FOTOEN a VIDEO - BasketBéid Couppe gi genee wéi d'lescht Joer op Steesel

Um Samschdeg stoungen an der Coque d'Finalle vun der nationaler Coupe um Programm. Bei den Dammen an den Häre huet Steesel Ettelbréck geklappt.

Nodeems d'Amicale sech d'lëscht Joer béid Couppe konnt sécheren, stoungen déi Steeseler och dëst Joer mat den Dammen ewéi och den Hären erëm an der Finall. Während Steesel bei den Dammen mat der Favoritteroll géint Ettelbréck an de Match gaang ass, sinn d'Häre vu Steesel op eng Ettelbrécker Equipe gestouss, déi säit dem November 2017 ongeschloe war.

Um Enn konnt sech bei den Dammen no enger enker Schlussphas d'Amicale mat 57:56 géint d'Etzella d'Coupe sécheren. Bei den Häre war et méi eng kloer Affär. Steesel wënnt hei mat 75:54.

LINK: Den Iwwerbléck vun der Coupe am Basket

Hären: Steesel - Ettelbréck   75:54

Steesel léisst der Etzella keng Chance a gewënnt d'Coupe (18.03.2018)
Bei den Häre gouf et an der Finall vun der Coupe am Basket eng 75:54-Victoire fir d'Amicale Steesel, déi domadder hiren Titel verdeedegen.


Genee ewéi bei den Dammen ware béid Equipen ufanks ganz nervös a virun allem bei Steesel ass et offensiv guer net gerullt. Eréischt no dräi Minutte konnt de Bob Melcher den éischte Kuerf fir seng Faarwe markéieren. Virun deem Kuerf loung d'Amicale schonns 7:0 hannen. Och wann de Coupe-Verdeedeger lo am Match war, waren et awer déi Ettelbrécker, déi dem Match de Stempel opgedréckt hunn. No 10 schwaache Minutte vu béiden Equippe loung d'Etzella mat 15 op 10 vir an et war fréi kloer, dass de Match an der Defense géif entscheed ginn.

Klickt op d'Foto, fir bei déi ganz Galerie vum Roland Miny ze kommen.© Roland Miny


Am zweete Véierel ass Steesel offensiv erwächt a konnt mat dräi konsekutiven Dräier 19:19 gläichzéien. Vun deem Moment u war de Match ganz ausgeglach a keng Equipe konnt sech ofsetzen. Mam Score vun 33 op 32 fir Ettelbréck ass et no haart ëmkämpften 20 Minutten an d'Paus gaang. Nach net richteg am Match war zu deem Moment de Shevon Coleman, dee just zwee Punkten an der 1. Halschent konnt markéieren. 

Härebasket - de ganze Match: Coupefinall Etzella-Stessel (18.03.2018)
.


Nom Téi konnt Steesel sech mat engem Kuerf vum Bob Melcher direkt d'Féierung sécheren an huet déi och direkt bis op véier Punkten ausgebaut. Genee wéi Steesel an der éischter Halschent hat Ettelbréck Problemer, de Wee mam Ball an de Kuerf ze fannen an huet réischt no dräi Minutten den éischte Kuerf geschoss. Déi Steeseler iwwerdeems hunn ënnert dem Impuls vum Pitt Koster an dem Bob Melcher de Match u sech gerappt a konnten ee Moment bis op 45 op 37 fortzéien. No engem Time-Out vum Ettelbrécker Trainer Kresimir Basic huet Ettelbréck wuel versicht, besser an Match ze fannen, mee dëst ass hinne just bedéngt gelongen, well bei Steesel ass et richteg gutt gerullt. Mat engem ganz wichtegen Dräier konnt de Jairo Delgado seng Faarwen awer nach virum leschte Véierel op sechs Punkten erubréngen. Virun de leschten 10 Minutten war also nach alles op.

