Liichtathletik: U20-WMPatrizia Van der Weken iwwer 200 Meter an der Halleffinall

D'Patrizia Van der Weken leeft hir Halleffinall e Freideg den Owend um 19.02 Auer.

© RTL Télé Lëtzebuerg
Op der Liichtathletik Weltmeeschterschaft vun den U20 zu Tampere a Finnland si mam Patrizia Van der Weken an dem Lena Kieffer zwou Lëtzebuergerinne mat dobäi.

Fir d'Patrizia Van der Weken ass iwwert d'100 Meter eng 15. Plaz ënnert 23 Leeferinnen erausgesprongen. D'Lëtzebuergerin war an den Halleffinallen an enger Zäit vun 11 Sekonnen a 70 Honnertstel op déi 7. Plaz gelaf. Fir an d'Finall ze kommen, hätt d'Patrizia Van der Weken missen eng Zäit vun 11,57 Sekonne lafen. An der Virronn war d'Lëtzebuergerin d'100 Meter an 11 Sekonnen an 62 Honnertstel gelaf, wat nëmmen 3 Honnertstel iwwert hirem nationale Rekord war.

E Freideg war d'Patrizia Van der Weken nach op den 200 Meter am Asaz. D'Lëtzebuergerin konnt sech hei fir d'Halleffinall qualifizéieren, dat mat engem Chrono vu 24 Sekonnen an 20 Honnertstel. Domat bleift si nëmme knapp hannert hirer perséinlecher Beschtzäit vu 24 Sekonnen an 13 Honnertstel.

Hei hat dann och d'Lena Kieffer hiren éischten Asaz. Si ass iwwer 1.500 Meter ugetrueden a koum um Enn op déi 24. Plaz, dat ënner 28 Leeferinnen. Obwuel si eng gutt Zäit vu 4 Minutten, 28 Sekonnen a 84 Honnertstel gelaf ass, sollt et net duergoen, fir weiderzekommen.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.