BarragëmatchMamer wënnt a praktesch leschter Minutt géint Luerenzweiler

Mamer wënnt mat 1:0 géint Luerenzweiler dat duerch ee Gol vum Barbosa an der 91. Minutt. Domat spille si och déi nächst Saison nach an der Éierepromotioun.

© Eric Karier
En Donneschdeg um 19.30 Auer huet den Här Torres d'Partie tëscht Mamer aus der Éierepromotioun a Luerenzweiler aus der 1. Divisioun ugepaff.

D'Partie gouf zu Kielen am Stade Albert Berchem gespillt an et war d'Ekipp vu Mamer déi besser an dës Partie gestart sinn. Nodeems an der Ufanksphas béid Ekippe sech e bëssen ofgetaascht hunn an ee gemengt huet Luerenzweiler géing lues awer sécher d'Kontroll iwwerhuelen, esou war dat just bis zur 14. Minutt de Fall.

Do hat Mamer nämlech déi éischt gutt Geleeënheet duerch de Fabio Barbosa. De Spiller vu Mamer huet do eng éischte Kéier d'Qualitéite vum Sacha Mersch am Gol vu Luerenzweiler gepréift. De Golkipp konnt de Ball awer mat de Fäischt ofwieren.

Mamer war elo déi besser Ekipp, si hunn an dëser Phas d'Heft an d'Hand geholl a gedréckt an esou koume si zu enger weiderer gudder Geleeënheet an erëm war et de Fabio Barbosa. Mamer ass eng Konter-Attack iwwer déi lénks Säit gelaf, an der Mëtt stoung de Barbosa fräi, ma hien huet de Gol net getraff.

Luerenzweiler huet elo awer missen eng Reaktioun weisen an dat ass hinnen an der 33. Minutt och gelongen. Luerenzweiler krut hei nämlech ee Fräistouss aus gudder Positioun, de Kapitän, de Patrick Neves huet sech där Saach ugeholl a säi Schoss ass nëmme ganz knapps laanscht de Gol gaangen.

Ma nëmmen 3 Minutten drop eng weider gutt Geleeënheet fir Mamer. De Mohamed Baizidi ass um 11-Meter un de Ball komm an huet geschoss, ma de Mersch am Gol konnt de Ball mat der Broscht paréieren.

Kuerz virun der Paus huet de Sergio Teixeira et dunn och nach eemol probéiert aus ronn 15 Meter, ma och hie konnt de Sacha Mersch net iwwerwannen, esou dass et ouni Goler an d'Paus gaangen ass.



An der Paus huet keng vu béiden Ekippe gewiesselt, ma de Jerôme Bigard, den Trainer vum FC Luerenzweiler schéngt an der Kabinn déi richteg Wierder fonnt ze hunn, fir seng Spiller ze motivéieren, well déi sinn nawell gutt aus der Kabinn komm.

Nëmme kuerz nodeems den Här Torres déi zweet Hallschent ugepaff huet, hat Luerenzweiler a Persoun vum Daniel Lopes eng gutt Geleeënheet, mee de Mike Federspiel konnt de Ball paréieren.

Déi 1.269 Spectateuren zu Kielen hunn elo een anert Gesiicht vu Luerenzweiler gesinn. Si stoungen elo hanne besser a konnte sech Chancen erausspillen, esou och an der 58. Minutt.

No engem Corner koum nämlech de Ben Funck mam Kapp un de Ball a säi Kappball war ganz geféierlech, mee de Golkipp vu Mamer konnt de Ball mat engem wonnerbare Reflex halen.

Der Ekipp vu Mamer ass et elo e bëssen ze séier gaangen, Luerenzweiler war elo mat mat vill Confiance ënnerwee an ass sou ëmmer méi geféierlech ginn, no bësse méi wéi enger Stonn hat Mamer Chance, dass den Amine Hamouni de Ball, eleng virum Golkipp, net kontrolléiert krut.

Wéi Luerenzweiler op een éischte Gol gedréckt huet, koum dunn awer d'Reaktioun vu Mamer. De Sergio Texeira huet ee richtege secke Schoss ofginn, mee e war net placéiert genuch, fir de Mersch ze iwwerwannen.

An der Schlussphas huet Mamer dunn awer nees dominéiert. Fir d'éischt hat de Mohamed Baizidi eng Méiglechkeet an dono den Denis Rizvani, ma entweder hu si de Gol net getraff oder de Sacha Mersch war op der Plaz.

An der éischter Minutt vun der Nospillzäit huet de Fabio Barbosa den FC Mamer 32 dunn erléist, hie konnt Mamer nämlech mat 1:0 a Féierung bréngen.

Luerenzweiler hat keng Äntwert méi an esou bleift Mamer an der Éierepromotioun a Luerenzweiler bleift an der 1. Divisioun.



Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.