalom keng Chance an ass direkt an der éischter Manche ausgescheet.

De Matthieu Osch erkläert säi Laf am Slalom



Slalom Matthieu Osch (22.02.2018)
De Lëtzebuerger Schifuerer, deen am Riseslalom den 62. gouf, hat am Slalom keng Chance an ass direkt an der éischter Manche ausgescheet.


Kee gudden Dag hat och ee vun de grousse Favoritten de Marcel Hirscher erwëscht. Den Éisträicher, deen am Riseslalom an an der Kombinatioun scho Gold gewonnen huet, ass während der 1. Manche no nëmmen 22 Sekonnen ausgescheet. Zanter zwee Joer ass dem Hirscher dat net méi geschitt.

D'Medailen hunn dunn anerer ënnert sech ausgemaach. No der éischter Manche loung den Norweger Henrik Kristoffersen mat engem Virsprong vun 21 Honnertstel op de Schwed Andre Myhrer a Féierung. Drëtte war de Fransous Victor Muffat-Jeandet op 62 Honnertstel.

Olympesch Wanterspiller: Den Iwwerbléck vum 13. Dag (22.02.2018)
Slalom-Gold fir Myhrer, Osch an 1. Manche eliminéiert


An der zweeter Manche gouf d'Resultat nach eng Kéier op d'Kopp gehäit. Um Enn gewënnt de Schwed Andre Myhrer d'Goldmedail. Sëlwer geet un de Schwäizer Ramon Zenhäusern, hien ass vun der 9. op déi 2. Plaz an der zweeter Manche no vir gefuer. Bronz séchert sech den Éisträicher Michael Matt, deen no der 1. Manche nach den 12. war. Den Henrik Kristoffersen ass kuerz nom Start an der 2. Manche ausgescheet.

Den Andre Myhrer ass mat 35 Joer iwwregens den eelste Slalom-Olympiagewënner an der Geschicht.

Am Ganze waren 108 Athleten um Depart, 52 sinn der an den zweete Laf komm an do goufen der 43 klasséiert.

Den Andre Myhrer© afp


An der Kombinatioun am Schi Alpin huet sech d'Schwäizerin Michelle Gisin d'Goldmedail geséchert. Sëlwer geet un d'Mikaela Shiffrin. D'Amerikanerin hat e Réckstand vun 97 Honnertstel. Bronz war fir d'Schwäizerin Wendy Holdener op 1,44 Sekonnen. D'Lindsey Vonn loung no der Descente nach a Féierung, ass allerdéngs am Slalom fréi ausgescheet.

Am Äishockey bei den Dammen huet sech d'USA d'Goldmedail geséchert. Si konnt sech an der Finall mat 3:2 no Penalty-Schéissen géint Kanada behaapt.

© afp


An der nordescher Kombinatioun gouf et nees eng Kéier eng Goldmedail fir Däitschland. D'Staffel konnt sech mat engem Virsprong vun 52 Sekonnen op Norwegen d'Victoire sécheren. Um Podium stoung nach Éisterräich op 1 Minutt a 7 Sekonnen.

© afp


Am Snowboard huet bei den Dammen an der Kompetitioun Big Air d'Anna Grasser Gold gewonnen. D'Éisterräicherin huet sech virun der Amerikanerin Jamie Anderson an der Australierin Zoi Sadowski-Synnott duerchgesat.

Am Schi Freestyle war an der Halfpipe den Amerikaner David Wise de Beschten. Um Podium stoungen nach den Amerikaner Alex Ferreira an den Australier Nico Porteous.
 
Am Shorttrack bei den Hären huet de Chines Dajing Wu iwwer 500 Meter gewonnen. D'Éireplaze ware fir déi zwee Südkoreaner Daeheon Hwang an Hyojun Lim. Iwwer 1000 Meter bei den Damme war d'Hollännerin Suzanne Schulting déi Bescht. Sëlwer war fir d'Kim Boutin aus Kanada a Bronz huet d'Italienerin Arianna Fontana gewonnen. An der Härestaffel huet Ungarn Gold gewonnen, dat viru China a Kanada.

FOTOGALERIE: Olympesch Wanterspiller, Dag 8-10 (Fotoe vun ATP)

FOTOGALERIE: Olympesch Wanterspiller, Dag 1 - 7 (Fotoen ATP)

FOTOGALERIE: Riseslalom mam Matthieu Osch, Andréck vum Yakushi

FOTOGALERIE: Olympesch Wanterspiller: Grand-Duc, Matthieu Osch a COSL a Südkorea (Fotoe vum Qian Jun))

FOTOGALERIE: Olympesch Wanterspiller, Ouverture (Fotoe vun ATP)

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.