Fotoe vum Glacis, Arel a MetzUmtiti käppt Frankräich an d'WM-Finall

Um Dënschdeg den Owend war den Duell vun eisen Noperen, dee Frankräich duerch e Gol an der 51. Minutt mat 1:0 géint d'Belsch fir sech entscheede konnt.

WM: Frankräich ass 1. Finalist/De Resume vum Franky Hippert



Um 20 Auer war den Upëff zu St. Petersburg an der Partie tëscht Frankräich an der Belsch. D'Belsch hätten et fir d'éischte Kéier an d'Finall vun enger Futtball-Weltmeeschterschaft packe kënnen. Frankräich stoung schonn zwee Mol an enger Finall a steet nom 1:0 géint d'Belsch eng drëtte Kéier dran.

Belsch-Frankräich (10.07.2018)
E puer Impressioune vum Match.


Umtiti käppt Frankräich an d'WM-Finall (11.07.2018)
Flott Biller vun der Ambiance.


Déi éischt 20 Minutten hunn däitlech eisen Noperen aus der Belsch gehéiert. Si hu sech e puer ganz gutt Chancen erausgespillt, dorënner den Hazard an den Alderweireld, ma entweder krut nach e Verteideger de Kapp oder Fouss dertëscht, oder awer de Lloris war op der Plaz. Ma och d'Fransousen hu sech net verstoppt an hunn et mat laange Bäll an d'Déift op de Giroux oder de séiere Mbappé, fir esou ze treffen.  Dono ass awer och Frankräich besser an de Match an doduerch och méi geféierlech virun de Gol vum Courtois komm, ma markéiere konnte si awer nach net.

Déi beschte Chance hat de Pavard no 40 Minutten, ma de Courtois krut nach just de Fouss an de Schoss vum Stuttgarter, esou datt et weider 0:0 stoung. Esou war dann och de Score an der Paus, dat awer vun enger animéierter Partie mat villen Offensivaktiounen op béide Säiten.

Béid Golkipper haten eng staark éischt Hallschent.© AFP (Archiv)


Kuerz no der Paus huet et du gerabbelt. No engem Corner vum Griezmann leeft den Umtiti op de éischte Potto, kann sech do géint Fellaini duerchsetzen an esou mam Kapp den 1:0 fir Frankräich markéieren. A Frankräich huet weider Drock gemaach a war mat zwou gréissere Chancen dem 2:0 ganz no. D'Belsch hunn e bësse gebraucht, fir sech vum Gol z'erhuelen, ma no eppes méi wéi enger Stonn hunn och si sech Chancen erausgespillt, ma sinn ëmmer nees um Lloris oder der staarker franséischer Defense hänke bliwwen.




D'Fransouse stoungen an der Defense kompakt an hunn op d'Konterméiglechkeete gelauert. D'Belsch, déi villes no Vir gehäit hunn, hu sech misste mat taktesche Feeler hëllefen, fir net an d'Konter ze lafen an hunn esou ugefaangen, giel Kaarten ze sammelen. D'Belsch hu missten no Vir spillen an hunn dat och gemaach, ma et sollt hinnen net geléngen, fir de wichtegen 1:1 ze markéieren, well Frankräich zum Schluss keng gutt Chancë méi zougelooss huet. Iwwer Konter haten d'Fransousen nach 2 gutt Chancen an der Nospillzäit, ma de Courtois war op der Plaz. Esou geet  les bleus ee Gol no 51 Minutten duer, fir dëse Match ze gewannen a als éischte Finalist vun dëser Weltmeeschterschaft festzestoen.





An der zweeter Halleffinall e Mëttwoch den Owend sti sech Kroatien an England géintiwwer.

D'Final gëtt e Sonndeg um 17 Auer eiser Zäit ugepaff. De Match ëm d'Plaz dräi gëtt e Samschdeg de Mëtteg um 16 Auer gespillt.

© Cliff Block / RTL Radio Lëtzebuerg


Wéi d'Ville de Luxembourg matdeelt, waren eng 5.000 bis 6.000 Leit op de Glacis komm, fir sech de Match unzekucken. Fir d'Finall e Sonndeg wéilt een d'Plaz awer vergréisseren.

Football Weltmeeschterschaft


Impressioune vun Arel a vu Metz


Eis Kollege vun 5minutes sinn zu Arel an zu Metz dobäi, fir do déi beschten Impressioune vum Gewënner ma och vum Verléierer vun dëser Halleffinall anzefänken.

Op 5minutes.rtl.lu Impressioune vun den "Arènes" zu Metz. Klickt op d'Foto fir déi ganz Galerie ze gesinn.


Op 5minutes.rtl.lu: Impressioune vun der Place Léopold zu Arel. Klickt op d'Foto fir déi ganz Galerie ze gesinn.


Donieft waren och eis Kollege vun der Tëlee zu Arel, wou de Christophe Hochard sech kuerz virum Upëff live vun der Plaz gemellt huet.

Belsch géint Frankräich op der WM (10.07.2018)
De Christophe Hochard huet d'Impressioune virum Match zu Arel agefaangen.


Belsch-Frankräich 0:1 - D'Stëmmung um Glacis



Am Virfeld: D'Belsch waren d'Favoritte vu ville Lëtzebuerger







Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.