© Jeff Kettenmeyer


Och am véierte Véierel hu sech béid Equippen offensiv nach ganz schwéier gedoen an den Ecart ass konstant bei véier Punkte bliwwen. No engem Dräier vum McDaniel an dräi weidere Kierf vum Koster a Coleman war d'Avance dunn awer ganz séier bei 13 Punkten a Steesel huet de Match net méi aus der Hand ginn, fir um Enn d'Coupe vum leschte Joer ze verdeedegen. Steesel setzt sech also mat 75 op 54 géint Ettelbréck duerch.

FOTOGALERIE: D'Härefinall vum Roland Miny op pressphoto.rtl.lu.

© Shari Schenten


Dammen: Steesel - Etzella Ettelbréck   57:56

Dammebasket: Steesel decidéiert Coupefinall fir sech (18.03.2018)
E Samschdeg den Owend konnt sech Steesel no enger spannender Schlussphas mat 57:56 géint Ettelbréck behaapten.


Béid Equippe si ganz nervös an de Match gestart an et si ganz wéineg Kierf geschoss ginn. Sou koum et, dass et no fënnef Minutte just 2:4 fir d'Etzella stoung. Dunn hu béi Equippe lues awer sécher hir Nervositéit ofgeluecht a konnten eng besser Trefferquote opweisen. Virun allem bei der Etzella si lo puer Schëss vu bausse gefall, sou dass si mat engem 15 op 9 Avantage an den zweete Véierel gaange sinn.  

Klickt op d'Foto, fir bei déi ganz Galerie vum Roland Miny ze kommen.© Roland Miny


FOTOGALERIE: Andréck vun der Damme-Finall vum Maya a Robert Straus.

Och am Ufank vun den zweeten 10 Minutte ware si déi besser Equipe an hu sech schéi Kierf erausgespillt. Ma an der Mëtt vum zweete Véierel hunn d'Ettelbrécker Dammen dunn awer bëssen de Fuedem verluer a loungen an der 17. Minutt fir d'éischte Kéier hannen (23:24). Mam Score vu 27 op 25 fir Steesel ass et dunn och an d'Paus gaang.

Dammebasket - de ganze Match: Coupefinall Etzella-Steesel (17.03.2018)
Um Enn konnt sech Steesel duerchsetzen an den Titel verdeedegen.


An der zweeter Halschent huet Steesel dunn direkt ee Gang eropgeschalt a bei den Ettelbrécker ass guer näischt méi zesummegelaf. Duerch een 12:2 Laf konnt Steesel sech dunn och séier eng 39 op 27 Avance erausspillen. Bei Ettelbréck war einfach dee Moment vill Pech am Spill an och déi liicht Kierf sollten net méi falen. Steesel huet dovunner profitéiert a seng Avance Punkt fir Punkt ausgebaut. Mam Score vun 49 op 36 ass et an de leschte Véierel gaang.

Hei huet Ettelbréck nach eng Kéier alles probéiert, fir de Réckstand ze verkierzen an duerch zwee séier Dräier ass hinnen dëst och gelongen. Ettelbréck war elo richteg gutt am Match a konnt mat 7 weidere Punkten am Ganzen een 13:2 realiséieren. Dee Moment war de Score siwe Minutte viru Schluss 52 op 49 fir Steesel an de Match war erëm spannend. De Match war elo de Contraire vum 3. Véierel. Bei Ettelbréck huet alles geklappt a bei Steesel guer näischt. D'Amicale huet sech dräi Minutte viru Schluss beim Score vun 57 op 54 just nach probéiert d'Féierung iwwer d'Zäit ze retten. Dëst ass hinnen och in extremis gelongen a sou kann d'Amicale no enger 57 op 56 Victoire d'Coupe och dëst Joer mat op Steesel huelen. 

FOTOGALERIE: D'Dammefinall vum Roland Miny op pressphoto.rtl.lu.

© Screenshot RTL


Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.