Internationale FuttballLiverpool, Manchester City, Tottenham an Chelsea mat gelongenem Optakt

Um 1. Spilldag vun der Premier League gewënnt Chelsea mat 3:0 géint Huddersfield an Tottenham klappt Newcastle mat 2:1. Liverpool wënnt 4:0 a City mat 2:0.

© afp
Premier League
Am éischte Match vum Dag gewënnt Tottenham méi oder manner souverän mat 2:1 zu Newcastle. Nodeems de Vertonghen Tottenham a Féierung bruecht huet, konnt de Joselu nëmme puer Minutten drop ausgläichen. Mee den Dele Alli huet d'Spurs no enger schéiner Flank vum Aurier an der 18. Minutt nees a Féierung bruecht. Bei dësem Resultat sollt et dann och bleiwen. D'Ekipp vum Maurizio Pochettino hat io op sech opmierksam gemaach well se an dëser Transferperiod weder e Spiller kaf oder verkaf hunn.

An och Chelsea gewënnt an dat souverän mat 3:0 géint Huddersfield. Nodeems de Kanté d'Londoner mat 1:0 a Féierung bruecht huet, konnt de Jorginho an der 45. Minutt per Eelefmeter op 2:0 erhéijen. No 80 Minutten huet de Pedro op 3:0 gestallt. Den Eden Hazard stoung net an der Startformatioun a gouf an der 76. Minutt agewiesselt.

Liverpool konnt sech e Sonndeg souverän mat 4:0 géint West Ham duerchsetzen. De Salah konnt d'Reds an der 19. Minutt schonns a Féierung bréngen. De Sadio Mané konnt mat sengem zwee Goler de Virsprong erhéijen an an der 88. Minutt huet de Sturridge du fir d'4:0-Schlussresultat gesuergt.

Am Spëtzematch konnt sech e Sonndeg Manchester City mat 2:0 géint Arsenal London behaapten. De Raheem Sterling konnt d'Citizens schonns an der 14. Minutt mat 1:0 a Féierung bréngen. An der zweeter Hallschent war et de Bernardo Silva, deen an der 64. Minutt fir d'2:0-Schlussresultat gesuergt huet.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.