FOTOEN: Europa League Qualifikatioun: 1. TourVictoire fir Nidderkuer, Defaite fir de Racing

En Donneschdeg den Owend waren de Progrès Nidderkuer an de Racing an der Europa League Qualifikatioun gefuerdert.

De Progrès Nidderkuer konnt sech en Donneschdeg den Owend mat 2:0 géint Qäbälä aus dem Aserbaidschan duerchsetzen.

Nodeems an der éischter Hallschent keng vu béiden Ekippen ee Gol schéisse konnt, schéngt de Paolo Amodio an der Paus déi richteg Wierder fonnt ze hunn, fir seng Ekipp ze motivéieren, well déi hu kuerz no der Paus zougeschloen. De Mayron de Almeida konnt de Progrès Nidderkuer nämlech an der 51. Minutt a Féierung bréngen.

Den 1:0 vum Mayron de Almeida an der 51. Minutt (13.07.2018)
Den de Almeida konnt kuerz no der Paus zouschloen.

Qäbälä hat wuel méi Ballbesëtz, ma si konnte sech géint déi staark Defense vun de Lëtzebuerger keng richteg Golchancen erausspillen. Nidderkuer war déi méi geféierlech Ekipp a sollt um Enn verdéngt mat 2:0 gewannen. Den Olivier Thill konnt an der 62. Minutt nämlech nach een Eelefmeter eraschéissen.

De Gol vum Olivier Thill an der 62. Minutt (13.07.2018)
De Spiller vun Nidderkuer huet vum Eelefmeterpunkt aus getraff.

Mat den zwee Auswäertsgoler hu si och schonns ganz gutt Chancen, fir een Tour weiderzekommen. De Retourmatch ass den 19. Juli um 19.30 Auer.

Victoire fir Nidderkuer, Néierlag fir de Racing (13.07.2018)
En Donneschdeg den Owend waren de Progrès Nidderkuer an de Racing an der Europa League Qualifikatioun gefuerdert.


Fir de Racing war et kee sou ee gelongen Owend. De Stater Veräin huet am Stade Josy Barthel mat 0:2 géint den FC Viitorul aus Rumänien verluer.

Racing - Viitorul 0:2 / De Resumé vum Match vum Cliff Block


Vun Ufank un huet de Lëtzebuerger Fusiounsveräin, den direkten Wee zum Gol gesicht a konnt sech bannent den éischten 10 Minutten zwou Chancen eraus spillen. De Kevin Nakache huet de Ball aus dem 16-Meter-Raum allerdéngs iwwert de Gol gesat an den Hennetier hat nëmmen d'Aussennetz vum éischte Potto getraff.

Mat der éischter Chance fir d'Gäscht an der 23. Minutt ass och direkt de Gol gefall. Den Dragus konnt mat engem Schoss vu lenks aus gutt 16 Meter an den eidele Racing-Gol era setzen, dëst well bei dëser Action de Stater Golkipper ze wäit aus dem Goal komm ass. Batter fir de Racing, déi bis dohinner déi besser Ekipp waren.

Den Hennetier hat an der 35 Minutt fir de Racing den Ausgläich um Fouss, mee säi Schoss vu rieds, konnt de Kipper vun de Gäscht an de Corner leeden.

Ween no der Paus op eng Reaktioun vum Racing gehofft huet, gouf enttäuscht. Et waren nämlech d'Gäscht déi d'Heft an Hand geholl hunn. Tëscht der 59. an der 63. Minutt hate si sech direkt 4 Chancen erausgespillt, konnten awer keng dovunner notzen.

Déi éischten Aktioun fir de Stater Veräin an den zweete 45 Minutte war an der 70. Minutt, no engem Fräistouss aus der Mëtt, konnt den Nakache de Ball am Gol vun de Gäscht awer net ënnerbréngen.

No engem Feeler am Strofraum vum Simon an der 81. Minutt op den Dragus vun de Gäscht, huet den Arbitter op den 11-Meter-Punkt gewisen. Dësen huet den Hagi zum 2:0 fir seng Faarwen era gesat.

Um Spillstand sollt sech bis zum Schluss näischt méi änneren, sou datt de Racing den Allermatch mat 0:2 verléiert. Et hat een sech op Racing Säit vill virgeholl, dofir war den Trainer Patrick Grettnich nom Match och enttäuscht.

© Cliff Block

E Mëttwoch den Owend hat d'Fola géint den FC Pristhina 0:0 gespillt.

Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.