EM-QualifikatiounU21-Nationalekipp verléiert auswäerts mat 0:2 géint Frankräich

An der U21-EM-Qualifikatioun gouf et eng Defaite fir d'Lëtzebuerger. D'Fransousen hunn duerch Goler vum Aouar an dem Bamba gewonnen.

Nieft der Futtballnationalekipp, déi 3:0 a San Marino gewonnen hunn, war och d'U21 en Dënschdeg den Owend am Asaz. Am Kader vun der Qualifikatiounscampagne fir d'Futtball-Europameeschterschaft 2019 hu si en Dënschdeg den Owend mat 0:2 géint Frankräich verluer. De Manuel Cardoni, Trainer vun der U21, ass trotz der Defaite zefridde mat der Prestatioun vu senger Ekipp.

U21 verléiert géint Frankräich/Reportage Christophe Jost

Wann et no 90 Minutten 0:2 aus Lëtzebuerger Siicht steet an ee mat 0 Punkten erëm heemfiert, kann een an der Reegel net zefridde sinn. En Dënschdeg den Owend war dat awer anescht. Mam Géigner Frankräich kruten déi jonk Rout Léiwen et mam klore Gruppefavorit ze dinn, eng Ekipp, déi gespléckt mat groussen europäeschen Talenter ass. De Lëtzebuerger Nationaltrainer Manuel Cardoni ass der Meenung, dass déi Ekipp ee ganz héijen Niveau huet an den Nationaltrainer war ganz houfreg op d'Leeschtung vu senge Jongen.

Virun allem an der 1. Halbzeit hunn d'Lëtzebuerger aus enger gutt gestaffelter Defense versicht, fir vereenzelt offensiv Akzenter ze setzen, ouni den dicht gestapelte 4-4-2 opzeginn. D'Léiwe stounge gutt, sou dass d'Fransouse sech ganz schwéier gedoen hunn, sech offensiv a Positioun ze bréngen.

An der 2. Halbzeit sinn d'Fransouse méi staark ginn, hate méi Ofschlëss a konnten dunn och zweemol markéieren. An der 59. an 88. Spillminutt huet et am Gol vun de Lëtzebuerger gerabbelt. Trotz den 2 Géigegoler huet virun allem den Hueschterter Golkipp Valentin Roulez eng ganz gutt Prestatioun gewisen.

D'Lëtzebuerger U21 steet no 8 gespillte Matcher mat 4 Punkten op der leschter Tabelleplaz. Den nächste Match ass den 12. Oktober auswäerts géint Montenegro, wou ee mat enger Leeschtung wéi en Dënschdeg den Owend Punkte kéint mat heem bréngen.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.