FOTOEN: BGL Ligue, 21. SpilldagNidderkuer klappt d'Jeunesse an den F91 wënnt a leschter Sekonn

Am nationale Futtballchampionnat gouf et um 21. Spilldag eng Victoire fir Nidderkuer, Diddeleng, de Racing a Péiteng.

Rouspert an Hamm, Stroossen-Déifferdeng esouwéi Hueschtert a Rodange trennen sech mat engem Gläichspill. 

Rouspert - Hamm Benfica 1:1

Fir Rouspert stoung och op dësem Spilldag am Ofstigskampf ganz vill um Spill. Dëst waren sech déi Rousperter Spiller och bewosst an hunn déi éischt Halschent ganz kloer dominéiert. Hamm hat guer näischt dergéint ze setze mee der Lokalekipp sollt et net geléngen de Ball am Filet ënnerzebréngen. An der zweeter Halschent sollt dëst besser klappen. Mat engem stramme Schoss an de rietsen Eck huet den Hartmann  seng Faarwe konnten a Féierung bréngen. An der 85. Minutt huet Hamm Rouspert mat enger super Gol vum Mokrani dunn awer nach konnte schocken an esou deelen sech béid Ekippen mat 1:1.

© Eugène Thommes


Nidderkuer - Jeunesse 1:0
An enger éischter Halschent déi just ganz wéineg Héichpunkten ze bidden hat, konnt keng Ekipp sech Virdeeler verschafen. Eréischt an der 70. Minutt huet de Karayer no enger Flank vum Sébastien Thill konnten den 1:0 schéissen. Dëst sollt och den eenzege Gol vum Dag bleiwen, sou dass de Progrès sech Doheem dräi Punkten ka sécheren. 
© Mike Kinn


Racing - Munneref 2:0
FOTOE vum Maya a Robert Straus

© Robert Straus


Nodeems et och an dësem Match ganz laang 0:0 stoung, ass d'Lokalekipp an der 72. Minutt no super Viraarbecht vum Bahloul duerch den Osmanovic a Féierung gaang. An der 91. Minutt huet de Jahier de Sak dunn definitiv zougemaach an de Racing wënnt verdéngt mat 2:0 géint Munneref.

© Gilles Alessandro Carlizzi


Péiteng - US Esch 4:1

Ganz genau 10 Sekonnen huet et gedauert dunn hat et schonns am Gol vun den Escher gerabbelt. No enger Reckpass op den Escher Keeper Lopes huet dëse probéiert mam Ball ze dribbelen. Dëst ass him awer net all ze gutt gelongen well de Banza ass un de Ball komm a konnt op 1:0 setzen. Esch huet also ganz fréi engem Réckstand missen hannendrulafen. An der 21. Minutt ass hinnen awer gelongen duerch een direkte Fräistouss vum Thonon de Match erëm auszegläichen. Kuerz virun der Paus huet Péiteng no engem schéine Kapball vum Banza awer d'Féierung erëm iwwerholl. Direkt no der Paus hunn d'Spiller vum Titus dunn direkt nach ee konnten dropsetzen. No enger schéiner Pass an de Laf huet sech de Basic gutt konnten duerchsetzen an huet op 3:1 erhéijt. An der 67. Minutt huet de Banza mat sengem drëtte Gol vum Dag fir déi definitiv Entscheedung gesuergt.

© Bryan Gomes


Fola - Diddeleng 2:3

Tëscht der Fola an dem F91 Diddeleng sollt et bal genee esou séier lassgoen ewéi am Match tëscht Péiteng an der US Esch. No net manner ewéi 30 Sekonnen huet de Nationalspiller Dave Turpel nämlech den aktuelle Champion konnten a Féierung schéissen. D’Äntwert op Escher Säit huet awer net laang op sech waarde gelooss. Just 2 Minutte méi spéit huet de Saiti nämlech ausgeglach an de Match huet schonns no dräi Minutten dat gewisen wat ee sech versprach hatt. No ganz vill weidere Chancen an intensiv geféierten Dueller war et an der 37. Minutt de Ryan Klapp dee mat sengem 6. Gol vun der Saison konnt de Match dréien. An der 66. Minutt sollt et awer op ee neits den Dave Turpel sinn deen de Match konnt ausgläichen. No engem Feeler vum Golkeeper Cabral bei engem Diddelenger Corner, huet den Turpel an der 66. Minutt am séierste reagéiert an huet de Ball äiskal eragesat. An der Schlussphase huet Diddeleng nach eng Kéier alles no vir geheit an et sollt hinne schlussendlech och nach d'Konschtstéck geléngen an der 93. Minutt den decisive Gol ze markéieren. No engem weidere Feeler vum Escher Golkeeper, dës Kéier vum mëttlerweil agewiesselten Clement, konnt den Dave Turpel mat sengem drëtte Gol vum Dag den Diddelenger dräi Punkte retten.

© Serge Olmo


Hueschtert - Rodange 1:1

Rodange wollt sech an dësem Match weider Loft am Ofstigskampf verschafen an ass och ganz gutt an de Match komm. Dëst sollt och fréi belount gi wëll no 14. Minutten huet Rodange duerch den Menai den 1:0 markéiert. Duerno ass bei de Gäscht awer net méi vill zesummegelaf an an der der 71. Minutt huet de René Peters de Match mat engem direkte Fräistouss nach konnten ausgläichen.   

© Joe Haas


Stroossen - Déifferdeng 2:2

© Val Wagner


FOTOE vum Val Wagner

An enger schwaacher 1. Halschent waren déi Stroossener zwar déi bësse besser Ekipp mee et sollt hinnen bis déi 68. Minutt nach net geléngen den éischte Gol vun der Partie ze schéissen. Dunn huet de Pedro dos Santos dat awer geännert an hien huet no engem Corner de Wee an de Filet fonnt. 10 Minutte méi spéit huet de Caron mat engem Käppert konnten ausgläichen. An de Schlussminutten ass et dunn Schlag op Schlag komm. Fir d’éischt huet den Delgado an der 87. Minutt mat engem Kappballgol op Stroossener Säit den 2:1 geschoss mee just zwou Minutte méi spéit huet den Almeida erëm ausgeglach an de Match geet mat engem gerechten 2:2 op een Enn.

© Ken D'Antonio

 

D'Resultater am Iwwerbléck:

Rouspert - Hamm Benfica 1:1

Nidderkuer - Jeunesse 1:0

Stroossen - Déifferdeng 2:2

Fola - F91 Diddeleng 2:3

Racing - Munneref 2:0

Péiteng - US Esch 4:1

Hueschtert - Rodange 1:1

Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.