BGL BNP Paribas Luxembourg OpenJulia Görges - Belinda Bencic, sou d'Finall um Samschdeg

Beim WTA-Tournoi op der Kockelscheier steet d'Mandy Minella mat hirer Partnerin Vera Lapko am Dubbel an der Finall.

Vun 17 Auer u gouf déi éischten Halleffinall tëscht dem Julia Görges an dem Eugenie Bouchard gespillt. Op Grond vun e puer kriteschen Arbitter-Entscheedungen a guddem Tennis vum Eugenie Bouchard stoung et am éischten Saz séier 2 bis 5 aus Sicht vun der däitsch Spillerin. D'Nummer 9 an der Welt huet sech awer erëm erugekämpft a bei 6:6 ass et an den Tiebreak gaangen.

Do war d'Bouchard besser an hat beim Stand vun 6:3 hiren éischte Sazbäll. Direkt deen éischten huet si genotzt an no bal enger Stonn Spillzäit deen éischte Saz mat 7:6 gewonnen. Och Ugangs vum 2. Saz war d'Bouchard, déi hire 7. Match bei dësem Turnéier gespillt huet, gutt drop a louch séier 2:0 vir. Lues a lues koum d'Julia Görges awer zréck an d'Partie an d'Spectateure kruten excellenten Tennis gebueden.

Beim 6:5 fir d'Görges hat d'Spillerin vu Regensburg bei Opschlag Bouchard 3 Sazbäll an gewënnt deen 2. mat 7:5, den 3. Saz war Formsaach an geet mat 6:1 un d'Görges, déi elo no 2010 eng 2. Kéier an der Finall steet.

D'Görges gewënnt an der Halleffinall géint d'Bouchard (19.10.2018)
D'Julia Görges steet fir zweete Kéier an der Finall vun de BGL BNP Paribas Luxembourg Open.


An der 2. Halleffinall war et no engem ganz spannenden, spektakulärem a laangem Match tëscht dem Belinda Bencic an dem Dayana Yastremska eng Victoire fir d'Bencic mat  6:2, 3:6 a 7:6. Eng Partie, bei där bis zum Matchball béid Spillerinnen eng Plaz an der Finall verdéngt haten.

Mandy Minella mam Vera Lapko an der Dubbel-Finall
© Val Wagner


Zesumme mam Vera Lapko huet d'Mandy Minella sech e Freideg fir d'Finall am Dubbel beim WTA-Tennis-Tournoi op der Kockelscheier qualifizéiert. Den Duo huet sech an der Halleffinall géint d'Koppel Serban/Shinikova an zwee Sätz mat 7:6 a 6:3 duerchgesat.

An der Finall kréien d'Minella an d'Lapko et e Samschdeg um 12.30 Auer mam Duo Minnen/van Uytvanck ze dinn.


All d'Matcher am Iwwerbléck
Eenzel:

Julia Görges - Eugenie Bouchard 6:7, 7:5 a 6:1.
Belinda Bencic - Dayana Yastremska 6:2, 3:6 a 7:6.

Dubbel:

Kirsten Flippkens/Johanna Larsson - Greet Minnen/Alison van Uytvanck 7:6 2:6 9:11
Raluca Serban/Isabella Shinikova - Mandy Minella/Vera Lapko 6:7 3:6

Tennis op der Kockelscheier live op RTL
BGL BNP Paribas Luxembourg Open: Finall
(mat Kommentar vum Franky Hippert a Gilles Muller)
Samschdeg, 20. Oktober vu 15h00 bis 17h30 - Programm vum 1. RTL
Samschdeg, 20. Oktober vun 19h00 bis 19h30 - RTL-Sport-Spezial vun der Kockelscheier um 1. RTL

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.