Lëtzebuerger Futtballer am AuslandJans wënnt mam FC Metz, Mahmutovic mat Boro a Gerson mat Norrköpping

Déi 3 Lëtzebuerger Futtballiste Laurent Jans, Enes Mahmutovic a Lars Gerson waren allen 3 en Dënschdeg fir hir jeeweileg Ekipp de ganze Match am Asaz.

© RTL Archivbild

De Laurent Jans huet en Dënschdeg an der Coupe de la Ligue de ganze Match mam FC Metz géint Grenobel gespillt. D'Ekipp aus der Lorraine huet sech 2-1 duerchgesat. De Jans huet ënnert den Ae vum Lëtzebuerger Futtballnationaltrainer Luc Holtz, déi 90 Minutten iwwer, e ganz gudden Androck hannerlooss.

An der englescher Coupe de la Ligue huet den Enes Mahmutovic a sengem éischten offizielle Match mat der Profisekipp vu Middlesbrough direkt e Gol geschoss. Et war den 2-2 an der 44 Minutt géint Notts County. Um Enn wënnt Boro no Eelefmeterschéissen 4-3.

An der ieweschter Divisioun a Schweden hat de Lars Gerson mat Norrköping beim 0-0 géint den 2. Hammarby déi 90 Minutten gespillt. Norrköping steet an der Tabell op der 4. Plaz.