Futtball-WM: LivescoreKroatien gewënnt no Eelefmeterschéisse mat 6:5 géint Russland

Um Samschde sinn déi lescht Véierelsfinalle gespillt ginn. Kroatien an England treffen an der Halleffinall openeen, Russland a Schweden eraus.

No 90 Minutten huet England mat 2:0 géint Schweden gewonnen. Dat duerch Goler vum Maguire an Alli an der 30. an an der 59. Minutt.

Am Match Kroatien géint Russland war Kroatien vun der Opstellung hier e wéineg am Virdeel, ma um Enn ass d'Decisioun eréischt am 11-Meter-Schéisse gefall. No 90 Minutte stoung et 1:1 tëscht Russland a Kroatien. An der 31. Minutt hat den Cheryshev d'Russe mat 1:0 a Féierung bruecht. An der 39. Minutt huet de Kramaric dunn op 1:1 ausgeglach. No 90 Minutte gouf et kee Gewënner, sou datt et an d'Verlängerung gaangen ass. Hei huet de Vida no 101 Minutt fir den 2:1 fir Kroatien gesuergt, dat no engem Corner vum Modric. Russdland konnt nach eng Kéier reagéieren an huet an der 115. Minutt e Fräistouss genotzt, fir eng weider Kéier auszegläichen. Um Enn ass d'Decisioun am 11-Meter-Schéisse gefall an do war Kroatien besser. Vun de 5 Schëss huet bei de Kroaten nëmmen de Kovacic säin derlaanscht gesat, bei de Russen hunn de Smolov an de Ferandes verschoss, sou datt Kroatien mat 6:5 géint Russland gewënnt an an der Halleffinall steet.

England kritt et als mat Kroatien  ze dinn. D'Halleffinall gëtt e Mëttwoch um 20 Auer gespillt. Déi éischt Halleffinall gouf schonn um Freideg ermëttelt. Hei kritt Frankräich et mat der Belsch ze dinn. Dëse Match ass en Dënschdeg den 10. Juli um 20 Auer.

WM: De Resumé vun de Matcher um Samschdeg vum Lynn Kayser.



England a Kroatien stinn an der Halleffinall (07.07.2018)
Um Samschdeg huet England Schweden mat 2:0 geklappt an Kroatien huet sech no 11-Meter-Schéisse mat 6:5 géint Russland behaapt.


Football Weltmeeschterschaft


Russland - Kroaten 6-5

An der 2. Véierelsfinall vun e Samschdeg stinn sech Russland a Kroatien géigeniwwer. D'Russe sinn dann och direkt relativ staark gestart an hunn erstaunlech aggressiv an dynamesch direkt Richtung kroatesche Gol gespillt.

An der 31. Spillminutt ass et dann de Cheryshev, dee no enger Pass vum Dzyuba aus ronn 20 Meter ofzitt an de Ball riicht an de lénken Eck vum Gol schéisst. Keng Chance fir de kroatesche Keeper. 1:0 fir Russland.

No enger Partie gieler Kaarte fir d'Kroate sinn dës dunn awer erwächt a packe knapp virun der Paus (40. Minutt) den Ausgläich. De Mandzukic passt de Ball op de Kramaric, deen de Ball dann einfach an de Gol manövréiert. 1:1 steet et an der Paus.

Déi 2. Halschent huet da manner dynamesch ugefaangen, virun allem vu Russland war vill manner ze gesinn, wéi déi éischte 45 Minutten. Kroatien hat e wéineg méi vum Spill an och méi Chancen, och wann et e relativ equilibréierte Match bliwwen ass.

No engem zéie Match a wéineg Golchancen, goung et dann no 95 Minutten an d'Verlängerung.

An der 1. Halschent vun der Verlängerung koum net méi vill vu Russland, Kroatien dogéint huet no vir gedréckt a wollt de Gol markéieren, fir net an en Eelefmeterschéissen ze goen. De Subasic, de Golkeeper vun de Kroaten, hat sech jo kuerz virun der 90. Minutt blesséiert, da wéi en sech vertrëppelt hat. No engem Corner kann de Vida de Ball käppen a geet an de Gol vun de Russen, dat an der 101. Minutt.

Déi russesch Fans haten hir Ekipp scho bal opginn, ma du koumen se awer nach eemol, dat an der 115. Minutt. No engem Fräistouss vu Russland trëfft de Mario Fernandes a gläicht kuerz viru Schluss mat 2:2 aus.

2:2 no 120 Minutten, d'Entscheedung tëscht Kroatien a Russland fält am Eelefmeterschéissen.

D'Spannung fir béid Ekippe war praktesch net méi ze toppen, dat bis zu lescht. An dach sinn et d'Kroaten, déi e kille Kapp behalen an d'Eelefmeterschéisse fir sech entscheeden.

Russland ass domadder eraus a Kroatien trëfft an der Halleffinall op England.


Schweden - England 0:2
Déi éischt hallef Stonn huet England éischter ouni Iddie geschéngt. Trotz dass se mat 60 % Ballbesëtz d'Spill am Grëff haten, huet et hinnen un Tempo gefeelt. Zu kengem Moment ware se de Schweden geféierlech. D'Schweden hunn am Ufank éischter ee staarken Androck gemaach a stounge ganz gutt.

An der 30. Minutt gouf et dunn ee Fräistouss fir England. De Maguire verwandelt dësen duerch ee Kappball zum 1:0.

An der 40. an 42. Minutt gouf et am Strofraum 2 weider Chancë fir England. Schweden konnt de Ball awer béid Kéieren evakuéieren an domadder e weider Gol verhënneren. Vun do u schéngt de Knuet bei England geplatzt ze sinn an d'Spill huet u Vitesse opgeholl. England gëtt Schweden an der 43. an 44. Minutt nach emol geféierlech. Et bleift allerdéngs beim 1:0 fir England um Schluss vun der éischter Halbzeit.

An der 46. Minutt mécht den Ausgustinsson eng Flank op de Berg, deen direkt virum Gol steet. De Schwed kritt de Kappball allerdéngs net an de Gol verwandelt. Den englesche Golkipp krut de Ball gestoppt.

Déi 2. Halbzeit huet däitlech méi Tempo ewéi déi éischt a Schweden wéisst sech méi offensiv. Et gëtt awer Chancen op béide Säiten.

An der 59. Minutt erhéicht England dann ob 2:0. De Lingard schéisst eng Flank op den Alli, deen de Gol da markéiert.

An der 71. Minutt gouf et eng weider Chance fir Schweden. De Berg schéisst awer knapp iwwert den Gol.

Schweden ass et bis zum Schluss net méi gegléckt d'Spill ze dréinen an et bléift beim 2:0 fir England.





Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.