BarragëmatchRouspert gewënnt 2:0 géint Käerjeng a bleift an der BGL Ligue

Rouspert konnt sech duerch Goler vum Jeff Lascak an dem Timo Heinz an der 84. respektiv 90. Minutt géint Käerjeng behaapten.

E Freideg den Owend gouf de Barragëmatch tëscht der Victoria Rouspert, dem 12. aus der BGL Ligue, an der UN Käerjeng, dem 3. aus der Éierepromotioun, gespillt. No 90 Minutte konnt sech Rouspert mat 2:0 géint d'UN Käerjeng behaapten a bleift domadder an der BGL Ligue.

Déi Käerjenger waren iwwer wäit Strécken am Match déi besser Ekipp an haten och déi méi geféierlech Golchancen. De Ball wollt awer einfach net an de Gol goen, dat sollt dunn an de leschte Minutte bestrooft ginn. An der 84. Minutt ass d'Victoria um Verluerekascht nämlech mat 1:0 a Féierung gaangen. De Kapitän Gaspar hat de Lascak perfekt an d‘Déift geschéckt an de Rousperter Buteur ass virum Ottele äiskal bliwwen an huet de Ball flaach an de kuerzen Eck geschoss. Fir déi Käerjenger sollt et nach méi batter kommen. An der 90. Minutt huet den Arbitter op den Eelefmeterpunkt gewisen, dat no engem Foul vum Fernandes um Hartmann. Den Timo Heinz huet sech der Saach ugeholl a fir Rouspert op 2:0 gesat.

Rouspert gewënnt um Enn mat 2:0 a bleift an der BGL Ligue.



Barragematch - Rouspert bleift dran: E Reportage vum S.Olmo



De LIVETICKER vum Match Rouspert géint Käerjeng

De Resumé vum Match
An der Ufanksphas hu béid Ekippe sech gréisstendeels ofgetaascht. Käerjeng huet probéiert, iwwer d‘Säiten iwwer den Alessandro Alunni ze kommen an humat Flanken op den Tobias Baier, hire grousse Stiermer an der Mëtt gesicht. Rouspert huet iwwerdeems méi probéiert, de Ball duerch déi eege Reie lafen ze loossen.

An der 14. Minutt dunn déi éischt gutt Geleeënheet vum Match an dat fir d‘Ekipp vu Rouspert. De Bartsch konnt de Ball am Mëttelfeld recuperéieren an huet de Weirich op der rietser Säit lancéiert, deen huet de Ball direkt weider an de Laf vum Bartsch gespillt, ma säi Schoss konnt in extremis geblockt ginn.

3 Minutte méi spéit dunn een éischt Liewenszeeche vun de Käerjenger. De Skrijelj huet sech een Häerz geholl an huet aus ronn 30 Meter ee stramme Schoss ofginn, de Bürger konnt de Ball awer mat engem flotte Plongeon an de Corner-Aus deviéieren.

D‘Partie ass duerno esou lues och méi aggressiv ginn, de Spillfloss gouf ëmmer erëm duerch Fouls ënnerbrach. An dëser Phas hu béid Ekippe probéiert, hirem Spill eng Linn ze ginn an dat ass de Käerjenger ee gutt Stéck besser gelongen. Esou war et an der 31. Minutt den Alessandro Alunni, deen op lénks duerchgaangen ass an aus spatzem Wénkel e stramme Schoss ofginn huet, ma de Bürger konnt mat engem gudde Reflex de Ball deviéieren.

Eng weider ganz déck Méiglechkeet fir Käerjeng, fir hei a Féierung ze goen. No engem Fräistouss vum Cassan aus ronn 35 Meter koum de Bourgeois um 5-Meter un de Ball an huet d‘Richtung vum Ball verännert, mee de Bürger krut iergendwéi mat engem eemolege Reflex nach d‘Hand an d‘Luucht gestreckt, fir de Ball iwwer d‘Lat ze drécken.

An der 43. Minutt war et dunn awer op där anerer Säit eng gutt Chance fir Rouspert, de Jeff Lascak krut de Ball ronn 20 Meter virum Gol, dréint sech a schéisst, mee och den Ottele konnt hei weisen, wat e kann. Kuerz méi spéit huet hien nach een Distanzschoss vum Kevin Marques mat de Fäischt gehalen.

An der Paus stoung et domadder 0:0. Käerjeng war déi besser Ekipp an hat an den éischte 45 Minutte besser Chancen, ma de Match war bis dohinner eng kriddeleg Affär.

An der Ufanksphas vun der zweeter Hallschent gouf et nees eng Drockphas vun de Käerjenger, och wa si keen direkte Schoss op de Gol haten, esou hu si awer permanent fir Gefor gesuergt. Deelweis huet ee gemengt, Rouspert wier mam Kapp nach an der Kabinn.

Käerjeng huet elo esou richteg op den éischte Gol gedréckt an an der 63. Minutt war et bal esou wäit. Nodeems ee Schoss vum Skrijelj geblockt gouf, huet den Ewert de Ball eraus op de Cassan ginn, deem seng Flank ass um zweete Potto genau um Kapp vum Baier gelant, mee de Bürger, bis heihinner beschte Rousperter, huet op een Neits d‘Kuelen aus dem Feier geholl fir seng Ekipp.

Nëmmen zwou Minutte méi spéit huet et schonn nees bal gerabbelt. Den Ewert konnt op een Neits de Ball recuperéieren an hien huet den Hess op der Säit lancéiert. Déi Kéier stoung de Baier um éischte Potto, mee säi Kappball huet säin Zil verfeelt.

Ma Käerjeng konnt sech kuerz drop glécklech schätzen, dass si net bestrooft goufen, well no enger Konterattack vu Rouspert koum den Ottele esou just virum Hartmann un de Ball.

Elo goung et awer Schlag op Schlag, op där enger Säit verpasst Käerjeng a Persoun vum Cassan déi nächst Geleeënheet an am Géigenzuch hat Rouspert eng Chance, ma de Schoss vum Weirich goung iwwer de Gol.

Vun der 70. Minutt un ass Rouspert elo och nees besser an de Match komm. Déi besser Chancen hat awer weiderhi Käerjeng, esou huet den agewiesselten Dublin ee staarke Schoss aus der Distanz ofginn, ma de Bürger war nach ëmmer net ze klappen.

Rouspert war an dëser Phas virun allem iwwer Konterattacke geféierlech. Esou och an der 81. Minutt, ma esouwuel beim Schoss vum Hartmann, ewéi beim Schoss vum Lascak konnt d‘Käerjenger Defense entscheedend stéieren.

Héchststrof fir Käerjeng an der 84. Minutt, de Rousperter Kapitän, de Gaspar, schéckt de Jeff Lascak perfekt an d‘Déift an de Rousperter Buteur bleift virum Ottele äiskal a schéisst de Ball flaach an de kuerzen Eck. Den 1:0 fir Rouspert.

An der 90. Minutt huet den Arbitter dunn och nach op den Eelefmeterpunkt gewisen, dat no engem Foul vum Fernandes um Hartmann. De Rousperter Timo Heinz huet sech der Saach ugeholl a fir Rouspert op 2:0 gesat. Dat sollt och d'Schlussresultat sinn.

Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.