Futtball-WM: LivescoreKolumbien klappt Polen däitlech mat 3:0

Ausserdeem huet England Panama mat 6:1 deklasséiert a Japan an de Senegal hu sech no engem flotte Match mat 2:2 getrennt.

WM: Kloer Victoirë fir England a Kolumbien (24.06.2018)
Japan an de Senegal deelen 2:2. E Sonndeg gouf an de Gruppen G an H gespillt. Panama a Pole goufen eliminéiert.
An engem ganz eesäitge Match huet England mat 6:1 géint Panama gewonnen. 3 Goler vum Kane, 2 vum Stones an 1 vum Lingard hunn d'Victoire perfekt gemaach. De Baloy vu Panama konnt an der 78. Minutt nach den Eieregol schéissen.

Mat dëser Victoire hunn d'Three Lions sech den Ticket fir d'Aachtelsfinalle gebucht. An der K.o.-Phas stinn soumat och d'Belsch.

Am zweete Match vum Dag an dem éischten aus der Grupp H, spillen de Senegal a Japan 2:2 gläich. Et war eng animéiert Partie bei där béid Ekippen op eng Victoire gespillt hunn an an där et vill Golchance gouf. Fir Japan hunn den Inui an den Honda getraff a fir de Senegal waren de Mané an de Wagué erfollegräich.

Am leschte Match vum Dag hunn d'Polen iwwerraschend däitlech mat 0:3 géint Kolumbien verluer. Fir d'Kolumbianer konnten de Mina, Falcao a Cuadrado markéieren a soumat d'Hoffnung weider héich halen iwwert d'Gruppephas eraus am Turnéier ze bleiwen. Fir d'Polen dogéint ass d'WM no dëser Néierlag scho gelaf an am Match géint Japan geet et fir si just nach em d'Éier.

Football Weltmeeschterschaft


Polen - Kolumbien 0:3 (0:1)
Vum Départ ewech war et keng héichklasseg mee éischter eng emkämpfte Partie. Béid Ekippen kruten sech keng grouss Golchancen erausgespillt. Mee direkt mat der éischter richteg gudder Chance huet Kolumbien zougeschloen. An der 40. Minutt konnt de Mina, no enger Flank vum James Rodriguez, mam Kapp de Ball am Gol ënnerbréngen. Insgesamt war déi éischt Halschent awer op kengem gudde Niveau.

An och no der Paus konnt dëse Match net un déi aner zwou flott Partien uknäppen mee dësen huet einfach vun der Spannung gelieft. D'Polen ware nämlech gezwongen ze attackéieren well sos mussen se heem fueren. Mee et waren dann awer d'Kolumbianer déi hir Féierung ausbaue konnten. An der 69. Minutt stoung de Falcao alleng virum Szczesny an huet sech dat net méi huele gelooss. Nëmme 6 Minutte méi spéit huet de James eng Drampass op de Cuadrado gespillt an deen huet dunn alles kloer gemaach.

Domadder huet Polen keng Chance méi an d'Aachtelsfinallen ze kommen.

Japan - Senegal 2:2 (1:1)
Direkt mat der éischter Chance konnt de Senegal den 1:0 markéieren an dat mat Mathëllef vum Japanesche Golkipper. E Schoss op de Gol konnt de Kawashima just no vir op de Knéi vum Mané ofpralle loossen a vun do aus ass de Ball an de Gol gesprongen. Mee d'Japaner hu sech awer net bandrocke gelooss a konnten och offensiv Akzenter setzen. No 34 Minutten ass hinen dann och den 1:1 gelongen. No engem laange Ball an d'Spëtzt op de Nagatomo huet deen de Ball dem Inui iwwerlooss a géint de Schoss an de laangen Eck hat den N'Diaye keng Chance.

Och no der Paus ass et bei enger animéierter Partie bliwwen. Et war Japan déi besser an déi zweet Halschent komm sinn a konnten sech och grouss Chancen eraus spillen. Mee an der 71. Minutt war et awer de Senegal deen nees a Féierung konnt goen. No enger flaachen Flank an de Strofraum konnt de Wagué de Ball am Gol ënnerbréngen. Mee d'Japaner hu weider no vir gespillt a konnten sech verdéngt an der 78. Minutt belounen. 6 Minutten no senger Awiesselung huet den Honda, no Virlag vum Inui, de Ball just nach missen an de Gol schéissen.

De Keisuke Honda konnt den 2:2 markéieren© afp


England - Panama 6:1 (5:0)
England huet staark ugefangen a konnt och schonn no 8 Minutten mat 1:0 a Féierung goen. No engem Korner vum Trippier, gouf de Stones ganz alleng gelooss a konnt an de lénken Eck käppen. D'Englänner si weider dru bleiwen a 14 Minutten nom éischte Gol hat et fir déi zweet kéier gerabbelt. No engem Foul um Lingard huet den Arbitter op de Punkt gewisen an de Kane huet de Ball onhaltbar an de Gol geknuppt. An d'Englänner hu weider Gas ginn: No engem schéinen Doppelpass mam Sterling huet de Lingard de Ball wonnerschéin an de laangen Eck geschlenzt. Géint d'Offensivkraft hat Panama weiderhin näischt entgéint ze setzen an an der 40. Minutt konnt de Stones mam Kapp säin zweete Gol vum Dag markéieren. Fir Panama ass et awer ëmmer méi batter ginn a nëmme 5 Minutte méi spéit huet de Kane säin zweeten Eelefmeter am Filet ënnerbruecht.

No der Paus huet England, mat der héijer Féierung am Réck, et da méi lues ugoe gelooss an huet Panama och e bësse spille gelooss ouni awer vill zouzeloossen. Mee no 62 Minutten ass e Schoss vum Loftus-Cheek dem Kane widdert d'Hack gesprong an de Ball ass onhaltbar an de Gol geflunn. Panama wollt awer onbedéngt den éischte Gol op enger WM schéissen an dat ass hinnen an der 78. Minutt dann och gelongen. No engem Fräistouss konnt de Baloy de Ball mam Fouss iwwert d'Linn drécken.

Den Harry Kane huet elo an 2 Matcher scho 5 Goler geschoss© afp






Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.