VIDEOEN: Basketball HalleffinallenSteesel gläicht aus an Ettelbréck geet 2:0 a Féierung

Steesel hellt mat mat enger 76:70 Victoire d'Revanche géint Esch an Ettelbréck dominéiert d'Musel Pikes mat 87 op 64.

© rtl.lu
Esch - Steesel 70:76
Der Amicale gléckt d'Revanche géint de Basket Esch (15.04.2018)
Steesel wënnt 2. Halleffinall mat 76:70 zu Esch.


Während den éischte Véierel nach ganz equilibréiert war a Steesel no 10 Minutten mat 17 op 15 vir loung, hunn Spiller vun der Amicale sech am zweete Véierel konnten ee Lach vun aacht Punkten erausspillen.
An drëtte Véierel hunn déi Escher awer gewisen, dass si sech an dësem Match net esou einfach geschloe ginn an hunn de Réckstand no 30 Minutten op just nach ee Punkt verkierzt. D'Entscheedung sollt also am leschte Véierel falen. Hei ass bei den Escher awer net méi alles esou ronn gelaf ewéi si sech dat erwaard haten an Steesel konnt bis op 11 Punkte fortzéien. Obwuel Esch nach eng Kéier alles probéiert huet, ka sech Steesel  mat 76:70  zu Esch duerchsetzen an domadder d'Best-of-Five Serie 1:1 ausgläichen. Den drëtte Match gëtt e Mëttwoch zu Steesel gespillt.
© Shari Schenten


Hei nach eemol de ganze Match am Replay kucken:



Musel Pikes - Ettelbréck 64:87

Pikes hunn och an der 2. Partie keng Chance géint d'Etzella (15.04.2018)
Musel Pikes verléieren 64:87 a leien elo an der Best-of-Five-Serie 0:2 hannen.


Nodeems d’Musel Pikes am éischte Match en Donneschden ganz ferm ënner d’Rieder komm sinn, wollten si um Sonndeg eng Reaktioun weisen. Dëst sollt hinnen am Ufank awer guer net geléngen. De Match ass nämlech genau esou verlaf ewéi am éischte Match. Ettelbréck huet de Rebound dominéiert an hier Schëss getraff während bei de Miseler net vill zesummegelaf ass. An der Paus konnt Ettelbréck och schonns eng Avance vun 17 Punkte verzeechnen. Am drëtte Véierel hunn d’Miseler sech awer mat engem aner Gesiicht gewisen a virun allem d’Amerikaner Green a Gulley hunn sech géint eng Néierlag gewiert. Et sollt de Miseler och geléngen op 13 Punkten erunzekommen mee dunn huet Ettelbréck entscheet nach eng Kéier unzerappen a si hunn kuerze Prozess mat der Lokalekipp gemaach. Een 12:0 Laf huet de Virsprong nach virum 4. Véierel op 71 op 46 geschrauft an de Match war definitiv entscheed. An de leschten 10 Minutten ass de Virsprong esouguer nach bis op 30 Punkten ugewuess. Eng ganz staark Ettelbrécker Ekipp léisst also och am zweete Match de Musel Pikes keng Chance a wënnt um Enn viru 553 Spectateuren mat 87 op 64. Den drëtten a villäicht schonn entscheedende Match ass en Donneschdeg um hallwer 9 zu Ettelbréck.

FOTOGALERIE: Biller vum Match Musel Pikes-Etzella vum Maya a Robert Straus.

© Maya a Robert Straus


Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.