Fotoen: Futtball-WM am LivescoreKroatien start mat Victoire an d'WM

Frankräich gewënnt knapps mat 2:1 géint Australien, Argentinien spillt just 1:1 géint Island an Dänemark klappt Peru mat 1:0.

Kroatien start mat Victoire an d'WM (16.06.2018)
Frankräich gewënnt knapps mat 2:1 géint Australien, Argentinien spillt just 1:1 géint Island an Dänemark klappt Peru mat 1:0.
E Samschdeg sinn am Grupp C an am Grupp D déi éischt Partië gespillt ginn.

Am éischte Match vum Dag gewënnt Frankräich an engem schwaache Match mat 2:1 géint Australien. Ee vun de Favoritte vun deser WM huet sech immens schwéier gedoen a konnt an hirem éischte Match den Erwaardungen net gerecht ginn.

Argentinien huet sech un den Islänner d'Zänn ausgebass a koum net iwwert en 1:1 eraus. An der 63. Minutt huet de Messi en Eelefmeter verschoss.

Dänemark gewënnt mat 1:0 géint Peru duerch e Gol vum Yussuf Poulsen a kann sech domat glécklech schätzen well Peru hat richteg Drock gemaach mee krut de Ball net am Gol ënnerbruecht wat d'Dänen och engem staarke Schmeichel am Gol ze verdanken haten.

An engem onspektakuläre Match klappt Kroatien Nigeria verdéngt mat 2:0. D'Goler goufe vum Etobo (Selbstgol) a Modric (Eelefmeter) geschoss.



Football Weltmeeschterschaft


Kroatien - Nigeria 2:0 (1:0)
Kroatien war vun Ufank un déi besser Ekipp a konnt och méi Ballbesëtz verzeechnen. D'Nigerianer waren an der Offensiv zimlech harmlos a konnten sech kaum Golchancen erspillen. Kroatien dogéint hat puer Golchancen a konnt an der 33. Minutt a Féierung goen. No engem Kappball vum Mandzukic huet den Etobo de Ball an den eegene Gol ofgefälscht.

Déi zweet Halschent huet roueg ugefaangen a keng Ekipp konnt Akzenter setzen. No engem klammeren vum Ekong um Mandzukic huet den Arbitter awer op de Punkt gewisen. De fällegen Eelefmeter huet de Modric äiskal an de lénken Eck geschoss. Nigeria konnt och näischt méi entgéint setzen a Kroatien wënnt verdéngt mat 2:0.

Peru - Dänemark 0:1 (0:0)
An engem ganz animéierte Match mat guddem Tempo war Peru iwwert déi gesamt éischt Halschent gekuckt déi besser Ekipp. Mee trotz gudde Chancen konnte si kee Gol schéissen. Kuerz virun der Paus krut Peru gerechterweis en Eelefmeter accordéiert mee de gefoulte Cuevas huet dësen iwwert de Gol geschoss.

Am der 59. Minutt huet Dänemark déi éischt kéier e richteg gudde Konter gespillt a konnten direkt den 1:0 duerch de Poulsen vu Leipzig markéieren. Mee Peru huet dono richteg Drock op den Dänesche Gol gemaach an en Ausgläich wär héich verdéngt gewierscht, mee kruten de Ball einfach net iwwert d'Linn. Soumat gewënnt Dänemark glécklech géint eng gutt Ekipp aus Peru.

Argentinien - Island 1:1 (1:1)
Am Ufank huet Island sech net verstoppt an hat an der 10. Minutt déi éischt gutt Golchance vum Match duerch de Bjarnason mee deen huet de Ball net richteg getraff. Mee no an no huet Argentinien d'Kontroll iwwerholl an ass an der 19. Minutt duerch den Agüero a Féierung gaangen. Nëmmen 4 Minutte méi spéit huet Island awer geäntwert a konnt duerch de Finnbogason den 1:1 markéieren. Dono hunn d'Argentinier zwar gedréckt mee hunn sech géint eng gutt Islännesch Ekipp awer schwéier gedoen.

An den zweete 45 Minutten ass et dann och mam Drock vun Argentinien weidergaangen. An no 63 Minutten krut Argentinien en Eelefmeter zougesprach mee dëse gouf vum Halldorsson géint de Messi gehalen. Island ass net méi vill aus der eegener Halschent eraus komm an huet probéiert den 1:1 ze halen. An dëst ass hinne mat enger staarker defensiver Leeschtung och gelongen.

Frankräich - Australien 2:1 (0:0)
D'Favoritten aus Frankräich haten direkt ganz staark ugefaangen a konnte sech no den éischte 6 Minutten schonn 3 gutt Chancen eraus spillen. Australien huet awer gekämpft a konnt an der 17. Minutt bal a Féierung goen mee de Lloris konnt dëst mat enger Glanzparad verhënneren. An och dono huet Frankräich staark ofgebaut a konnt net iwwerzeegen.

10 Minutten no der Paus krut Frankräich en Eelefmeter no Videobeweis zougesprach an deen huet de Griezmann äiskal an de Gol geschoss. Mee nëmme 4 Minutte méi spéit krut Australien op der anerer Säit en Eelefmeter no engem Handspill vum Umtiti zougesprach an den Jedinak ass ganz cool bliwwen. 10 Minutten viru Schluss dann awer d'Erléisung fir eis Noperen duerch e Gol vum Pogba.



Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.