VIDEO: BasketSpecial Olympics wanne Galamatch géint VIP-Ekipp

E Sonndeg de Mëtteg um 13 Auer gouf zu Diddeleng Basket gespillt. Eng Initiativ vun der Interegg Basket Academy.

Special Olympics wanne Galamatch géint VIP-Ekipp (16.09.2018)
E Sonndeg de Mëtteg um 13 Auer gouf zu Diddeleng Basket gespillt. Eng Initiativ vun der Interegg Basket Academy.

An der Diddelenger Sportshall gouf e Sonndeg de Mëtten ee Basketmatch tëscht Promien a Sportler vun de Special Olympics gespillt. Bei den 20 Promien hunn ënnert anerem Politiker, Sportjournalisten a Sportler ewéi zum Beispill den Tennisspiller Gilles Müller, de Schwëmmer Raphael Stachiotti souwéi den Triathlet Yannick Lieners matgemaach. Fir d'Special Olympics waren eng 10 Sportler am Asaz. Eng Initiative, déi vum T71 lancéiert gouf, fir ënnert anerem de Basket nach besser ze promouvéieren souwéi déi sozial Inclusioun ze ënnerstëtzen an ze fërderen.

Eng Initiative, déi am Kader vum europäeschen Projet Interreg organiséiert gouf. 5 Basketveräiner aus der Groussregioun maache bei deem Projet mat, dorënner eben och den T71 Diddeleng. Aner Clibb, déi matmaachen, sinn zum Beispill d’Panthers vu Léck a Saarlouis. De Projet gëtt dann och vun EU-Gelder finanzéiert. Mat deem Projet wëll ee virun allem an der Groussregioun géint all Form vun Diskriminatioun virgoen. Mam Galamatch wéilt een awer och d'Viruerteeler géint Mënsche mat ënnerschiddlecher Hierkënft, Geschlecht oder kierperleche Viraussetzungen aus der Welt schafen, esou de Coordinateur Frank Müller.

Um Enn ass de Match iwwregens mat 55:52 op de Kont vun de Special Olympics gaangen.

Virschau op de Galamatch
E Sonndeg de Mëtten um 13 Auer gouf am Centre Sportif René Hartmann zu Diddeleng de Galamatch tëscht der Special Olympics Basket's Ekipp a enger zesummegewierfelter Ekipp aus Politik, Sport a Medien ugepaff.

Basket-Galamatch VIP-Special Olympics: Rep. Christophe Jost

Eng Woch virum Optakt vum Championnat stoung dëse Weekend schonns e flotte Rendez-vous fir d'Basketfrënn am Agenda. Zu Diddeleng stoung e Samschdeg an e Sonndeg de Basket am Virdergrond. 1 Match bei den Dammen an 2 bei den Häre goufen um Samschdeg gespillt, éier e Sonndeg d'Spill ëm d'Platz 3 an d'Finall vum Mini Turnéier JTC Euro Trophy um Programm stoungen. Nieft dem T71 Diddeleng haten och auslännesch Ekippen de Wee an d'Forge du Sud fonnt.

Highlight war sécherlech de Galamatch vun e Sonndeg, dee vun der Interegg Basket Academy organiséiert gouf. Eng Organisatioun déi sech aus Ekippen aus dem In- an Ausland zesummegedoen hat, fir Mënsche mat ënnerschiddlecher Hierkënft, Geschlecht oder kierperleche Viraussetzungen zesummenzebréngen.

Aus sportlecher Siicht soll duerch Basket Academy virun allem de Basket bei den Damme weiderentwéckelt ginn, well dësen an der Groussregioun a Bezuch op Ausbildung Potenzial no uewen huet. Sou kënnt et also, dass e Sonndeg eng VIP-Ekipp géint eng Special Olympics Ekipp spillt.



 

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.