Bilan Schwamm-EMNationaltrainer mat de Leeschtungen net richteg zefridden

D'Monique Olivier, de Julien Henx an de Raphaël Stacchiotti waren zu Glasgow fir Lëtzebuerg am Asaz.

© pressphoto.rtl.lu
Dräi Lëtzebuerger Schwëmmer ware bei der EM zu Glasgow am Asaz. Och wann net alles ideal verlaf ass, bleift sécherlech déi 14. Plaz an der Halleffinall vum 200 Meter 4 Nages vum Raphaël Stacchiotti ervirzehiewen.

Schwamm-EM / Bilan vum Jean-François Schneiders


Den Nationaltrainer Ingolf Bender konnt net esou richteg zefridde si mat de Leeschtunge vun de Lëtzebuerger Schwëmmer bei dëser Europameeschterschaft. Et ass kengem dat gelongen, wat si all als Zil ausgemaach haten, nämlech eng perséinlech Beschtleeschtung ze weisen.

D'Monique Olivier war bei dëser EM um 200 a 400 Meter Crawl um Depart. Déi 20 Joer jonk Schwëmmerin konnt op dëse Strecken am Beräich vun hire Saisonsbeschtzäite schwammen, deemno war den Ingolf Bender dann och zefridden. Grad um leschten Dag, wou d'Schwëmmer all e bëssen ausgepowert waren, konnt d'Monique Olivier iwwer 400 Meter eng gutt 17. Plaz erreechen.

Den Julien Henx konnt zu Glasgow um 50 Meter Papillon bis op 3 Honnertstel u säin eegene Landesrekord eruschwammen an déi 25. Plaz realiséieren. Den Ingolf Bender kuckt dann awer schonn no vir, wat d'Zukunft vum Julien Henx ugeet. Well et ass nach e klenge Wee, bis bei d'Norm fir Olympia an do ass een natierlech elo kee Schratt méi no komm. Et muss also an nächster Zäit eng Steigerung kommen.

De Raphaël Stacchiotti realiséiert wuel eng 14. Plaz an der Halleffinall vum 200 Meter 4 Nages, den Nationaltrainer Ingolf Bender hat sech dann awer méi vum Sportzaldot erwaart. Grad iwwer 200 Meter 4 Nages, der Paradedisziplin vum Raphaël Stacchiotti, wier méi dra gewiescht.

Un der Virbereedung vu Stacchiotti an Henx op dës EM huet et dem Ingolf Bender no jiddefalls net gehaangen, well se do schaffe konnten, wéi si wollten. Elo muss ee sech mat hire spezifeschen Trainer zesummesetzen an dat Ganzt analyséieren.

Fir déi 2 Sportzaldoten Henx a Stacchiotti ass d'Saison no der EM nach net fäerdeg, Mëtt August ass nämlech d'Militär-WM a Russland.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.