BundesligaLeipzig sechert sech géint Bayern München 3 Punkten

Um Sonndeg konnt sech am éischte vun 3 Matcher de BVB mat 1:0 géint Hannover 96 behaapten. Leverkusen verléiert de Rheinderby géint Köln mat 0:2.

© afp
RB Leipzig - Bayern München 2:1
No der éischter Halschent stoung et 1:1 an dat war duerchaus glécklech fir d'Bayern well déi Münchner hate just ee Schoss op de Goal an dee war dann och dobannen. An der 12. Minutt war et nämlech de Rodriguez deen an de Strofraum geflankt huet, an do stoung de Wagner ganz fräi a konnt aus 6 Meter an de Goal käppen. No 37 Minutten konnt Leipzig dann awer verdéngt ausgläichen. E Schoss vum Werner gëtt ofgeblockt mee de Ball flitt dem Keita an d'Féiss an dee kann aus 6 Meter an de Goal schéissen.

Och an der zweeter Halschent ass Leipzig déi besser Equipe bliwwen a konnt an der 56. Minutt da souguer a Féierung goen. En Ofschlag vum Gulacsi kann de Süle net klären, de Keita huet op de Werner duerchgestach an deen iwwerwënnt den Ulreich aus 12 Meter. Dono huet Bayern op den 2:2 gedréckt mee dëst ass hinnen awer net gelongen a verléieren hiren drëtte Match an dëser Bundesliga-Saison.

Köln - Leverkusen 2:0
Vun Ufank un koum Leverkusen net gutt an de Match a Köln dogéint huet déi typesch Derbymentalitéit gewisen a sinn an der 9. Minutt dann och verdéngt mat 1:0 a Féierung gaangen. No enger gudder Kombinatioun op der lénker Säit, passt de Bittencourt de Ball an d'Mëtt op den Osako an deen huet keng Problemer aus 10 Meter de Ball am Goal ënner ze bréngen. An der 33. Minutt huet den Alario vu Leverkusen dann nach d'Nerve verluer an opgrond vun engem Schlag mam Ielebou an d'Gesiicht vum Maroh déi rout Kaart gesinn.

Leverkusen ass ganz gutt aus der Paus komm a wollt direkt den Ausgläich markéieren, wat hinnen awer net gelénge sollt. An no 69 Minutten stoung et no engem schlëmme Feeler vum Aranguiz dann 2:0. De Chilen wollt de Ball op de Leno zeréck käppen mee den Zoller ass awer dozweschent gaangen, huet de Ball iwwert de Leno gehuewen an de Ball huet am Filet ageschloen. Dono war fir Leverkusen mat engem Mann manner dann näicht méi ze maachen an den Tabelleleschten gewënnt mat 2:0 de Rheinderby.

© afp


Dortmund - Hannover 1:0
An den éischte 45 Minutten huet de BVB zwar keen Zauberfootball gespillt mee et war awer eng engagéiert a konzentréiert Leeschtung. Nom 1:0 an der 24. Minutt war de Knuet bei Dortmund geplatzt. Als éischt schéisst de Schürrle e Corner bal direkt an de Goal mee den Tschauner kann nach esou grad paréieren. Den zweete Corner kënnt dann op den éischte Potto, wou de Batshuayi de Ball mat der Hack an de laangen Eck deviéiert. Dono huet Dortmund dann och méi befreit opgespillt a war déi dominéierend Equipe.

An der zweeter Halschent huet Hannover sech dann e bësse méi getraut mee richteg gutt Goalchancen sinn awer ausbliwwen. Vun Dortmund ass och net méi souvill komm mee an der 70. Minutt haten se dann awer eng grouss Chance. Op 16 Meter krit den Dahoud de Ball vum Batsuhayi mee säi Schoss geet just puer Zentimeter laanscht de rietse Potto. An de Schlussminutten hat Dortmund nach eng kéier zwou gutt Chancen duerch de Philipp an de Batsuhayi mee et sollt kee Goal méi falen an et ass beim 1:0 bliwwen.

© afp


LINK: Den Iwwerbléck vun der Bundesliga

Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.