Futtball-WM: FOTOEN a VIDEOENKroatien gewënnt no Verlängerung a spillt Finall géint Frankräich

Um Mëttwoch den Owend konnt sech Kroatien géint England duerchsetzen a spillt an der Finall géint Frankräich ëm de Weltmeeschtertitel.

En Dënschdeg konnt sech Frankräich knapp mat 1:0 géint d'Belsch duerchsetzen a steet domadder als Finalist fest. 24 Stonne méi spéit stounge sech England a Kroatien géintiwwer, fir de Géigner vun eisen Noperen ze fannen an um Enn wënnt Kroatien mat 2:1 no Verlängerung.

Kroatien-England: Ambiance an der Stad (12.07.2018)
Den Domingos Oliveira war en Tour duerch d'Stad maachen. Hei Biller vum Glacis, vun der Alstad a vu Clausen.


Football Weltmeeschterschaft


Kroatien wënnt mat 2:1 no Verlängerung géint England (11.07.2018)
Fir Kroatien geet den Dram vun der Weltmeeschterschaft virun.


De Match huet ideal ugefaange fir d'Englänner, well si konnte schonns no 5 Minutte mat 1:0 a Féierung goen. Nodeems de Modric den Alli nëmmen e puer Meter virum Strofraum gefoult huet, gouf et Eelefmeter fir England. De Kieran Trippier huet aus zentraler Positioun direkt geschoss an de Ball mat vill Gefill uewen an den Eck geschoss.




De Gol huet den Englänner Confiance ginn, déi hunn de Match nämlech kontrolléiert a konnte sech ëmmer erëm Corneren erausspillen. Hei koum de Maguire zweemol zum Kappball, eemol awer komplett ongeféierlech, ma déi aner Kéier goung de Kappball vum engleschen Defenseur net esou wäit laanscht de Gol.

An der 19. Minutt war et dunn dat éischt richtegt Liewenszeeche vun de Kroaten, do war et de Perisic, deen aus knapp 19 Meter just knapp donieft geschoss huet.

Kroatien ass dunn ëmmer besser an de Match komm, si hate méi Ballbesëtz a waren an den Zweekämpf méi staark, ma u Chancen huet et nach ëmmer gefeelt. Déi geféierlech Chancen haten awer weiderhin d'Englänner, esou och eng Duebelchance vum Kane no knapp enger hallwer Stonn.

Dunn eng weider gutt Geleeënheet fir England. No enger séierer Konter-Attack huet de Alli de Ball zeréck op de 16-Meter gespillt, wou de Lingard geschoss huet, ma deem säi Schoss goung knapps laanscht de Gol. Esou goung et mat der 1:0-Féierung an d'Paus.

Zum Ufank vun der zweeter Hallschent huet sech de Match gréisstendeels am Mëttelfeld ofgespillt a keng vu béiden Natioune konnt sech eng richteg Golchance erausspillen. D'Englänner hu probéiert de Ball an den eegene Reien ze halen an d'Kroaten aus dem Spill ze huelen.

An der 65. Minutt hunn d'Kroaten dunn awer gewisen, dass si nach ëmmer do sinn an nach ëmmer wëllen. De Perisic krut um 16-Meter de Ball an huet voll ofgezunn, ma de Ball ass um Kyle Walker hänkebliwwen.

Dës Chance huet de Kroaten nei Hoffnung ginn a mat der Hoffnung koum och den Ausgläich an der 68. Minutt. De Vrsaljko huet de Ball vun der rietser Säit an d'Mëtt geflankt, wou de Perisic de Ball artistesch an de Gol schéisse konnt.




An der 72. Minutt war et dunn esouguer bal d'Féierung fir Kroatien. No enger Onstëmmegkeet an der englescher Defense koum de Perisic nees un de Ball, ma säi Schoss goung nëmmen op de Potto an den Noschoss ass an den Äerm vum Pickford gelant.

Et war elo eng ganz staark Phas vun de Kroaten, déi op ee weidere Gol gedréckt hunn an d'Englänner ware geschockt an hunn elo an der Defense richteg gewackelt. Ëmmer erëm hu si Feelpäss gespillt an esou koumen d'Kroaten och ëmmer erëm zu geféierlechen Aktiounen, ma si kruten de Ball net an de Gol.

Et sollt kee Gol méi falen, esou dass Kroatien an déi 3. Verlängerung hannertenee sollt goen.

Déi kleng Paus virun der Verlängerung huet den Englänner nawell gutt gedoen, well déi waren elo erëm besser am Match an hunn nees méi Rou an d'Spill kritt a konnte sech esou och nees Offensivaktiounen erausspillen. An der 99. Minutt war et du ganz enk gi fir d'Kroaten. No engem Corner vum Trippier koum de Stones fräi zum käppen an do haten d'Kroate Gléck, dass de Vrsaljko op der Linn genau richteg stoung, de Golkipp wier nämlech net méi un de Ball komm.

Kuerz virun Enn vun der éischter Hallschent vun der Verlängerung dunn déi grouss Chance fir d'Kroaten. De Perisic huet de Ball vu lénks an d'Mëtt bruecht a stoung eleng virum Pickford, mee den englesche Golkipp konnt de Ball an de Corner-Aus deviéieren.

An der 109. Minutt dunn d'Erléisung fir d'Kroaten, de Mario Mandzukic konnt nämlech den 2:1 markéieren. Een héije Ball gouf vum Perisic op de 5-Meter gekäppt an do ass de Mandzukic am Réck vum Stones fortgelaf an ass virum Pickford äiskal bliwwen a konnt op 2:1 stellen.

D'Englänner hunn nach eemol alles no vir gehäit, ma si konnte kee Gol méi schéissen, esou dass Kroatien um Enn mat 2:1 gewënnt an an der Finall op Frankräich trëfft. D'Finall gëtt dann e Sonndeg gespillt.





Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.